ANKAM CHI BANG A KHALAM A KHAN LETNA

Mihingte’ deihtel theihna piak a i om bang un Kha a omna, Kha deihdan a hinna leh nuntakna tuh ei ah aki nga mahmah hi. I deih leh deihlouh, i ut leh utlouh thu hilou in, Toupa deih dan a om gige tuh i hin ding san uh ana hi zaw hi. Hiai ding a leitung a om i hih dan uh aki mangngilh dekdek a, Kha lam deih a hinsang in mahni nopsakna a om i teel zaw nak uhi. Khalam a nuntakna leh hing khiattheihna tuh salam dan a hinkhua zat toh aki lehbulh mahmah hi. Toupa deihna bang a Khalam nuntakna a i hong om chiang in, ei ah khanna thupi tak, Toupa ompihna i mu toutou a, hiai in a vualzawlna, Kha lam a masawnna leh khanletna a hon tung hi. Himahleh khovel dan a om a, salam utna te leh mit-ut na te delh a hinkhua i hon zat chiang in siatlam i manoh uh a, Toupa toh i ki zopna uh a gamla huaihuai hi.

Mi tamtak te’n i piangthak nung leh banghiam hun a i na hih khelh gige ua i mu nawn ahih leh, Khalam a piching na khat nei ka hi chih i hong ki theih chiang un, thei ki sakna, chin kisakna leh bang hiam kisakna i hon zui pahpah sek hi. Hiai in Toupa deihdan a hinkhiat sang in mahni a kisaktheihna chii, kei ka hi ki chih utna, midangte sang a hoih zaw kisakna a hon tung nak hi. I piangthakna uh bang a chih te ngaihtuah a i omdan te uh i ki vel chet gige uh apoimoh hi. Naungek in anu nawitui a lunggulh gige mah bang in i piching nung hi’n, thei iki sak pen hun hongtung ahih tak leleng Toupa thute mah a i ki diah kawt gige tuh i om ding dan uh, i hin ding dan uh ahi zaw hi.

1 Peter 2:2, “Naungek suak thakte bang in khalam nawitui bangmah hellouh lunggulh un, huai a na khan theihna ding un.” – 1 Peter 2:2.

Khatveivei hinkhua haksa sak ziakin Toupa deihdan a hin ding leh om ding khong hak a haksa ding a i koih hun uh a hong om hi. I mihing hihna te uh a hong let luat chiang in tua te hong om ana hi zaw ahi chih i theih uh apoimoh hi. Mi khial i hih dan uh kithei a, i hih na bangbang ua kipiak khiatna leh bangmah hilou i hihdan uh ki thei a Toupa kiang a ki piak khiat na in lametna hing, kipahna bukim a hon pia hi. Jesu’n naupang neute a itdan, a ngaihdan i Laisiangthou ah i muthei hi. Naupang te ngaihtuahna tuh ahou thei pen in gen leng thil hou chikchik ahi a, akipahna uh le thil neuchik a ki nga ahihziakin lungkhamna ding leh buaina ding anei tawm mahmah uhi. Ei a lian te’ leng naupang ana hi sa i hih ziak un bangtan hiam a theihteihna i nei chiat uhi. Naupangte’ nulepa khut a aki ngak gige bang un i piching nung leh i hinsung teng uh tuh Toupa a iki ngak gige uh apoimoh hi.

“Naupang neute ka kiang ah hon paisak unla, kham kei un; Pathian gam hichibang mite a ahi ngal a” a chi hi. Chihtaktak in k’on hilh ahi, “Kuapeuh Pathian gam naupang neute’n a kipahpih bang a kipahpihlou asung ah a lut kei hial ding” a chi hi. – Mark 10:13b-14.

Jesu’n ankam chi tungtawn a gentehna a hon hilh mah bang in, “Van gam tuh ankam chi tang khat min a lak a, a lou a a theh bang ahi. Huai chi laklak ah a neupen a; himahleh a hongpou sang chiang in loupa lak ah a lianpen a, sing a honghi a, huchi in tungleng vasate a hongpai ua, a hiang ah a giak uh” a chi hi.” – Matthai 13:31-32.

Hiai ah ankam chi aneu dan i theih chiat uh a, a hong piching a ahong let chiang in lianpi in hong khanlian hi. Hiai tungtawn ah zillai khat la in tua pen lungsim a phawk gige leng chih i deih mahmah hi. Ankam chi tang neu mahmah tuh thakhat thu a honglian hulhul ahi mawk kei hi, a piching na ding in awlawl in a hong khanlian lian a, tua bang a hong piching ahi zaw hi. Hiai bang in ei gingtu te leng TOUPA I neih chiang a hat hehu, kipak gige leh nuam sa pah ding ihi zenzen kei uhi. Toupa ah ki muh chetna te nei a, i hihna te uh ki theichian a, i pianthak ni uh tuh ahi i hatlouh ni pen uh. Hiai hun tuh ankam chi bang i himai uh a, hiai hun apan in awlawl in Khalam a khanna i hon nei toutou thei pan uhi. I khelhna te uh ki phawk lou a, Toupa ngaihdamna sang lou a hinkhua zatna in Khalam a masawn, khanletna ahon tung thei ngei kei hi. Jesu Khrist gingta a, Amah ei sih sik a hong sihna sang a, Amah a lametna i ngak chiang in ahi i gingtu hihna ahong kipat phat.

Ankam chi awlawl a hong khanlet mah bang in, Toupa toh i tonkhawm chiang in awlawl in Khalam ah i hon piching tou ding a, midangte’n leng ei ah kipahna, Khalam a khanna te a hon mulai ding uhi. Toupa hongpai ni matan siat theihna khovel a khosa ding i hih ziak un, hunteng niteng a Amah toh i tonkhawm uh a poimoh hi. Thakhat thu a i hoih louhna te ua pan ki bawl hoih ding leng ihi kei uh a, awlawl a tuate douzou ding a Toupa toh tonkhawm ta ding i hi zaw uhi. Toupa ah i ki piak khiat na uh, Amah a bangkim i ngak na uh i hinsung teng ua i phawk gige uh a poimoh hi. Haksatna tuamtuam, maban hun ding ngaihtuahnate bang, salam thilte bang leh i Kha lam hon bahsak thei ding khovel ah hong om toutou lai ding hi. Tua te tuh Toupa toh i zouzou thei gige i hih dan uh mangngilh kei ni. Amah ah ki nga teitei ni. Toupa ompihna theihsawm gige in, Amah toh tonkhawm leng nuam leh manpha ahih dan i mu toutou ding uhi.

Niteng a Toupa toh hun zangkhawm a, Laisiangthou te sut leh sim a hinkhua i hong zat touh chiang in tuate’n Kha gah tampi a hon suang lai ding hi. I Weekly Inspiration paisa te a i na gentak mah bang in, itna, kipahna, lemna, thuaktheihna, migitna, hoihna, muanhuaina, Nunnemna, kidektheihnate (Galatia 5:22-23) i hon nei semsem ding uhi.

Bangkim a Toupa amasa a koih gige a, Amah a i lametna, i ginna, i kipahna leh i lungkhamna tengteng uh nga thei chiat ding in simtute Toupa’n hon ompihin hon vualzawl hen!

Amen.

Toupa’n i thugelhte tungtawn in theihsiamna leh Khamuanna i tangchiat uah honpiak i ngen a; theihna bukim louh ziak a igen khelh omte angaihdamna i ngen lailai hi.

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing hi 27th January, 2021 | Weekly-Inspiration – 55)

Leave a Reply

× Direct Appointment