TOUPA’N A ITTE A THUNUN ZAW NAK

I lam-et louh dan leh I deihlouh dan a thil hongpai in, buaina I tuah hun uh a hong om sek hi. Hiai te eimah khelhna ziak hiam, I hoih louh na ziak a I maituah hun uh om mah leh hun tengteng ah tua bang ana hi kim kei hi. Khatveivei I khelhna te ziakin hiai bang te tuak kha mah le hang hun atam zaw ah Toupa thunun na ana hi zaw sek hi.

“Thil dang khat leng ka thei hi, huai tuh khovel ah taihaat pente khatna in apang gige kei ua; ahangsanpente leng kidouna ah avualzou gige khol kei uh. Mipilte akhosa theipen ahi gige kei ua, lungsim navaakte ahau gige tuankei ua, mi kivate’n dinmun saang angah gige tuan kei uh. Miteng tung ah vangtahna atung hi.” – Eklijiasti 9:11

Hiai ah I muh mah bang in I tunga thil hong tungtengteng Toupa’ hon thunun na ahi I chi thei kei hi. Hiai bang ngaihtuahna tuh Job lawmte’ ngaihtuah mah ahi. Job in banghiam thil hih khelh nei hiding in angaihtuah uh hi. Job tanchin I theichiat ding ua, a lawmte phetlou a zi mahmah inleng hiai bang haksatna a tuahte ziak in Pathian gensia dingin a sawl hial hi. (Job 2:9).  Job in khelhna a neihziak a tua bang haksatna tuak ahi kei hi, Pathian vualzawlna a dongte ziak lel a Job midiktat leh Toupa pahtawi hiding in Setan in a gingta hi. “….tu in a neih tengteng laakmangsak lechin tuh, na maitang ngei a hon hamsiat ding ahi aw! chi in (Setan) in a dawng hi.” – Job 1:11. Hiai ziakin Toupa’n Setan kiang ah a neih tengteng amah khut a pia hi, himahleh Job taksa tung bel bangmah loh lou ding in thu apia hi. Job tate sawm hinna leh a neih tengteng lakmang sak ahih banah, a lawmteng inleng amah ataisan uhi. Job in athiltuah te ziakin dotna Pathian ana dong kha mahleh, atawpna ah ki niamkhiakna leh kisikna in om a Toupa ngaihdamna atang hi.

Job tanchin apat I muhtheih ahihleh I tung a gawtna hiam, buaina hiam leh lungkhamna I tuahte zaw I khelhna ziak ahi vek kei hi. Hiaite tuh Toupa’n I ginna, Amah a I muanngamna leh I diktatna te hon ettel na ana hi zaw hi. I hatna hiam, I hatlouhna hiam, I bahnate Toupa theilou ahi mahmah kei a, eimah in I theih na ding a hon sinsak ut leh hontheih khiat sak ut ziak a tua bang te ki tuak ana hi zaw hi. Job bang a haksatna bangteng I tung ah hongtung mahleh a tawptan in Toupa I muang zou taktak na diam chih simtute I ki dotna hong hileh I chi hi.

“Pathian in a itte, aman a seh bang a a sapte adin, a hoihna ding un bangkim in a sepsak chiat chih i thei hi.” – Romte 8:28

Haksatna leh ze-etna te Toupa apan a hithei hi, himahleh hiaite thil tengteng Toupa’ a pan I chi thei kei hi. I khelhna te ziak a hiai haksatnate, ze-etna te tuak I hih leh hihlouh eimah inleng I theithei hi.  Tua bang te neilou a hiai bang ze-etna te I tuah chiang in Toupa’n honsinsak ut, hon theihsak ut om ana hisek hi. Itna ziak leh eimah hoih na ding a I tung a tua bangte hongtung hi zaw ahih dan simtute’n thei chian thak semsem ni aw!

Buaina khenkhat I tuahte uh I khelhna te ziak, Toupa’ deihlouh dan a I na gamtat te ziak hiam, I niteng hunzatna a khelhna tuamtuam I hih te ziak hiam ahi thei hi. Tua bang a I na om khak leh chiklaipeuh in Toupa’ kiang ah I khelhna te I puangkhe thei gige hi. Toupa ngaihdamna hunteng a ki hong gige ahi chih mangngilh kei ni. I khelhnate thupha tawi a, diktatlouhna tenteng apat kisikna nei a, Toupa I belh chiang in, Amah ah ngaihdamna a om gige hi. Ngaihdam zohlouh ding Toup’n anei kei a, I khelhna te hon theihpih louh khat leng aom kei hi.

