Galatiate 5:22-23 in a hon hilh mahbang in, iitna, kipahna, lemna, thuaktheihna, migitna, hoihna, muanhuaina, nunnemna leh kidektheihna chihte khagah ahi uhi.

Hiai a khagahte a hon gen ma zek in, Sawltak Paul in salam utna, khagah toh kikalhte ana phoulaak hi: Angkawmna, kingaihna, thanghuaina, huukna, milimbiakna, bumna, huatna, kinakna, hazatna, hehna, kilanna, omtuamna, gintuamna, deihgohna, tualthahna, zumunnopna, zukhamna chihte khawng ahi uhi. Huchibang thil hih chiingte’n Pathian gam tanglou diing uh ahihlam leng a gen hi (Galatiate 5:19-21).

‘Gah’ i chih chiang in, a suangkhetu om chihna ahi a; Haichi gah, thei gah chihkhawng in i theisiam hi. Huaiban ah, ta-le-nau bang leng gil a gah i chi sek uhi. Nnasep leh kuhkalna gah chih khawng bang inleng i theisiam uhi.

Gingtu i hihna uah, i gahsuah uh poimoh ahi chih i thei uhi. Huaiziakin, theihna kibehlapna di kia hilou in, khalam a i khanna a hon panpihtu di’n i sung a teng Khasiangthou gah bukimsaktute lak a, a nihna ‘KIPAHNA’ suut zek leng i chi ahi.

Khristiante’n i hinkhua a di’a tup leh ngim a i neih diing uh ahihleh khovel in hon piak kipahna leh nopsakna delh hilou in, Khasiangthou in ei ah sianthouna nna A sep thumangtak zuih a hizaw hi. Sianthouna i delh chiang in Pathian toh i kinaih sem a, huai in lungnopna leh khamuanna khovel in hon piak theih louh hon pia hi (1 Peter 1:2).
Khovel in hon piak kipahna ahihleh pawlam a hong kipan ahi a, Khasiangthou in a suangkhiak gah, kipahna, ahihleh sunglam a hong phuul khia ahizaw hi. Sunglam a hong phuulkhia kipahna zaw, Toupa a kipahna ahinaak hi.
Khovel a om i hihman un, i samitna alian kha pahpah hi. Khoveldan leh i salam in a phawkdan a kipaaktak leh lungsim thoveng a om diing chih khawng thupipen a i koih chiang un, huai bang thil hitheilou ahihna ah, ningkitelna in hon pumbuah zel hi. Huai phetlou in, i thil muhdan leh laakdante a selam in hon kheksak a, lungkimna tampitak tasam dan in hon kiphawksak a, dahna leh nguaina diing kihau mahmah sek hi.

Kipahna diing neilou kuamah ki-om lou a, i deih tentun i neihlouhte i ngiat ziak ua kipahna chaang theilou i hizaw uhi. I neihlouhte leh thilhoihloute i phuutkhak zekte kia phawk a, i neihte leh thilhoih i tante i theih utlouh ziak a dahna diing ngen mu kihizaw sek hi. Kipahna diing himhim neilou bikbek kichi Khristian i hihleh, Jesu Khrist’ tatna, i kipahna hong kipatna leh a bukimna ahihlam suutthak mah ni. Khialsa a piang, hoihna khat lel leng neilou, bangmah hilou, taangtawn gawtmun a mangthai diinglai, huai tatna thupi ziak a, taangtawn Hinna leh Pa innsung a sunglai tang a, A gou luahtu diing a hon teel a, Ta hihna hon pia Pathian’ iitna tungtawn a A hehpihna leh zahngaihnate ziak in i kipaak kei tel a maw? (Johan 1:12 ; Romte 8:17).
Khovel thil leh khalam thilte a kibat louh bang in khovellam a kipahna leh Toupa a kipahna kibang hetlou hi. Toupa a kipahna pen khovellam thilte ah muh sawm sek kihikha zaw hi. Pathian a kipahna bel khovel dinmun ah kinga lou ahi chih i theih uh leng poimoh hi.

‘I shall know Him/Mel in thei ning’ chih la phuaktu, Fanny Crosby, (March 24, 1820 – February 12, 1915)  in Laa 9000 lam tak ana phuak hi. Amah ahihleh, naungek kha 2 lel ahihlai in damlouhna khat ana nei hi. Doctor kibawltawm (quack) khat in ana etkol khak ziak in, damkhe mahleh, damsung daih diing in a mit del kholoh hi. Nikhat, Pathianthu gen khat in Fanny kiang ah, “Toupa’n siamna hiaizah hon pia a, na khomuhna hon piak louh poi kasa lua” a chih leh, ama’n “Kei teel theih bang hileh, mitdelsa a pian teel diing kahi, huchileh, vangam ka tun chiang a ka muh masakpen ka Hondampa mel hi diing hi a” chi’n dawng hi. Fanny Crosby in a khomuhtheihna pen a Tanpa muhna diing ahihziak chauh in thupi leh manpha in koih hi.
Huaibang a, dinmun leh tan bangbang a lungkim chihphet louh, Toupa toh kizopna leh Toupa muhna diing ahihziak a dinmun/tan hoihlou a i koihte uh i tan chiang ua kipahhuai sa bangzah i om diing ua?
Huaiziak in, ‘Toupa a kipahna nei’ i chihte chu, khovellam leh salam a dinmun hoih leh tanhoih tan ziak a kipaakte hilou ua, Toupa toh ton a, Toupa toh kizopna hoihtak a neih ziak ua kipaakte ahizaw uhi. I kipahna veelchian mah ni.

