SINGTANGMITE’N HOLI BUAIPIH KEINI

Pulaakna:
Holi ichih chiang in Hindu Sahkhua zuite kut poimoh ahi a, amau adia nopsakna ni(hunbi) leh ni poimoh mahmah ahi. Holi pen Hindu sahkhua in a lop hitaangpi mah leh, Sahkhua zuih dukdak neiloute’n leng a loppih nak sek uhi. Hiai kut ahihleh, puantung a lim rong a gelhthoh (painting) leh temple upa pipi lamna leh cheina a suangtung a milim kikheuhte khong a akitaklat dan in, kum 2000 val tham akipat a ana lop uh hita chi in gen uhi.

Hiai kut melput leh kilatkhiakna ahih leh, rong ahi a; lawm-le-vual leh it-le-ngaihte toh hun nuam zang in, rong-vui leh rong-tui kinuhtuah a kimawlna leh kisuklimna hun, nek-le-dawn leh laa-le-tumging (music) ngaih pipi a khah in, akente’n khamtheih leh zu toh noptaalna a kithuahkhawmna in zang uhi.
Holi ahih leh, Feb-Mar kikal a Khapi (Full Moon) hong suah ni in lop pat hisek hi. Hiai kut in a chiamteh ahih leh, hoihna in gitlouhna tung a vual azohna ahi hi. Hiai kut lopna ah nektheih tuamtuam piibawl mahmah uhi.
Holi ahih leh khokhaal kut in pom ua, Phalbi mangpha khakna in leng zang uhi. Khokhaal haithak dawnna bang in leng loubawlte’n zang uhi.

Holi Hong Kipatdan:
I theih dia poimoh masa ahih leh, thu kihilhsawn leh tangthu dan a gen, akhang-akhang a kam a kipiaksawn thu ahihziak in, suangtuahna a  gelkhawm khanglui tangthu (mythology) hi’n Hindute tampi in leng pom uhi.
Tanglai pek in Hiranyakashipu kichi kumpi khat ana om hi. Kumpi gilou mahmah ahihziak in, dawi toh ana tehkhin hial uhi. A kigen dan in, Vishnu (pathian khat) in hiai kumpipa’ sanggampa athahsak ziak in, Vishnu tungah phuba lak tum tinten hi. Pathian khat tung a phuba la ut ahihziak in, thilhihtheihna (power) ngah na ding in kumsawtpi tak Brahma (Hindute’ pathian lianpen) kiang ah thum hi. Atawp in, a thumna dawn in om a, thilhihtheihna chi 5 piak in hong om hi. Huaite ahih leh: Mihing hiam ganhing hiam in that theilou ding, sun hiam zan hiam hilou ding, innsung hiam innpua hiam hilou ding, hiamhei khut a let hiam alengthei hiam hilou ding, tuitung hiam leitung hiam huihkhua hiam ah hilou ding. Ahuchih chiang in, amah leng thupi hong kisa gawp in pathian kisakna hon nei in, a mite kiang ah, pathian biak a abiak ding un thu pia hi.
Kumpi Hiranyakashipu in tapa, Prahlad kichi nei hi. Prahlad pen naupangchik lai mahleh, Vishnu (pathian) adi’n kipumpiak hi. Hiranyakashipu in Vishnu ahuat mahmah lai in, a tapa ngoihngoih in amah be utlou a, Vishnu be daih ahihziak in thangpai mahmah hi. Kumpipa hehlua ahihman in, a tapa thah hon sawm ta hi. Huchi’n, kumpipa’n a gitlouh suah in, a sanggamnu Holika kichi, (Holika chituamna ahihleh mei in kang theilou hi) fuihsia in, a tapa Prahlad meikuang lianpi lai ah piisak hi. Himahleh, lamdangtak mai in Prahlad, Vishnu min sam kawmkawm a om pen bangmah chilou in, bittak in om a, mei in a kattheihlouh Holika pen kangtum daih hi.
Huai khit in Vishnu in Prahlad’ pa Hiranyakashipu that hi. Hiranyakashipu sihtheih dingdan om sese ahihman in, Vishnu in Alulam sahang-apumlam mihing suahtheihna aneih pen zang hi. Khomui kuan in, aphei tung ah, phaitamlam innka tung(varandah) ah, a khut zung zang in Hiranyakashipu’ gilpi balkeksak in that hi.
Hiranyakashipu sihna hizawlou in, Holika kattumna toh Holi lopna kisaikha zaw hi. Holika kattumna in, gilou tung ah hoihna in a vualzohna langsak hi’n pom ua, hiai chiamtehna di’n, Holi nipi ma in, Holika Dahan (ahoihlou haltumna) chih minvuah in pawl leh singkhuah kisekhawm, holika lim dan a bawl in haltumna nei sek uhi.