“I khelhnate thupha i tawi leh, i khelhnate ngaidam ding leh i diktatlouhna tengteng silsiang ding in amah a muanhuai in a diktat hi. Thil ka hihkhial kei i chih leh amah zuauthei in i bawl ua, a thu leng eimau ah a omkei hi.” – 1 Johan 1:9-10

Itna omlouhna ah huatna om ahi zaw kei a, itna omlouhna ah hehpihna, ki lainatna leh ki lunghimohna a om kei zaw hi. Toupa’n hon itlou hileh tua bang haksatnate I tung a hontung sak louh ding hi. Ze-etna leh buaina te I tung a hongtung lou hi zenzen leh Toupa’ mel chikchiang I mudia? Chik chiang in I khelhnate I ki muthei ding a? Chik chiang in Toupa I zong ding a? Toupa’n hon itna ziak a, Amah kiang I tungtheih na ding a hichi bang tua I tuah lellel hiam, I natuahsa te hitaleh I tung a hontung sak hi zaw ahi chih thei chian thak ni. Hiai te ziakin kipahthu gen in Toupa it a om I hih dan ki mangngilh kei ni.

“…Ka ta, Toupa sawina ngaineu kenla, a taihilh a na om in leng lungke sam ken; Toupa’n a itte sawi nak a, ta a kipahpih a vaw nak hi,” chi in. Na thuak uzaw noumau ading ahi; tate tung a hihbang in Pathian in na tung uah a hih a; pa sawilouh ta kua a om ngei a?” – Hebrute 12:5-7

Nu-le-pa dinmun a om ta hiai ana simsak om ding in I ki gingta hi. Tate a itlou omlou ding a, tate hoih na ding in bangkim nulepa te’n angaihtuahtuah ding un ka gingta hi. I hoih louh hun in sawina, salhna I tuahte I nulepa itna ziak ana hi zaw hi. Pathian hon itna hiai sang in athupi zaw lai hi. Tua ahihziakin I hoihna ding leh Amah I naihsem na ding a Toupa’n thunun na a hon koih ana hi zaw ahi chih simtute’n thei thakthak ni. I thugelhte apan Toupa houpihna I theihchian sem na ding leh I muhsem theih na ding in Laisiangthou mun bangzah hiam anuai ah I simlai ding uh aw!

“…Tuin khemna chiteng ziak in hun sawtlou lungkham tadih mahle uchin, huai ah nakpitak in na kipak uhi. Na ginna uh ze-etna, dangkaeng mei a ze-et nung nangawn a mangthang zel sang a manpha zaw, Jesu Khrist kilak chiang in phatna leh pahtawina leh thupina ding a hong hihtheihna ding in.” – 1 Peter 1:6-7

“…Amah a ka om theihna ding in leh dan a kinga keimah diktatna hilou a, Khrist ginna ziak a om pen, ginna a kinga Pathian apan suak diktatna nei zaw in. Huchi a Amah leh a thohnawnna thilhihtheihna ka theih a, a thuaknate tanpiha, a sihna a Amah batna ka neih theihna ding in.” – Philippte 3:9-10

“…Deihtakte aw, na lak ua ze-etna thupitak hongom, noumau ze-etna ding a na tung ua hongtung, thillamdang na tung ua tung bang in lamdangsa kei un. 13Khrist thuaknate thuakpihte na hihdan bangzel un kipak zaw un; huchi in a thupina a a hong kilak chiang in noumau leng nuamtak in na kipak thei ding uhi.” – 1 Peter 4:12:13

Theihna bukim louh ziak a gelhkhelh leh gelh kimlouh om te Toupa’n hon ngaidam henla, I thugelhte I tanchiat ua Khalam a hatsemna, Amah I naihsem na uh ahong hih theih na ding in hon vualzawlsak leh I thumna ahi. Simtute Toupa’n hon vualzawl in hon ompih hen. Amen!

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing hi.)
14th October, 2020 | Weekly-Inspiration – 41.



Leave a Reply

Your email address will not be published.

*
*
*

× Direct Appointment