Hiai khovel i nuntakna a i sepna anuam chih sangin a haksatdan kigen tamjaw a, gen ding leng kinei chiat hi. Miteng i nnasep a kibang veklouh chih thei mahlehang ‘kei nnasep haksa diakse’ chih lungput kinei chiat sim hi. Ahi a, midangte sep sem hilehang huaimah kichi veve ding hi lim e!

Khelhna jiak a mihingte hamsiat a i omna “….Na damsung teng in gimtak a sem in a gah na neta ding” leh “… Na deihlam na pasal lam ahi dia, aman na tung ah thu a nei ding” chih khongte i ngaihtuah chiang in ‘haksa tuak ding mah kihi’ chih baihlam mahleh, tulai khovel kitaitehna leh khangtouhna a sangluat ziak in; gim hetlou a, sem leng semlou phial a muhbeh theihna om intuh lak baihsam mahmah leng hikha mah inteh! Pasalte gamtat leh khohei i deihlam ahihlouh chiang , amah thuthu aom gige leng chimtak huai chihleng baihlampi hikha ding hi. Khelhna jiak a hamsiat a i omna pomlou a, a baihsam lamlam a eimah deihtelna i juihzawk chiang in i innsung, vengsung, namsung leh gamsung chi damlou hi.

I chi damlouh jiak un i lakah khelhna a uang a “kuan khia a, namchih apan nungzuite bawl ding… Pathian in thu a hon piak tengteng zui ding a thuhilh dingte”.. i hihlai un mitam jaw thamte midangte kipalpaihna suang i suakzawta uh. Eilak chauh hilou in , khovel pumpi a mihingte laka thiltung ahihjiak in, khelhna leng khelhna bang a simlouhna khovel a om i hita hi. Ginglou mite thutuam in koih le’ng, gingtu khristian piangthak kichi tampite manthatna lamjuan in pai lellel uhi. Kong kawchik a lut tum teitei ding ahihlai in – tamtak te’n lut hamham sawm ua, khenkhat te’n haksa a sak jiak in lungkia in tawpsan ua, khenkhat te’n khekhap tamna lamlam jui dupdup uhi. Amaute’ tuh manthatna lam juan a pai himaimah uhi.

Huchih lai in tamlou chikte bel kong kawchik a lut tum teitei in, khovel dan bang a omlou in, Pathian deihlama hoih leh, lungtuahhuai tak leh hoihkim aom i sawm ua, kong kawchik a luttum teitei i hihman in, a chang in haksatna tampi i tuak hi. Gim tampi thuak in Pathian gam i lut ding ahi him ahi. Bahlou hial a i pai theihna ding in ginna a mihangsan – Joseph, Daniel, Mosi , Elijah , Baptist pa’ Johan chihte a kipan sinlai i neithei hiam saulou i ensuk lai ding.

Joseph in a pa deihsakna tangmahleh, a pianpih sanggamte’n a hazat jiak un Ismaelte khut ah dangka sawmnih a juak in aom a, Aigupta ah suak/sikha hi ding a pi in a om hi. Himahleh Joseph in aomna peuh ah a Pathian a beel a, a Pathian inleng a taisan ngeikei hi. Ngawhna diklou leh kitheihmohbawl nate tamtak tuak in, milim bia mite lak a khosa den himahleh a Pathian adia ginnom in, chitak leh muanhuai tak in dingkip den hi. Joseph hinkhua bangbang Daniel hinkhua ahleng tung hi.

Laisiangthou a Daniel hong kilat a kipan Babulon-te suak hi khinta ahihman in, a dinmun a nuamkei hial ding. Babulon mite’n Juda mite hua mahmah ahihjiak un leh milim bia mite hi jomahlai uhi. Himahleh Daniel in a omna mun – mun nuam leh lau huai na ahleng Pathian a kitheihmohbawl ngeikei a, Pathian in leng a taisan ngeisam kei hi. A valnou hinkhua Toupa kiangah pekhia in, a omna peuh ah a vaak taangsak in, hiai leitung a nuntak sungteng a biak Pa’ Pathian a di’n ginom a, chitak in muanhuai den hi.

Mosi i et a ahihleh, kumpi hauhsakna kinungheisan in TOUPA sapna nna a sem hi. A nuamkei hial ding, Kumpi hauhsaknate kikoppih theihhial ding ahihlai a a mite toh sikha a omkhawm ding a kumpi inn pawtkhiak san chih! Huaiteng kia in a beikei, TOUPA sapna bang a nna a sep lai in, a makaih Israelte thumanlouhdan, phunchiak dan , helhatdan i thei hi. Haksatna gen ding hileh Mosi gen ding naaktam na’n chia ka chi hi. Himahleh TOUPA thupiak bangin Mosi in a Pathian thu mang in, a deihlouh dan inleng a nungta ngeisamkei hi. Pathian inleng Mosi a ompih tawntung hi.

Elijah hunlai ngeileng Pathian hing biate ading a hun haksatak ahi. Miteng phial in milim a bia in, kumpipa Ahab leh kumpinu’n leng Pathian dan kalh in a gamta ahihman un, Elijah dinmun mialtak a khosa ahi i chi hi. Kumpi Ahab ngialhouh gilou mahmah leh Pathian hehsakna thilhih tungtuang mi ahihjaw mahlai! Ginna tellou in Baal siampute toh a kibeihna tuh ngam vualding ahikei. Elijah hun haksatak ah ding mahleh Pathian mel taanvaktu ahi gige a, Toupa’n leng a taisan ngeikei hi.

Baptist pa’ Johan inleng a hinkhua ah haksatna tamtak tuak hi. Jesu Khrist toh hun kibang phial a khovel a nungta himahleh thudik jiaka a suangkul a khum in aom a, ngawngtan in a om hi. Vualleltak in a hinna bei chih theihding bangmah leh, a damsung in a pianna san leh Toupa’n a sapna nelhsiah ngeilou in semsuah hi. Toupa’n Johan a ompih tawntung hi.

Eite’n suanlam ding i nei tuankei hi. A tung a tamlou i gente leh i genkhaklouh tamtak omte’n Jesu Khrist a gupna jiak un haksatna leh gentheihna tamtak a na tuak uhi. Lungkiatna leh genthei kisakna a nei tham ding uh – mihing mah ahihziak un. Himahleh Pathian Itna a theihsiam luat jiak unleh, a chian luat jiak un a pangteitei uh ahi jaw hi. Eite leng khang giloutak lak – milim biakna, bumna, huatna, kinakna, hazatna, hehna, kilanna, omtuamna, gintuamna Deihgohna, tualthahna, zumun nopna, zukhamna, hukna leh thangtatnate tam mahmah na muh ah i khosa lel uhi. Khelhna leng khelhna bang a ngaihlouhna mun a om i hihjiak un haksa mahmah hi. Himahleh Toupa’ hon Itna lamdangtak mai kitheihmohbawl theilou i hihman in, kong kawchik a lut tum teitei in nisim kal i suanjel ding uhi. Toupa’ ah om gige ni, Ama’n a hon limsak gige jiak in. A hon ompih gige ding hi!

[Gen.3:16,19 ; Matt. 7:13 14:1-12, 28:19‭-‬20 ; Rom.12:2 ; Nas. 14:22 ; 1 Kum. 16-19; Exo.1- 13; Daniel 1; Gen. 37]
01/03/2021

Leave a Reply

× Direct Appointment