Keilam leng tamlou hong kigen zual leng:
Kei ngei inleng mite muhtheih leh theihtheih di’n bukimlouhna leh kisapna hunkhop ka nei hi. Himahleh ka Tanpa toh ka kituah nung zaw, ka bukimlouhnate leh ka poimoh a ka koih lah ka neihlouhte’n Toupa mel hon muhsak kia hilou in, hon muchiansak semsem ahihman in bukimlouhna manpha kei a di’n a suak uhi. Huaiziak in bangkim ah kipahthu gen ka sin tou zel thei hi (1 Thessalonikate 5:18) .
Jesu Khrist i neih naakleh, poihlawnna, piansualna, taksa leh lungsim a bukimlouhna hi’n mihing tamzawte paidan zuikha geih loute tengteng tel in (zi/pasal neiloute bang, ta-le-nau neiloute bang), Amah ah bukim vek kisuak hi. Halleluiah! Toupa tung a kipaak lua hang! Bukimtak a piangte a di’n hong si a, sa leh lungsim a poihlawnna neite a di’n leng si hi. Huaiban ah, sadan zui bukimloute adi’n leng hong si hi. Deihsaktuam leh khentuam neilou Pathian i neih ziak in Toupa min ka phat ahi (Romte 2:11)Matthai bung 7 a agen mahbang in, i bukimna in hon khelhsak leh, omzia neilou a, “bukimlou a vangam luut hoihzaw ahi” ana chi hial hi. Bangchituk in taksa ah, salamdan ah hi’n khovellam ah bukim in, neih leh lam zat senglouh in hau in, mite tung ah leng mahleng, Toupa Jesu Khrist bei in zaw bangmah i hikei ua, i thupina un tomchik lel daih hi.
(Johan 15:5 ; Sam 103:15 ; Jakob 1:10)

I taaksapte hon petu Pathian ahihziak in, bukimlou i kisaknate i taaksap hilou chihna ahimai hi. Pianken a mi toh i kibatlouhna, salam a i bukimlouhna, sadan i na zuihkim louhna, i na khantouhdan leh i neihlouh leh mansuahte tengteng (naupang chikchik a meithai leh pagong a koppih dang zong tadihloute tel in) Toupa Jesu Khrist i neih chiang in, sa leh kha in i bukimta a, a kisam om nawnlou i hihziak in, sunggil tak a, Toupa a kipahna nei in, bangkim ah kipahna i sin theita uhi. I deih a i neihlouhte kia ngaihtuah a, Toupa’n hon piak kipahna di tampi i neihte mulou zen in khovel’ tehdan a hon bukimsaklou thilte lenkip nawn kei ni.
Gingtu i hihna a akilangkhia khat kipahna ahihman in, “Setan in i neihlouh leh i bukimlouhnate tungtawn in i kipahna hon suhsakna di’n pan la nasa mahmah hi” i chi ngam hi ; i hotdamna hon hihmangsak theilou ahih chiang in, i kipahna bek hon suhsak dia enlah guigui hidiing hiven.

Toupa Jesu Khrist i neih leh kibukim a, bangkim nei kihi ahi. Amah i neihkei leh, hiai bukimlouhna khovel ah, lungkimna leh kipahna taktak leh kipahna bukim kimu ngei tuanlou diing hi. Hiai thudik mi tampite’n i chianta diing unleng i gingta hi. KhoveI kipahna delhna in, i damsung sawtlou chik, kaat leh leikha in a neeksiat diing lel thilte a poimohtan khel ah buaipih nawnkei ni. I tangtawn Van inn diing ah, a mangthaitheilou, a setheilou leh a tultheilou i gou khawlkhawm in buai zaw le’ng Toupa a kipahna lei ah leng i nei di’a, taangtawn toh kizom tou lai diing hi.  (Matthai 6:19 ; Johan 4:14)

Bangkim a kipaak diing a kichiil i hihman a, i gimthuaknate uh gen mang leh gen neep sawm i hikei hi. Huai toh kisai in, i Counselor lamdang, Toupa Jesu Khrist in, “Ni khat a di’n nikhat gimthuak a huntawk”  A chih ngaikhe ni. Ni khat gimthuak i zoh chiang un, i hih diing hih khin chihna i himai vele! I gimthuakna pen Toupa’n A phal ahi a, ni in hon tumkhum leh tuni a di’a thuak mualsuah phot kihi zel mai ahihman in, i kipah diing uh ahi. Toupa’n hon theihpih kia hilou in,  A gente zuikha i hihman unleng i kipah diak diing uh ahi. Pathian i lauhna in thumanna lampi ah hon pii a, huai thumanna in i kipahna guitungsak hi chih chian khin gingtu hunkhop i om diing unleng a gintathuai hi.

Philippite 4:11 ah Sawltak Paul in a gen mahbang a, bangkim a kipahna sinthoh diing ana hi petmah ahi chih thei in, kisin zel di’n mailam a pan latou zel ni uh maw!
Gahkhethei diing in thumanna mah piibawl ni!

Jesu Khrist mitsuan kawm ni maw, lawmte!

-Chingngaihlian Tunglut
May 23, 2021/NH_22

(Laigelh toh kisai kupbeh nuam omleh, Laigelhtu +919892316430 ah thuzaak theih diing hi.)

Leave a Reply

× Direct Appointment