Holi leh Rong (colour) kisaikhak dan:
A gendan un, Vishnu pen Khrishna in hong piang khethak hi. Krishna ahih leh, a vun rong adum hi. A thu omdan ahihleh, Khrishna in a vun rong adum ahihziak in, nungak khat, Radha kichi ngai mahleh kisitna nei in, va pawl ngamlou hi. Anu thuhilhna mang in, Khrishna in Radha rong va nuh a, huchi’n hong ki nel in hong ki ngai mahmah uhi. Huai akipat tunitan in, Holi ni a rong kinuhtuah pen iitna lahna dan in tawndaan in nei uh a Khrishna leh Radha ki iitna pahtawina hi’n leng pom uhi.

Holi zatdan:
Holi ahihleh ni thum zang tangpi uhi. Ani masa ni pen khapi suak ni hi a, innsung a pasal upa pen in a innkuanpihte rong in theh vek hi.
Ani nih ni in ‘Holika Dahan’ zang uhi. Huai ahih leh, singkhuah leh pawl zang in Holika lim dingdaan bawl in ahalna nei in uhi. Gilou tunga hoihna in avualzohna lopna ahihkawm in, huai meitual kual a pai in lasakna leh lamna hun zang ua, huai meitual kual mah ah pai in biakna (pooja) leh lamzanna dia thumna khong nei uhi.
Ani thum ni in ahih leh, innkuante, lawm-le-vual, innsak-innkhang in rong vui leh rong tui khong kinuh tuahna leh kithohtuahna a zang in nek-le dawn kiningchingtak toh kithuahkhawmna hun zang uhi. Rong ahihleh, nidanglai in paak, aieng leh louhing khong apat in ana bawl sek uh ahiziak in agim leng tui hi. Tuchiang in bel bawltawm hitangpi ta hi. Rong chituamtuam zang mah le uh, a omzenei leh alatsak neitak a azat uh leng om hi: Asan(Red) in chiphatna (fertility) ensak a, blue(adum) in Khrishna’ vun rong ensak hi. Yellow(aeng) in aieng pahtawi a, green(ahing) in hunthak leh kibulpatna thak taaklang hi.

Holi leh Bhaang:
Bhang ichih chia’n khamtheih chikhat, Ganja kung apat a ki bawlkhia ahi. Holi ni in hiai bhaang pen bawngnawi, rose paak, singgah(nuts) leh masala khenkhat toh helkhawm in dawn sek uhi. Hindute Laibu lui ah leng bhaang ana kigen kha tham a, mi kipaksaktu leh zalensaktu chih bang in ana kigen hi. Hindu sahkhua zuite  kivaipuak dan in nam sangte himhim khamtheih hih phallouh in hi uhi. Hileh leng Holi ni in bel amau adia khamtheih phalsak a aom ni un pom uhi. Agintat dan un, hiai phalna pen pathiante akipat ahi chi in pom uhi. Aziak ahihleh, pathian te’n van akipat a zu(nectar) kesak in, huai akiakna ah Ganja kung pou hi chi uhi. Huaiziakin, Holi ni in bhang ne/dawn sek uhi. Hindu pathian khat, Shiva kichi in leng hiai bhang zat nuam sa hi chi uhi. Hindu siampu Shiva adia kipekhe te’n Ganja akipat a kibawlkhia khamtheih nak hih mahmah uhi.

Singtangmi Khristiante bangchi? :
Tuni ka facebook newsfeed ah ‘Holi’ toh kisai advertisememt khat leh nih ka mu a, aloutheilou a hindu lawm khat leh nih ka neihte lah follow lou kahihchiang in, ‘Holi’ toh kisai post ka mu kei hi. Ka muh sunsunte ahih leh singtangmi Khristiante post hong hi daih mai. Na ka sa tuntun hi. Moh sa in leng ka dem tuan kei a, hilehleng ahihna uh leh azuihpa uh leh Khristian kichi omzia thei ngellou uh ahihziak hidi’n ka ngaihtuah hi. Huai ahi hia, ahihkeileh, lungsim zau pu a kingaihtuah ahihziak uh leng hithei hi. Bangteng hileh, Romete 14:5 a i muhdaan in, i lungsim kitheihchet poimohdaan gen hi. I thilhihteng i lungsim a kipan ahihziak in, i thilhih leh omdaan pen aziak om tangpi sek a, i lungput kepbit poimoh ahihdaan leng Paunakte 4:23 ah imu hi. Aziak pen i lungsim kisuut leng kithei chian ding hi. Khristian kichi ihih leh, ni leh hun i zatte, i nek leh dawnte ah kipaak a, bangkim a Pathian pahtawi dingte ihi uhi. Hindu sahkhua in omzeneitak a kut alopte khong va kithalawppih luat in Pathian pahtawi kha mahmah lou ahi chih thei ni.

