Lei chi na hi uh: himahleh chi peng leh, bang in ahia a hih al nawn ding? Paihkhiak a mihingte chilgawp loungal ding in, bangmah din a phatuam kei hi. Khovel vak na hi uh. Tang tung a khopi om selguk theih ahi kei hi. Min khawnvak de in lawh nuai ah a koih ngeikei ua, a koihna ah a koih zaw uhi. Huchi in insung a om tengteng a tanvak hi. Huchi mah bang in, na vak uh mi mitmuh ding in vak hen, huchi in na thil hoih hihte uh a mu ding ua, na Pa uh van a om a pahtawi thei ding uhi. – Matthai 5:13-16.

I Laisiangthou tangtel toh kisai aguhgel i theihsiamna ding in hiai thu tuh i Hondampa Jesu’n tangtung a anungzuite leh mipite kiang a agen ahi. Khristian khat kahi kichi a Khristian innkuan a pan khangliante ading mahmah in hiai thu in i hihna uh ahon muchian sak thei mahmah hi. Hiai Laisiangthou i simna uh tungtawn in bang dinmun ah i om a, ahihkeileh i hihnate, i omdante leh i gamtatdante ki-en chiat hileng bang dinmun ah i om diam chih ngaihtuah tham a ching mahmah hi.

Hiai a Jesu’n bangziak a “chi” (salt) gentehna a hon zang sese ade aw chih lungsim ah a honglian mahmah hi. I theihdan a dik i chi zenzen kei himahleh huai hunlai khong in ‘chi’ manpha mahmah hi ding hi. Greek mite’ ngaihtuahna dan in ‘chi’ tuh divine (Pathian toh kisai i chi hia, Sian hihna nei) in ana koih uh a; Romans te’n ahihleh huai hunlai khong in sepaih galkapte khaloh ding in ‘chi’ bang ana piak hun uh om ahi akichi hi. Sepaih amau mohpuakna zoulou te tuh hiai ‘chi’ (tuhun adia chi maimai) lohtak hilou dan in ana koih uhi.

A dikdik in kuaman ‘chi’ a vuak in i ne ngei kei uhi. Chi a kizatna ding a akizat khak chiang in amanphat dan a kithei a, a poimoh lam aki thei hoih mahmah hi. Tehkhitna genleng, meh ding a sa i huan chiang un chi omlou in alim lam aki theikei hi. Chi omlou in nektheih chitawk lehangleng chi alou theilou ahi gige hi. Chi manphatdan leh poimoh ahihdan hiai tan inleng a theihtheih hi.

I hinkhua uah bang poimoh pen in i ngaihtuah uh a? Ahihkeileh i niteng hunzatna uah bang awlmoh pen in i nei masa sek uh a? chihte ngaihtuah tham a ching lotel hi. Pathian phawk mite, Amah neimite i kichi sek uh a, mi’n piangthak lou na hi ahihkeileh Pathian thu-awi lou na hi hon chih khak chiang bang un i ngaithei kei uhi. Himahleh i hihna taktak uah Pathian mel muh ding a om hia? Mite’n bang hon chi theih uh a? Nang le kei mite’n bang hon chi theih uh hi in i kingaihtuah a? Mahni a i kidawngna utuh i hihna uh a hong himai hi. Hiai in Toupa toh i kikal uh (i relationship uh) a hon lak ding hi. Hiai mah tuh i kivelna masa uh hileh i chi hi.

I Hondampa Jesu Khrist gingta a, Amah a hotdamna nei kahi chi a lungmuang tak a khosa mite himahlehang i omdante uh, i khosak dante uh gingtu hihna, gingtu dinmun toh aki gam la mahmah sek hi. I hun tam zawte uh akizatdante ngaihtuah detdet hilehang mahni nopsakna di kia, kipahna di kia, lungnopna di kia, neih utna kia, hauh utna kia, a sang zaw delhna kia buaipih pen in i neisek uhi. Nikhat a hichih zahta a hun kihau a, Laisiangthou simna leh thumna hun a ding in bangzah i zang mah di uo aw chih ngaihtuah tham a ching nawn mahmah hi. Za a khat le a tung zou diam chih akitel hi!

