THIL NEUCHIK TUNG A CHIHTAKNA

I hinkhua ua thupi i kisakna pen leh nna hoih sem i kisakna pen hun uh tuh bang hiam lohchinna i ngah hun uh ana hisek hi. Hiai bang a lohchinna i ngahtheihna na ding un i mohpuak na uh, sep ding leh bawl ding te i zoh a i sep buching uh a ngai hi. Tua te i hon sep buching chiang un lohchinna lampi tuamtuam ah i na mu zel uhi.

Tulai in ki taitehna a sang mahmah ta a, i pilna uh leh i siamnate uh leng hong sang huaihuai ta hi. Hiai bang hun a omta i hih ziak un a thei leh atheilou te kikal leng hong ki gamla mahmah ta hi. Huchi bang ahih lai’n midangte pha zoulou kisakna, midangte hih theih te hihtheilou kisakna, siamna leh pilna neilou kisakna leh mi tung bang tung zoulou kisakna i nei uh a, i kipah ding bang un i kipak thei nawn kei uhi. Hiai in theih beh utna, midangte engna, midangte om bang a om utna hon tung in, ei ah chii hoihlou hon tut hun ana om sek hi. Himahleh hiai te zaw khovel pilna leh siamna utna ziak a kitaitehna atam zaw ana hi zaw hi.

I laisiangthou hoihtak a i suut a i simchiang in, Pathian in thilneu chik maimai tele amah adia thupi ahih dan chiangtakin i mu hi. Midangte hih zoh bang hih zoulou i kisa kha maithei hi. Ahihkeileh I nnasepte niam lua sakna, midangte tung bang tung zoulou kisakna i nei kha thei uhi. Tua te zaw khovel etdan lel ana hi zaw hi, Pathian mitmuh in na thil hih neuchik, hou chik leh niam chik na kisakna te Amah ading in manpha in athupi lua hi. Diktatna nei a, chihtakna toh i sepding i bawl ding omte a i mohpuakna i hon sepbuching chiang in Toupa’ kipahna ah i lut a, tua te’n lohchinna tampi tak ahonpia thei hi. Toupa’n Samuel kiang a agen bang in “A mel in hiam, a sandan in hiam en ken. Ken amah ka deihkei hi. Toupa’n mihing et bang in a enkei. Mihing in pawlam a kilat dan a en a, Toupa’n bel lungtang a enzaw hi” a chi hi. – I Samuel 16:7. Hiai ah bang i muthei a i chih leh mihingte etdan leh Toupa’ thil etdan aki bang vek kei hi. Mihingte’n a pawlam a thil kilat dan in bangkim ah ngaihtuahna, suangtuahna leh thukhitna i bawlsek uhi. Tua te adik lou vek ding chi i hi kei a, himahleh midangte khosakna, a hih na uh en i va gending bangmah a om kei hi. Mi lohchin i chihte’n bang teng ana tuak ua, bangteng ana thuak uh hiam chih i thei kei hi. A chihtakziak uhleh Toupa a amuangna uh ziak a tua bang dinmun a om thei ahi zaw uhi. Himahleh mi tengteng tua bang dinmun ah i om vek kei uhi, dikloutak a nekgukna bang, dikloutak a theihna, muhna leh neihna te in lohching bang a ki lang i om uhi. Tua te zaw i mihing pihte mai-ah lohchinna bang in ki lang mah leh Pathian et ah bangmah ahi kei a, denchiang in tuate ziak in gawt leh vaihawm sak in i om zaw mah ding uhi.

Et dan dang ah en nawn leng, neihlehlam ah ahihkeileh sum-leh-pai ah, thilpiak ah hitaleh mite’ neih bangbang leh piak bangbang a pia zoute i hi khathei hi. Himahleh i neih bangbang a kiphaltak a i piakte Pathian mitmuh in a thupilua hi. Johan 6:10-14 na ah bang i muthei a i chihleh Jesu’n mipi sang nga a vak na i mu hi. Mi hiai zah tak vak na ding in Tanghou phel nga leh ngasa nih a zang hi. Hiai te koi a hong ki pan hiam i chihleh naupang khat a ki pan ahi a, tua tanghou phel nga leh ngasa nih te Toupa’n vualzawl in mipi te nekding in apia hi. Hiai ah i sinnop bang hiam i chih leh i Toupa Jesu’n huai naupang tanghou lou inleng thil thupitak asem khethei lua hi. Himahleh naupang pa’ thilpiak tungtawn in mi sang nga avak zaw hi. Thupilua hilou maw naupang pa’n aneih sunsun te kiphaltak a apiak ziak a mi tampi vak tu a pang kha chihtel. Ei te’n leng i saptuam sung uah hita leh Toupa’ gam nnasep na ding a i ki zatna te uh hiam, sum-le-phai, tha-le-zung i piak te tawm i sa khathei hi. I hih thei bangbang a sem a, i neih bangbang a kiphaltak a i piak uh ahih nak leh nna thupitak sepna in Toupa’n tampi in a hon vualzawl sak thei gige hi. Midangte ading a kipahna tuntu, nek ding amuh na uh, tanchinhoih a zak theihna uleh tantawn hinna aneihna uh ahi thei hi. I hih theih te tawm in tamlou ahi mai thei, I thilpiak zoh te leng tawm in tam lou ahi maithei himahleh Toupa’ khut ah lankhia ni, Aman manpha leh thupitakin ahon zatsak thei gige hi. Koute Pathian na seppihte ka hi ua, noute Pathian louma na hi ua, Pathian inlam leng na hi uhi.” – I Korinthte 3:9

Tuni’n nang leh kei i ki hanthawn thakthak ahi. Bangkim i hihna uah chihtakna toh pang in i hih peuh uh ginomtakleh chitaktak in sem ni. Mite’n i nna hoih septe hon theih pihlou uh ahi kha maithei, ahihkeileh i sep sunsun te leng houchik in a ngaithei uhi. Himahleh Toupa’ mitmuh a nnathupi tak sem i hih dan mangngilh het keini. Mihing taksa melpu i hih lai ziak un vuallel kisakna, bangmah lou kisakna a hong omthei tham hi, himahleh Toupa khut hat muanhuai ah kikem sak gige ni. I thil hih khat peuhpeuh a chihtakna leh diktatna a semchiat ding in i kichial ahi. Toupa hon sinsak bang in ‘Kuapeuh tawmchik tung a ginomlou tampi tung ah leng a ginom kei uhi.’ Sumlem tung a bawn na ginom kei uleh kuan ahia hauhna dik noute hon kemsak ding? Midang a tung a bawn na ginom kei un, noumau a kua’n honpe ding a? – Luke 16:10-12

Toupa’n saulou chik a i thugelhte i tanchiat ua ding in hon vualzawl sak henla, theihna bukim louh ziak a gen kim louh hiam, gelhkhelh omte a hon ngaihdamna i ngen a. I gen dik sun omte a sim khempeuh ading a thathak lakna, Toupa’ deihdan a kipiak semna ahong hihtheihna ding in a vualzawlna i ngen ahi.

Toupa’n hon ompihin hon vualzawl chiat hen! Amen.

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing hi.)
04th November, 2020 | Weekly-Inspiration – 44



Leave a Reply

Your email address will not be published.

*
*
*

× Direct Appointment