Singtangmite’n Pathian Hing i biak ma ua, i pu-pa thugousiah leh tawndaan, Khristian hinkhua toh kituaklou i paihkhiak ding ua kilawm tampi om lai a, sahkhawdangte tawndaan va kithalawppih kei leng chih huai mahmah hi.

Holi bang ahia? Bangziak a Hindute’n lawm ahi ua? Bang chibang a lop hi a chih itheih poimoh hi. Ahihna bangtak leh omzia thei hile’ng, hichibang kut lopna a ei Khristian kichite telvual hilou ihihlam kithei chian ding hi. Khristian ihihna lah i suan mahmah khat ahihziak in, Pathian hing bia ihihleh, pathian hing beloute omdaan, chiindan leh nopbawlna khong a iva tel veu uh puaknat huai kasa mahmah hi. I ki siamtanna in, ‘a pathian uh va bia lah kihi lou a,’ i chi kha maithei, hilehleng, Kolossate 2:8 ah, ‘Pilvang un, huchilou in zaw kuapeuh in Khrist thu bang hilou in, mihing thugousiah leh khovel thubulte bang zaw in a thupil uh leh khemna peuh in gallak in a hon lakha ding uhi.’ chih imu hi. I laisiangthou mun tampi ah khovel mite tawndaan zui lou a, Pathian deihdaan zon ding chih tam petmah leh leng, khovel thilte i lunggulhna uh hih buchin i tel zaw mun mahmah uhi. Poi lua.
A haat zou bukim, Pathian’ thu zui bukim zou ngei ding hikei mahle’ng, tupna toh niteng a, omzeneitak a Jesu Khris’ nungzuidingte ihi uhi. Piangthaksa hi a, Jesu Khris i Lal leh Kumpi a sang ihih leh, bang dia Pathian lem bete tawndaan leh noptaalna khong hichi pahtaat lai tel ihi di uh? I Pathian kizuak sansan tel di ihi uhia? I mangbatni a lah ‘Pathian, Pathian’ chi a, a panpihna deih a delh tuntun hang a. Pastorte leh Pathian mizatte bang sam zen a kithumsak hang a, huaikhitchia, phur dan dungzui a, a hun in hon puakkhiak chiang a, ut leh dah a omzel. Pathian Hing aminpu a bia a, ama chihlouh dandan a kilehlak tak a om zel hang a, si lah hilou hing minpu a hinkhua i zat sek uh lamdang hiallou suak hiveh aw. Kisuanlahna le neizou nawnlou ihi uhia, Pathian tungah? Pathian leng lauh ding a le ki en nawnlou hia? I hichih un Pathian thangpaihna sukha zaw ahihlam leng theizou lou zen ding a ngong gawp i hita uhia?
Sam 81:12
Huchi’n a lungtang uh genhakdan bang zel a om ding in ka khahzamta ahi, amau hoihsak bang a a om na ding un.
Hiai i Laisiangthou tel a i muh in agen ahihleh, Toupa’n hon gengen a, ngaikhe utlou bilbel ihih dan uh kimu hi. Pathian’ sang a thei zaw, pilzaw kisa a, Pathian thunuai a ompeihloute zaw, Ama’n le khahzammai sek hi.
2 Timothi 2:12  ah kigen chiangmahmah hi: ….Amah i ki theihmohbawl leh Ama’n leng hon kitheihmohbawl ding hi;
Huchi himah leh, I Pathian pen mihingte bang a thulimlou hilou a, ginom Pathian ahihziakin, Kisiik a Amah kiang izot leh, honna pom a hon khek ding in mansa gige hi.
2 Timothi 2:13
Eite muanhuailou in om mahleng Amah zaw muanhuai in a om gige hi- Amah leh amah a kitheihmohbawl thei ngal kei a.

Johan 12:40 hichi’n imu hi:
Ama’n a mit uh a hihtaw a, a lungtang uh a hihkhauh a; huchi lou in zaw a mit un a mu kha ding ua, a lungtang un a thei kha ding uh, huan, hong kihei nawn kha ding ua, ke’n amau ka hihdam kha ding hi, chih, a gen nawn ziak in.
Hiai mun kava simkhak chiang in, lungsim nuamhetlou in ka omsek hi. Huchi khong a omkhak ding ka lau mahmah sek ziak in kei leh kei kana kivel zel a, kisikna
ding ka na nei veu zomah hi. Mihing lam a i ngaihtuah mai inleng, deihlouh/pampaih a om pen nalua ahihmanin ah, Pathian in hon deihlouh khak ding ka ngaihtuah chiang in ka diip bang a hawm hial sek a, lauh in kalau hi. Ahuchih ziak mahtak in ka kibawl bawl hi. Gingtute hi akibawlbawl di mah leng ihi a, Amah i hondampa suun deuhdeuh ding a niteng a i khros kipuak a, ei kimangngilh a Ama’ khekhap zui ding a deihtelna bawlkhin, piangthaksate ihi uhi. Mangngilh kei ni. Sahkhua dangte leh khovel thugousiah leh tawndaante ah kibuaisaksak nawn kei ni. Pathian hing bia kichi ihih leh, chih taktak a i biak takzet ding ahi. A huchih keileh, bia kisa tawk le’ng le, be kha mahmah lou kihi thei hi. Zekai law thei hi. Khovel nopsaknate ah kibuaisak lou in, i Pathian tuak ding a kisakkhawlna ah buai zaw ta ni (Amos 4:12).