I Weekly-Inspiration ana simsak gige a, i suah theih hunteng a tuate apan testimony hon share ding a om theihlai ziakin i kipak mahmah a Toupa min i phat ahi. I gen utpen ahihleh i thugelhte lak a atam zaw ah ‘hunzatdan’ toh kisai aki gelh khasek hi. Gen gen a le phattuam pihloute i hih lai tel ziak ua gengen kihi zaw a, ki awlmoh lou kihi le ki gen ngeilou zaw ding hi. Tua ahihziakin Toupa deihdan a i om ua hun i zat dik mah utuh gengen ding mah aki hi zaw hi.

Toupa hon sinsak ‘Toupa Thumna’ (Matthai 6:9-13) atheilou om mahmah ding in kagingta keihi. Naupang chik te’n leng hiai thumna tuh a theih masak pen uh ahi chileng gen khial ding ka ki gingta keihi. Hiai thumna ah ‘Niteng ka nek khop ding uh an honpia in…’ chih a om hi. Hiai a an kichi tuh tamtak te’n i taksa ua an vuak i poimoh pen uh dan in i lakha sek ua, tua vuak ana hipah kei hi. Mihingte’n nekding ann i poimoh bang un Toupa thu mahmah, Amah tanchinhoih mahmah niteng, hunteng a i poimoh pen uh ahi hi. Tua bang ahihlam theilou mah i hidi uam? ahihkeileh i taksa un apoimoh ann kia ngenngen mai i hi di uam? chih ngaihtuah tham a ching mahmah hi.

Toupa toh hun zangkhawm ngeilou, Amah adia hunle nei manlou leh thum ngeilou mite i hih le zaw dencia i ki sikna ding a hong tam mahmah thei hi. Khovel vak i hihtheihna ding un Toupa thute mahmah i theih uh apoimoh a, i sim ua i zak mun uh apoimoh hi. A theilel a hun hilou a tuate hin khiat pih a, azui mite leh Toupa deihdan ahinkhua zang mite i hih uh apoimoh hi. Mite’n i hinna uh tungtawn a Toupa hoihna, a thupina a muh ding uh ahi zaw hi. Toupa mel liahtu, Amah deihlouh dan akhosa a mite adia pukna leh siatna tungtu i hihkhak ding zaw ngaihtuah mai inle agen ahaksa hi.

Khovel paidan et in hoih lam anawt kei chih i thei chiat uh a, tua bang ahihlai inle siat theihna ding atam mahmah hi. Lamka khosung mahmah bang en leng khopi a siatna i gengente uh khat mahle a omlou, atunglou a om nawn keihi. Thilthak omle lah anei masa pen, thusia thuhoih leh thilteng akimna mun ahi ta hi. Huchi lak a khosa a om i hih tak ziak un eimah hatnate suang a i hunte zangzang lai mah ding i hi di uam? Toupa toh tonkhawm louh in zaw denciah i khial mahmah kha ding uh! Amah toh tonkhawm a Amah adia hunzat gige a hun lota hi. Khovel sia ahi kei a ei mihingte siatna a pum dim aki hihziakin eimah pilnate leh hatnate i suang in zaw denciang Toupa i mangngilh ding a, Amah i gam lat deuhdeuh kha ding hi.

Sihna in hon ngak den ahihziakin i sih nung chiang a tangtawm hinkhua ding ngaihtuah pen a nei in, tu ahun lai in kisa thak chiatni. Mite’n i hinna tungtawn apan Toupa thupina amuh semsem na ding un kisa thak chiatni. Khovel vak saktu i hihtheihna ding in Toupa mah ahi i poimoh pen uh chih thei in i omdante uh ki-en thakin Amah kiang ah kilan khe thak ni uh aw!

Toupa’n i thugelhte tungtawn in theihsiamna leh Khamuanna i tanchiat uah hon  piak i ngen a; theihna bukim louh ziak a i  gen khelh omte angaihdamna i ngen lailai hi.

  • Thangginom Hangshing

 (Laigelh toh kisai kupbeh nuam omleh, Laigelhtu +919615804759 ah thuzaak theih diing)

18th August, 2021 | Weekly-Inspiration – 81

Leave a Reply

× Direct Appointment