NUNGZUI HINKHUA: TUNI ZIAK IN KIPAAK NI

Sam 118:24
Hia ni tuh Toupa’n abawl ahi a, huai ah i nuam un i kipak diing uh.

Tuni hun nuam in nuam ta kei leh, a huchihlam theitel dia i hinna hawisak a om lai ihi chihna ahi himhim hi. Tuni bawltupa’ thupina leh iitna phawkthak leh chiamkhathak lai zel dia sehte ki hi chihna hi nawn hi. Tua i gen teng kia in leng kipahna diing sim leng tampi omkhin hi.
Tuni manphat lam theilou diing zen a lunggim-lungngai a omkha i hih leh, Jesu Khrist lam a mit suan teitei ni, huai diing a tha i sente thawn lou ahihziak in ki zaangkhai tuam mahmah diing hi. A hon iitna suutthak sin mah leng maw; Gethsemane a athuakna mun bang va sim thak mah dih le! Khros lampi leh Kalvary lam mitsuan thak mah dih le! Panlakna dia thathak na ngah louh taak leh! I Toupa leng ana kap kha sam veh! Ei leng khovel a omlai ihih chiang in, i kah hun om mah tham mahleh maw, hiai leitung a i omsung a niteng hun tamzaw lungngaihna leh dahna a zangbei maite hikei ni. Amah thupina langsaktu dia hon siamna ziak pen tangtungsak ngei lou ana kihi kha den thei hi. KIPAHNA TEEL ZAW NI!
I tuni hun pen a omzia om ahi:
1) Amah pahtawina diing leh A thupina muhna diing a hunlem hon bawlsak ahi.
2) I na khelhnasa te a pat a kisiikna, suahtatna leh damna, leh ngaihdamna pia leh sang diing a hunlem hon piak ahi.
3) I mabaan diing tungtangthu a Amah muan kisinna ding a hunlem hon piak ahi.
4) Ki enchian a, amasa sang a hoihzaw a Amah toh i kizopna puahphatna a pan la dia hunlem hon piak ahi.
5) I innkuante leh lawmte gentaklouh in, Khris a i unaute a diing a pangkai i hihtheihna dia hunlem hon piak ahi.

Tuni bawltu Pathian in tuni a i kipahna leh nuamna diing simsenglouh toh leng hon pekhawm hi. Tuni a Toupa hoihna, thupina leh zahngaihna tampi i tante phawk utlou a om ihihleh, Amah aw za utlou a, lungtang khauhsak ki hi kha thei hi (Hebrute 3:15). Kipahna di leh thathak laakna di hon bawlsak tampi om ahihziak in, huaite hu-ngaih a, saang a, zangkhe thei diing in pan la in kisa thak ni.

Jesu Khris mitsuan kawm ni maw, lawmte!

– Chingngaihlian Tunglut
May25/2020_NH_A/09



One Comment

Avatar
Cis Vualnam
May 30, 2020 at 1:00 pm23

Ahi lua. Thupi mahmah ei

Reply

Leave a Reply

Your email address will not be published.

*
*
*

× Direct Appointment