I gamsung uleh i pawlpi sung ua siatna hichih tuk a tam lai’n, Pathian laumi leh thumtu mi tamtak i neihte uh ziakin tunitan zahlaklou in nuamtakin i om theilai uhi. Amaute thumna ziak, Pathian a lauhna ziak ua, Toupa ompihna toh tutan i gamsung uh, i namsung uh bit thei liailiai lai ahi chih phawk thakthak leng i deih hi. Huchi bang dinmun a om i hihlai un kua ahia i lauh a i kihtak uh? Mihing maw? Pathian? chih kidot tham a ching mahmah hi. I gamsung uleh i namsung siatnate uh a ziak diktak gen ding leh sui taktak ding chileng Pathian lauhna i neihlouh ziak uh ahi pen ding hi.

“A mit uah Pathian launa a omkei,” chih gelh bang in. – Romte 3:18. Pathian lauhna a omlouh chiang in haina (pilna taksapna) a om nak hi. Hiai ziak mah ade aw i omdante uh mak pipi a om seknak chih hon ngaihtuah sak mahmah hi. Pathian lauhna omlouhna a siatna, lemna muanna om theihlouhna te zaw thupilua hilou ding hi. Kumpi Solomon in Paunakte ah hiai bang in ana gen hi, “Toupa kihtak pilna bul ahi: Mi Siangthou theihna theihsiamna ahi.” – Paunakte 9:10.  Pathian deihdan in om photphot leng pilna leh siamna, lemna leh muanna i na zong sekte uh a hunhun in Aman honpe ding in a muanhuai hi, pilna bul Pathian ahihziakin.

Gitlouhna, thangtatna leh siatna gending leh zak ding a om gige sek ziak zaw Pathian ah i kinga zou kei ua, Amah lauhna taktak i neih zohlouh ziak uhleng ahi ding hi. “Toupa kihtak a gilou huat ding ahi; kisaktheihna leh, kiotsakna, gilou lampi leh kam hoihlou, ka hua hi.” – Paunakte 8:13.  Pathian deihdan a hinkhua zang gige hileng gitlouhna chihte, kisaktheihna leh kiotsaknate apan a kivengbit thei ding i hi zaw uhi. Tua bang hilou a Toupa kihtakna, lauhnate a omlouh chiang in zalenna ut leh dah a om utna i nei uh a tuate’n siatna a hon tun nak hi. Toupa lam a kik a, Amah deihdan a om bang ahia chia i zong hun uh ahong hi mahmah ta hi. “Toupa kihtak hinna lam zotna ahi; huan kuapeuh huai nei lungkim in a om gige ding; gilou a veh in a omkei ding hi.” – Paunkate 19:23

Koimunpeuh a i omna uah hitaleh mihing maipha zong khak abaihlam nawn mahmah hi. Tua i dinmun a sangzaw deihna ziak bang, bang hiam deihna, muh utna ziak bang, ahihkeileh bang hiam kitai khak ding lauhna, amau deihlouhdan a om khak ding lauhna in midang i tung a sang zaw te kihtakna khat i nei khasek uhi. Hiaite neilou a i tung ate zahtakna piaklouh ding chi ihi kei, himahleh bang chibang in amaute mai a i om a, bang chi bang in i nna i sem khesek a chih ngaihtuah tham a ching mahmah hi. Hiai bang hunte a Toupa a muanna neilou a, Amah leng phawk lou khop a khovel deihdan a mite’ maipha zong khak ding kiveng a poimoh hi. Sawltak Paul in hiai bang in ana gen hi, “Ahihleh tuin mihing maipha hia ka zon Pathian a? Ahihkeileh mihing ahi maw lungtaisak ka tup? Mihing nana lungtaisak lel hitaleng, Khrist sikha ka hi kei ding hi.” – Galatiate 1:10. Sawltak Paul in mihing maipha ana zong hileh suangkulh ah leng alut ngeikei ding a, vuak leh soisak inle a om kei ding a, gilkial leh dangtak in a om kei ding a, suang a deng leh khua apan kaihkhiat in a om kei hial ding hi. (Nasepte 14:19). Hiai in mihing maipha zong hilou a Toupa adia hing khia ahih dan ahon hilh hi.

Eite’n leng Toupa nung i zuihna uah khatveivei vuallel kisaknate, sawina tuak ka hi, ahihkeileh hihgentheih a om ka hi chi’n tua bangte i tuah hun uh a omthei hi. Himahleh hiaite zaw Toupa i muanna ziak uh, Amah adia hing i hihdan uh leh Amah houpihna aw i zak semsem na uh ahi zaw hi. I thiltuahte uh thawnlou hial ding a, Toupa’n hon theihpih louh omlou ahi chih phawk in kipaktakin i tuah bangbang te uah lungkim in i om zaw ding uh.

“Huchi in naute aw, amah ah om gige un; amah a hong kilak chiang in ama ah zumlou in hangsantak in i om thei ding hi.” – 1 Johan 2:28.

Tulai a natna hiileng Covid ziakin bang tan tua bang dinmun ah i omlai ding ua chih kuaman i gen theikei uhi. Hiai bang hun haksa ah i hun neihte uh Toupa zong semna in nei in, Amah ah kimuhkhiat semsemna, kibawlphatna hun in zang chiat leng i deihpen leh i utpen ahi hi. Natna hii eitung a hongtung lou ding ahi chih kuamah agen thei ding ki omlou ahihziakin tua bang hongtung lehleng theisiam a Toupa ompihna toh Khamuantak a i omtheih chiatna ding hun tu hunhoih i neihlai te uh atamthei pen Toupa toh kithuahna in nei ni.

“Toupa ka vak leh hon hondampa ahi; kua ka lau dia? Toupa ka hinna insang ahi: kua ka kihta dia.” – Sam 27:1.

“Toupa ka zong a aman hon dawng a, ka kihtak peuhmah lak ah a hon humbit hi.” – Sam 34:4.

Toupa’n i thugelhte tungtawn in theihsiamna leh Khamuanna i tanchiat uah hon  piak i ngen a; theihna bukim louh ziak a i  gen khelh omte angaihdamna i ngen lailai hi.

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing)

26th April, 202 | Weekly-Inspiration – 69

Leave a Reply

× Direct Appointment