NUNGZUI HINKHUA: KA HINKHUA A LAISIANGTHOU MANPHATNA

I Hondampa, I Toupa Jesu Khrist in hon sinsak thuumna kei mimal a kana suutna a ka theihkhiak khat ahihleh, I khalam hinkhua adia poimoh ngen toh kisai thuumna ana hi chih ahi. ‘Niteng ka nekhkop uh ann hon pia in’ chih bang, niteng salam ann ngetna in kana zang zel a, himahleh salam ann sangmah in khalam niteng ann nekkhop ngen dia hon sinsak hizaw diing in ka gingta hi. Aziak ahihleh, a dangteng leng Khalam poimoh ngen toh kisai ahi hi. Tu’n bel niteng ann nekkhop hon pia in ka chih chiang in khalam niteng ann nekkhop ngetna in ka gen hi zel ta hi.
Amah kepna ziak liauliau a niteng salam ann nekmuh buailou diing a dinmun bawlsak a om tadih kahihziak in kipahthu ka gen seng kei hi. Huai ka chih man in, poimohna toh niteng salam ann nekkhop diing ngetna a zangte leng limsaklou diing in Toupa lungsim neulou a, a khut leng tom sam lou hi. I poimoh bangkim ngetna ngaikhe gige Pathian I neih ziak in, A min thupi ka phat ahi. Niteng ann nekkhop I nget chiang in khalam ann nekkhop diing leng ngen khawm zel ta ni.

Sa a omlai I hihman in, niteng in salam ann I taksa in a poimohzah nekhe kei le’ng, I taksa damtheilou dia, zawngkhal dia, bahse dia, a tawp chiang a damzou nawnlou a leng ki om khong thei hi. I sapum a di’n salam ann poimoh mahleh, I hinna ding a salam ann kia poimoh lou a, Pathian kam a suak thute mah poimoh zaw ahihdan I Toupa Jesu Khrist in Matthai 4:4 na ah hon na hilh hi. Huai ahih ziak in, niteng khalam ann (Pathianthu) I nek keileh, khalam a zawngkhal leh bahsia a ki-om diing chihna himai ahi. Huai ziak in, khalam a bah leh chau I hi chih I kitheih leh, Laisiangthou sim a suut kipat nawn hunta chihna ahi. Laisiangthou sim ngei lou, lah I bah chiang a va sim zual a I khalam thakhat pi a hong hat zot dia I lamet leh, lamen khial ki hi diing ahi. Ni tampi a diing ann ni khat a a lompi a kine zoulou a hihman in, niteng a ngeina bang a nei a niteng nekkhop nek kisin poimoh hi. Huchilou in zaw, I mihing lungsim utna mai a khalam hatna di thakhat a alom a ngah kilamen kha diing I hi.

Mimal tak a, ka hinkhua a Laisiangthou manphatna point 3 k’on share diing:
1) Laisiangthou in hon gahkhe sak: Johan bung 6:53-54 ah Jesu Khrist in Amah sapum pen antak ahi a, huai antak nete kia in hinna nei uh ahihlam ana gen hi. Johan bung 1 chang khat in Pathian leh Athu pumkhat ahihdan hon hilh nawn hi. Huaiziakin, ann tak (Amah) ka nek chiang in amah ah ka om a, Amah leng kei ah om chih ka thei hi. Johan 15 a I muh mahbang in Amah kei ah a om a, kei Amah ah ka omleh, Ama’n hon deihbang in ka gahkhe thei zel hi.

2) Laisiangthou in ka Lampai diingdan hon hilh: Niteng hinkhua ah thil tuamtuam I tuak zel a, midangte toh I kikal bang ahihkei leh dinmun tuamtuam bang I pal tou zel hi. A khenchiang in, lung hon buaisak thei diing thil kituak a, a khenchiangin, thupuukna laak diingdan haksatak toh I kimaituah hun bang hong om sek hi. Huai I thil tuahte dungzui a lungsim put dingdan leh thupuukna I bawl diingdan, I laisiangthou ah om vek ahihziakin, Khasiangthou in huai toh kituak in hon pii zel hi. Sam 119:105 ah “Na thu tuh ka khe a di’n khawnvak ahi a, ka lampi a di’n vakna ahi.” Chi a chiangtak a ana gen mahbang in, kei khamtawk a Laisiangthou a kibulphuhna di’n Khasiangthou in hon pii hi. Huchilou hileng chu vakvai leh gammang gawp di’n ka kingaihtuah hi.

3) Laisiangthou ka limlang ahi: Jacob bung 1 chang 23 leh 24 ah Laisiangthou, Pathianthu I limlang ahihdan ana gen hi.
Laisiangthou ka sim chiang in ka chitlouhna, ka haatlouhna leh Pathian ka iit zohlouhnate ka kimuchian deuhdeuh hi. Ka hihna ka kitheih chian semsem chiang in Amah Pathian hihna ka theichian semsem hi. A hon iitna, a hehpihna, a zahngaihna, a hoihna, a ginomna, a thupina leh a lauhuainate bang amasa sang in ka thei thuuk zaw deuh zel hi. Huaiziak in Amah lou a khosa zou mahmah lou, hingzou mahmah lou kahihlam ka kiphawk semsem a, Khasiangthou panpihna toh Amah lam ka delh tuntun zel thei hi. Laisiangthou in ka chitzohlouhnate hon phoulaak semsem leh Amah thupina ka mu semsem hi. Toupa’n A thupina hon muhsakna di’n ka chitlouhna leh taaklouhnate hon kimusak zel ahihziak in Toupa hon iitdan amasa sang in ka theihbeh zaw zel hi. Toupa hoih hi. Toupa thupi hi. Toupa mah kingaknataak pen hi.

Jesu Khrist mitsuan kawm zel thei di’n Laisiangthou mah ah kibulphuh ni maw, lawmte!

-Chingngaihlian Tunglut
August 22, 2020/NH_22

(Laigelh toh kisai kupbeh nuam omleh, Laigelhtu +919892316430 ah thuzaak theih diing hi.)



Leave a Reply

Your email address will not be published.

*
*
*

× Direct Appointment