Pa aw, Ka khovel uh ka en ua, lungziinhuai kasa mahmah uhi. Hiaibang a lungziinhuai ahihlai in, lamdangtak in na hoihna leh Na nnasep hoih ka muh zel ziak un, Na Min thupi k’on phat uhi. Thilhoih na hihte ziak in ka lametna uh na thaksak zel a, nang muan non sinsak zel hi.
Hiileng ziak in natna leh sihna in hon kiimvel hi. Ka iit leh ngaihte uh ka suun sunzom zel ua, mangbatna leh dahna in ka dim zel uhi. Theihsiam haksa ka sa ua, khasia in ka om ua, lauhna leh khaphanna in hon pumtuam zel hi. Hehnemtu Pathian aw, k’on ngai uhi, Toupa!
Na khamuanna ahunhun in hon tunzel in aw, Toupa ka Pathian! Ka haatkei ngei mai uh! Na haatna in hon thuamthak zel in aw, hihhaatpa Pathian aw!
Toupa, langkhat ah natna leh sihna in hon kimvel lai in, langkhat lam ah, ka khotaang hinkhua uah leng, siatna leh khelhna simsenlouh in hon tuum lellel hi. Taksa damna ka deih lailai un, a poimohzaw khalam damna hon tun in, Toupa! Na hihharh thakna ka ngai uh!
Toupa aw, na zahngaihna nelhsiah lou a, na hehpihna nengniam lou a, na iitna ngeingaih thei di’n ka lungtang taakte uh apoimoh bangbang in hon khettap sak in!
Toupa aw! Nang a bu mite adi’n zaw siatna leh sihte ziak in gimthuak sek mahle ung, gim leh bah in lauhthawnnate natawm in hon pei hai phialphial sek mahleh, nang lam a mitsuan n’on sinsak zel a, huchi in, ka dahna uh leh bahnate uh tung a vaihawm na hihdan non phawksak zel hi.
Thutawp gen diing nang mah na hihlam non phawksak a, thuaksiam leh pomsiam non kisinsak zel hi. Na hehpihna tawpngeilou ziak ahi a ka kipaak uh, Toupa aw, Na iitna hon phawk sak gige in.
Ka sih ka hin ua, nang a kahi uh, Toupa! Na iitna akipat bangmah in hon khen lou hial diing ahi chih leng ka theih man un, ka kipaak petmah ua, khamuanna ka ngahthei zel uhi.
Toupa, ka Pathian, mihoihte tung a le vuah zusak a, migiloute tung a le vuah zusak Pathian na hihman in, na lemgeel theisiamkei sek mahle ung, nang lemgeel toh kituak ahihman in na Min thupi thouthou hi. Koute’n ka hatlouh ziak un hon pahtawi zoukei sek mahle ung, nang leh nang ahunhun a n’ong kipahtawi ziak in ka kipaak ua, na Min ka phat uh ahi, Toupa aw!
A thuak chiatchiat himahle ung, Toupa, nang a muanna ngate kan a hampha a omkei uh chih kathei uh, a thuakna un omzia nei ahih kia hilou in, van gou kaihkhawmna leng ahihziak in na Min thupi ka phat uh ahi, Toupa!
Bangteng kikhek mahleh, nang akikhek ngeilou Pathian a k’on neih ziak un na vualzawlna thupitak tang khin kahi uh chih ka kithei ua, ka kipaak petmah uhi, Toupa! Nang ah muanna ngak hon sinsak zel in, Toupa, khauhtak in hon sinsak ke’nla, Toupa aw, na zahngaihna leh hehpihna ziak in nemtak in hon sinsak lailai in, Toupa!
Na hoihna leh iitna le kikhek lou, nang phallouh a bangmah tangtung omlou ahihman in, na Min ka phat uhi.
Omze neitak a non bawl kahihman un, khenkhatte a hinna uh atom ziak in, a omzia uh nep tuan lou hi, Toupa!
“Kei a di’n zaw hin Khrist ahi a, huan sih leng punna ahi” chithei sam diing in, na tate hon hihhaat in, Toupa, ka Pathian!
Toupa, hiaibang hun haksa ah, ka taksa un a muh, a phawk leh azaakte ziak in buaisek in, lungziing sek mahle ung, mit in amuh louh, bil in azaak louh leh lungsim ngaihtuahna in a suangtuah ngeilouh thilte, na iitte adi’a na gelkhawlsakte ziak in na kiang kipahthu ka hon gen uh ahi. Hiai lei ka nuntaak sung ngei ua leng huaibang a na thupina mudi’a lametna non piak ziak inleng, ka kipaak petmah uhi, Toupa! Nang leh nang hon kipahtawi sunzom in!
Toupa, ka Pathian, ka haksatnate lak uah hon taisan lou a, donlouh-dailouh leh keplouh a hon koihlou nahi chih ka thei uh, Toupa! Ka haksatnate uleh, ka buan leh sual lelte uh hon thuakpih a hon pal pih nahi chih ka thei ua ka kipaak uhi.
Toupa, ka Pathian, nang hon ompih nahihlam hon phawksak thak in, a thuukzaw sem a phawk beh di’n hon panpih in.
Khristian kichi a nang hon phawk ngelloute mahmah le ka lainat takzet uh ahi, hon phawng harh sak in, Toupa aw! Ka tung uah zahngai in! Na hihhaatna ka poimoh uh, Toupa!
Bangkim nang thuthu hihen.
Ka khelhnate uh ziak in na ngaihdamna leh hihdamna leng ka ngai petmah uhi.
Na khut muanhuai ah k’ong kikemsak uhi, ka Hondampa, ka Toupa Jesu Khrist min in, AMEN
-Chingngaihlian Tunglut 
June 5, 2021/NH_23

Leave a Reply

× Direct Appointment