HAKSATNA I TUAHTE TOUPA’N HON BAWL PHAT UTNA ANA HITHEI HI

Gingtute’ hinkhua ah thuakgimna leh haksatnate’n bang panmun nei hiam chih ngaihtuah tham a ching mahmah hi. Khatveivei i nopsakna di lam kia uh i kihilh khasek uhi. Haksatnate’ tuak lotham ding i hi uh chi a, tuate’ ahunhun a thuakzou ding leh Pathian a i kingakzoh gige na ding ua i kichil uh leng apoimoh mahmah hi.

A langkhat lam ah, haksatnate kia va gengen chih mawk chi’n dotna ei-le-ei mahleng i kidong thei hi. Nopsakna hun tamtak leh Toupa hoihna tampi i dong uh kipahna ding tampi a om tham hi. Himahleh tunia i gen ut pen chu haksatnate bangziak a kituak zel hiam chih ahi phot hi. A diak in Gingtute’ hinkhua ah kipahhun a kipahdan siamna, haksat hun a thuakdan siamna apoimoh mahmah hi. Kipahnite a ahun tan theihna, haksat hun, mangbat hunte aleng thuakdan leh puakdan siamna apoimoh hi.

I hunte uh a tangpi in buaitheihna ding leh banghiam haksa sakna hun atam zaw ahi khasek hi. Bangziak a tua bangte tuak khasek i diam? I tung a tuate bang hun leh bangziak a hongtung ade aw? chi’n ngaihtuahna pe zual leng i chi hi. Na thiltuah tunai zek a na tuah, haksa nasak hiam, buaihuai nasak om hia? Tuate’ apat bang na theihbeh a? Ahihkeileh tua te’n nang ah kikhekna hiam, kibawl hoihna hon tut a om hia? chihte’ ngaihtuah ding a om hi.

Sam laibu a Mosi in a thumna ah hiai bang in ana gen hi. “Ka dam sung kumte uh kum sawmsagih ahi a, ahihkeh, haatna ziak in, sawmgiat leng ahi thei hi; himahleh asawtna tuh buaina leh lungkhamna lel ahi a; amang nawn pah ua, ka leng mang uhi.” – Sam 90:10. Hiai ah Mosi thumna a i sim mah bang in mihingte damsung zaw buaina leh lungkhamna om toutou mah ahi chih i muthei hi. Himahleh i theih khelhlouh ding ua poimoh mahmah chu, tua bang buaina leh haksatnate’n kikhekna, thilthak muhna leh kibawl hoihna a hontun sek hi. Tua te pumpelh sawm lou a, tuate’ mualsuah sawm a panlakna in Pathian deihna bang in kisiam thakna leh kibawl hoihna a hontun zaw hi.

Mihing in ei mah buaina ding i kibawl khak uh tamtak leng a om tham hi. Tuate’ Pathian apat ahi i chithei vek kei hi. Keimah hinkhua aleng kana chepmun mahmah te lak a ka theihchian semsem tuh haksatnate tungtawn apan vualzohna, kibawl hoihna leh Toupa muh semsem na ahi sek hi. Mihingte’n kipahna hiam, nopsakna hiam i neih chiang un i omdan uh, i gamtatdante uleh i kho-heidante uh atuam pah khasek hi. Nuamsa den leh kipak taka omden ding kihi maizen le zaw Toupa phawk gige chih a haksa dia, amah mangngilh abaihlam mahmah ding in ka gingta hi. Haksatna tampi tuak gige a, tuate’n sihna tan hon tut hial ahihtak leleng Toupa kiang a hon pi luttu, Amah kiang i tung theihna ding uh ahihleh ka teel zaw lai hi. Nuamtak a om a, i Kha in tangtawn hinna a neihlouh ding puaknat huai kasa zaw hi.

“Huan, Toupa’n Aiguptate a vaw ding a, a vaw ding a, a hihdam lai ding; huchi in Toupa kiang ah a kiknawn ding ua, aman a ngetnate za in amaute a hihdam ding hi.” – Isai 19:22

“A gimthuakna in gimthuakte a suaktasak a, nuaisiah na ah a bil uh a honsak hi.” – Job 36:15

I Laisiangthou mun tuamtuam a i muh mah bang in mihingte’ thumanglouhna, sualna leh Toupa deihdan a om louhna tamtak i mu hi. Kipahhuai kasak mahmah leh, alehlam a lauhhuai kasak mahmah khat a om hi. Tua tuh, i Laisiangthou sung ah Toupa deihlouhdan a om mite’ Toupa bang a loh a? Tuate ziakin gawtna apiak a om a, tuate’n kibawl hoihna, Pathian lam a kik theihna lampi amau ah atuh a, kakipak mahmah hi. Himahleh tulai, ei hun a kalauh mahmah ahihleh, i Laisiangthou a Toupa deihlouhdan aomte’n gawtna atuahte uh i thei uh a, hichi’n om leng hiai suak di, Pathian deihlouh dan ahi chih thei gegu himahleh tua bangte i theih nung ua adiklou leh ahoihlou a i om teitei lai khak ding uh lauhhuai kasa mahmah hi. Toupa i tung ua zahngai gige lou thei a, i hinna uh leng tua bang a damtak aom gige lou thei ahi chih i mangngilh louh ua, Pathian deihdan a hinkhua i zat uh apoimoh mahmah hi.

Danial te lawmta, Shadrach, Meshach, leh Abednego te tanchin lungsim ah hong lian mahmah hi. Amaute bang a haksatna maituah ding om hita leh tua bang in i om ngam diam? chih dotna liantak ka nei hi. Khovel paidan et in hoihlam sang in siatlam a manoh hiaihiai a, vaigam khong akhosa a om te’n tua i khosak dan uleh Biakna i neih bang hun, bangtan i neithei lai ding ua chih gen ahaksa hi. Denchiang a haksatak a om a, Toupa leng phat khetheilou a i om khak ding uh alauhhuai hi. Tua bang hongtung i deih leh i ut ahi mahmah kei hi, himahleh maituah thei gige i hihziak un, ginglou mi tamtakte’ mai a Toupa phat teitei ngam ding in hatna leh ginna i neih uh apoimoh a, tua ding in thum in ki lankhe gige leng i chi hi. I omna chiat ua lemna leh muanna om a, kipaktak leh nuamtak a Toupa be khawm a, Amah phatkhawm a i om gige theih na ding unleng Toupa kiang ah thum ni.

I thukhitna ding in, haksatna i tuahte uh i Khalam adia manpha ahi chih thei ni. I tung ua haksatna leh buaina hon tungte Toupa’n hon bawl phat utna, hon siamthak utna, Amah deihdan a i om semna ding uh hithei ahi chih phawk ni. Lungkia leh mangbang in om kei ni, Toupa ah i hatnate suang in Amah a kinga photphot leng bangkim ah vualzohna a om ding  hi.

“Deihtakte aw, na lak ua ze-etna thupitak hongom, noumau ze-etna ding a na tung ua hongtung, thillamdang na tung ua tung bang in lamdangsa kei un. Khrist thuaknate thuakpihte na hihdan bangzel un kipak zaw un; huchi in a thupina a a hong kilak chiang in noumau leng nuamtak in na kipak thei ding uhi.” – 1 Peter 4:12

Amen!

Toupa’n i thugelhte tungtawn in theihsiamna leh Khamuanna i tanchiat uah hon  piak i ngen a; theihna bukim louh ziak a i  gen khelh omte angaihdamna i ngen lailai hi.

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing hi 17th  March, 2021 | Weekly-Inspiration – 63)

Leave a Reply

× Direct Appointment