TOUPA TOH TONKHAWM HINKHUA

0

Pathian hoihna, a thupinate leh a hon kepbitnate ngaihtuah zou gige hileng a thupi thei mahmah a, kipahthu genseng ding ahi keihi. Zing i thoh ua pan kipahthu gending a dim in a om zou hi. Damtak a thou a, hiai mun ka om nuamlou hive aw, chihleng omlou a thou khethei gige a om chih khong amanpha mahmah hi. I niteng poimohte uh thumna ale i nget zohlouh uh tamkhop om ahihlai in ahunhun in Toupa’n i taksapte uh a hon pia a kipahthugen ding atam mahmah mai hi. I kiim-i-kiang a i etna peuh, i muh khempeuhte inleng kipahthu genna ding a om den ding hi.

Toupa toh kizopna hoihtak nei a hinkhua i zattheih chiang in tuate, kipahthu genna ding tampi a honpia a, i tung ua thil thupi taktak hon hihsakte leh ahoihnate i theichian semsem thei hi. Tuate’n Toupa lou a bangmah i hih louh dan uh, ei hih theih bangmah om louhdan hon theichian sak semsem hi. Toupa deihdan a hunte zang a, Amah toh kilem taka i om chiang in kiniamkhiatna leh thunuailutnate’n a hon zui hi. Khovel ah pilna tampi nei in, thei kisa in, thilhihthei kisa mahlehang Toupa mah ahi tuate hon neisak a, A honpepa chih theihna lungsim in Amah deihdan a omtheihna leh kipahna a honpia hi.

Gingtute adia manpha penpen, khovel mite’n (ginglou mite leh khovel in) a honpiak theihlouh leh hon laksak theihlouh utuh hunteng a Toupa toh i tonkhawm theihna uh ahi. Hamphat huai leh kipahhuai ahihdan ngaihtuahna saulou pe zual le hang, Toupa toh tonkhawm theih gige chih mawk maw! I haksatnate chiklaipeuh a genkhe thei hang a, i kipahnate Amah kiang tunthei gige hang a, i lungkham-mangbatnite a Khamuanna honpia a. Tuate’ aman om a lei ding hi zenzen leh aman atam mahmah ding a, eite’n i lei zoh uleh i neih zoh ding uh hi di’n le i gingta kei hial hi.

“Israel aw, TOUPA nang honsiam pa’n, lau het ken – kon hondam diing hi. Na min in ka hon samta a, kei aa na hi hi. Tui thukte na ngah chiang in, na kiang ah ka om dia; na buainate’n hon thummang kei diing uhi. Meikuang lak tawn in pai mahle chin, hon kaang kei dia; Ze-etna haksa na tuahte’n hon hihna kei diing hi.” – Isai 43:1-2.

Nak khamuan huai tel maw, Toupa toh tonkhawm lungdam huai leh thupi hina e! Haksatna tuaklou ding i hi uh i chithei kei uh a, tua bangte tuak in thuakzel mahleng i kiang ua om gige TOUPA om ahihziakin lauhnate leh haksatak a om theihnate apan Aman ahon kembit gige hi.  Amah tungtawn in hatna, damna, kipahna leh lungmuannate i nei uh a, tuate’n Khalam a khan semsemna, Toupa toh ki naihsemsemna a hontun hi.

Niteng a Toupa deihna bang a hunte zang a, eivuak a om ngeilou i hih dan leh Amah a hiden i hihdan uh i kitheih semsem chiang un Khamuanna taktak neihtheihna in honzui a, thil bangkim a thuaktheihna, ngakzohna leh kipahna kip i neithei hi. Immanuel: I kiang uah Pathian a om gige hi. Amah i kiang ua om lel himailou in, Khasiangthou in hon sungluah ahihziakin thupi in lamdang mahmah mai hi. (Kolosate 1:27) Thomhau na ding omlou ahihdan maw, i sung ah leh i kiim-i-kiang  a Toupa’n ahon ompih tawntung hi.

Tuni’n Toupa toh i tonkhawm theih gige a, lungmuanna leh kipahna Amah a I neihtheihna ding in bangkim ah Amahmah i theihchet apoimoh masa pen hi. Amah a muanna, Amah a kingakna, Amah deihna banga bangkim a kipiaklutna apoimoh hi. “Na lungtang tengteng toh Toupa ah muang inla, nangmah theihsiamna ah kinga ken: Na lampi tengteng ah amah thei inla, huchi in aman na lampite a pitang ding hi. Nangmah mit ah pil kenla; Toupa kihta inla, gilou taisan in: Na lai ading in damna ahi ding a, na guhte ading in guhngek..” – Paunakte 3:5-8.

Toupa’n i poimoh i taksapte uh thei ahihziakin bangkim ah Amah ah kinga in, Amah deihdan a khosa in om photphot leng, i taksap a i poimoh omte ahunhun in ahonpe ding hi.

“Thu k’on piak tengteng zui ding in thuhilh un. Ngai un, kei tangtawn in, khovel tawppha in leng, na kiang uah ka om ding hi” a chi hi. – Matthai 28:20

Khovel tawppha a leng, i kiang ua om ding Toupa a muanhuai tel hi. Mangbang leh lungkham in om sawm keini. Toupa ah muang in, thathak, kalthakte suan in hinkhua zangni. TOUPA deihna bang a hinkhe thei gige ding, Amah toh tonkhawmte hi gige ding leh a nungzui muanhuaite hi thei gige dingin simtute Toupa’n hon ompihin hon vualzawl hen!

Amen.

Toupa’n i thugelhte tungtawn in theihsiamna leh Khamuanna i tanchiat uah hon  piak i ngen a; theihna bukim louh ziak a i  gen khelh omte angaihdamna i ngen lailai hi.

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing hi 09th  March, 2021 | Weekly-Inspiration – 62)

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published. Required fields are marked *

Book Appointment