Thukhitna:
Khovel paidaan khat ahih leh, kut khatpeuh hiam, Ni poimoh hiam, lohchinna hiam lop ahih himhim chiangin, a nop thei pen a lop ahihtheihna di’n khamtheih/guihtheih khat bek zat in omsek hi. Hiai hi Pathian hing beloute tawndaan leh ngeina seh khat ahi. Holi lopna ah leng Bhaang azat lam uh i gen khinta hi. Khophawklou zen in nuamsa ua, ataktak gam akipat in suangtuahna a bawltawm dinmun lam ah taimang zual in ahun uh zangbei uhi. Mite’n hiai ni in khawphawklou zen in bhaang kham mah le uh, ani zoh in hih sunzom nawn hetlou zel uhi. Nnasep, nekzonna leh niteng hinkhua ah buai in, hinkhua angeina bang in zang nawn uhi.
Ei singtangmi Khristiante ihih leh, ahunchiang theiloute ihi ua, khamtheih leh zu chihkhong azat leng i siamkei diak uhi. Azat siamlou, kideek siamlou iki chi sek uhi. Lamdang mahmah hi. Aziak bel, zat leng i zat ding uh hilou hi. I Pathian uh Siangthou Pathian ahihziakin, en leng kithoihna hing a i pumpi lan a i siangthou hon lamen hi. ( 1 Peter 1:16; Romte 12:1)
Pathianni chiang a biakiin kai diamdiam, apoimoh chiang hiam, nitak chiang hiam a zu dawn zel tamkhop om uhi. Hiai toh kisai in, I Laisiangthou mun khenkhat kon taaklang thak ut hi:
1 Peter:1:13
Huaziak in, nnasem ding a lungsim a mansa in om unla, pilvang un. Jesu Khrist hong kilak chiang a na kiang ua piak a om ding, hehpihna ah na lametna uh abukim in nga un.
1 Peter 4:7
Himahleh, thil tengteng tawpna tuh a naita, huaiziak in na thum theihna ding un lungsim diktak pu in pilvang un.
1 Peter 5:8
Pilvang unla, limsak un; na melma uh Diabol, humpinelkai humham bang in a nek theih ding zong in a vial vakvak hi;
1 Thessalonikate 5:6
Huaiziak in, midangte bang in i ihmu kei ding uh, hak ni in, limsak zaw ni.
Ephesate:5:18
Huan, uain kham in om kei un, huai ah tuh kideklouhna a om ngal a; Kha a dim in om zaw un
Paunaakte 20:1
Uain muhsit hat ahi a, zu khauh kilai hat ahi; huan kuapeuh huai a paikhial a pil kei hi.

Laisiangthou mundang hon koihkhiak beh kei mah leng, hiaiteng kia inleng a gen kim hi. Zu leh khamtheih kham kawm a pilvangtak a, melmapa dou ding chih zaw thil hithei hi hetlou hi. Khamtheih leh zu a dim a, Khasiangthou in bangchi hon luah dim di eita?
Khamtheih leh guihtheih lunglut Singtangmi Khristiante ihi uhi. Puaknathuai mahmah kasa hi.
Toupa Pathian i tung uah zahngai sunzom henla, Khristian chih minput kia hinawnlou in, atakgam ah, athu tampi itheihsate hinpih a, kikhek a, kibawl ngam ta dingin utna leh hatna, Jesu Khris min in hon pe chiat hen.

– Chingngaihlian Tunglut

March 10, 2020/ Article No.17

(Laigelh toh kisai kupbeh nuam a om leh, +919892316430 ah thuzaak theih diing hi.)



3 Comments

Avatar
Mankhanlun Hanghal
March 10, 2020 at 4:07 pm25

Na thu gelh dik in hoih mahmah e Lian

Reply
Avatar
Stephen C Guite
March 13, 2020 at 1:46 pm25

Hoihlua 👍

Reply
Avatar
Jamesmop
April 27, 2020 at 2:46 pm25

You have probably the greatest sites.

Reply

Leave a Reply

Your email address will not be published.

*
*
*

× Direct Appointment