TOUPA, HON HONDAM IN

0

“Peter in a dawng a, “Toupa, nang na hihleh tui tung ah nang kiang a hongpai thu honpia in” a chi hi. Huan aman, “Hong paive” a chi a, Peter long a kipan a kum a, Jesu kiang zuan in tui tung ah khe in a paita hi. Himahleh huihnung a muh in a lau a, tum din a kisa a, “Toupa, hon hondam in” chi in a kikou hi.” – Matthai 14:30.

Toupa hoihna ziak kia leh Amah honpinate ziakin tunitan i Weekly Inspiration uh sunzom touthei liailiai in i om thei a i kipak petmah hi. Tulai natna hii in munchih a hon nawk a, khentuam omlou in aneu alian tung ah hongtung thei di dinmun in aom ta a, atung lellel leng ahi hi. Hiai bang hun haksatak mai, bang chidi ka dia aw, bang chi kikepbitdi i hidi uam chia buaitak a i omlai un lungsim ah tua i Laisiangthou changteel a hong suaksuak hi. Theihna leh zilna nei kihi keimah leh ahunhun in Toupa’n Amah thute ahi bangbang a gelh khethei dia honpi nate alamdang a, Amah min i phat thakthak ahi.

Natna hii apan i kivenbitna ding un dan tuamtuam vaihawmte apa’n leh makaite apa’n in i za ua, i thei chiat uhi. Tuate mah pilvang tak a i zuih uh apoimoh mahmah hi. Huchi ahihlai’n kikep theihtawp a kikeem kichi mahlehang i tung ua tua natna hongtung lou himhim ding chih ahi keihi. A poimoh pen tuh mahni kikep theihtawp a kikep ding ahi a, abante zaw Toupa khut a i ngak uh apoimoh mahmah hi. Lungkham tak leh thomhau tak a om a, i om dingdan bang ua le om theilou, i hih dite uhleng hih khethei lou a i om khak ding uh alauh huai hi. Kikeem ni, siangthou takin om in zuih ding leh om ding dan hon kigen bangbang te hih in, abante zaw Toupa khut a ngak chiat i sawm ding uh.

I changteel uh sim thak leng, Peter in Jesu kiang a zawt lai’n tuitung ah tum pahlou hi. Bangtan hiam tuh tuitung ah apai ngei ding chih a chiang hi. Himahleh huihnung a muh in a lau a, tum di’n a kisa a, “Toupa, hon hondam in” chi in a kikou hi. Hiai muntak tuh i deihna lai ahi a, eite hinkhua mahmah en in Peter bang in kikoih chiat thei le’ng i deih mahmah hi. Pathian deihna bang a hinkhua zang a, Toupa mah mitsuan pen a i neih chiangun lauhna a om kei a, bangkim ah lungkim theihna i nei uhi. Haksatna bangteng i tung ua hongtung hun inleng Khamuanna leh theihsiamna Toupa’ ompihna ziakin i neithei uhi. Himahleh hun bangtan hiam a Toupa toh tonkhawm gige hinapi’n, Amah i nungngatsan chiang un leh mahni utna a i paisek chiang un buaina, lungkhamna leh haksatnate khong theihsiam haksa i sa pah uh a, lauhna a dim in, hinkhua haksatna i tung uah hongtung zel hi. Huchilou inleng leitung khosaknate ziak a lungkhamnate nei a, buaina i neichiang inleng Toupa phawk haksa i sa uhii. Toupa lam en zou gige a, Amah a kibulphuh zoh gige apoimoh lua hi.

Peter bang ziak a tuitung a tum  dia kisa a i chihleh a et gige i Hondampa Jesu en nawn talou in, akiim a tui kihawt, huihnungte amitsuan ziak in lauhna in adim a tuate’n tua bang dinmun ah omsak hi. Eite mahmah bangleng hiai bang dinmun ah bangzah vei i omta a chih hon ngaihtuah sak mahmah hi. I etdi pen uh enlou a i kiim i kiang ua thiltung te khong in hon lungkham sak thei mahmah hi. Tua natna hii toh kisai mahmah inleng mi tamtak lungsim sukha dingin i gingta hi. News tuamtuam, gen-le-sak zak ding muh ding a omden a, hiai te a i lametna, i ginnate nga ding chileng lauhna toh lungkhamna toh kidim ding in kakigingta hi. Hiaite enlou ding leh ngaihsak lou ding chihna hilou in ei adia poimoh leh ahoih a i theihtante la in, buaipih pen leh lauhna in pawng dim keithei leng chih i deih ahi zaw hi. Toupa thute mah mitsuan pen a nei in, hiai bang thiltungte’n ei ah bang gen a hon nei a? Pathian naihsemna in hontung hia? Kibawl phatna in i nei hia? Toupa toh hun tam theisem i zatna hun ahi mai diam? chihte in mahni ah kidong chiat leng i ut hi. Khovel paidan et in hun nanung lam zaw himahmah ta chih tan i genthei a, i Toupa hongpai ding bel kuaman i genthei kei uhi. Himahleh sihna i mai a hongom thei gige ahihziakin i sih chiang in ei adia hiai khovel bei himai ding hi. Tua ahihziakin tu hun a atam theipen Toupa toh hunzat khawm apoimoh a, lungtang a  siangthouna leh salam a siangthouna toh hinkhua zat apoimoh mahmah ta hi. Pathian deihdan a hinkhua zang zel a, mahni ut hun a nungtolhtolh theizel i hih khak leh denchiang a i hinkhua bangchiktan ding ahia chih i genthei kei hi. Tuhun haksa himahleh manpha theipen a Toupa toh kituahna, kilemna  a i zat uh apoimoh mahmah mai hi.

I changteel en nawn leng, “Hong paive” a chi a, Peter long a kipan a kum a, Jesu kiang zuan in tui tung ah khe in a paita hi. Himahleh huihnung a muh in a lau a, tum din a kisa a, “Toupa, hon hondam in” chi in a kikou hi.” Hiai ah Peter in lauhdan thu gen a, eite mahmah bangleng hinkhua aluahna toh i kidim zel uhi. Toupa nung i zuihna uah lauhna a om theizel thei hi, tulai hun a natna ziak kia inleng lungmuang theihlouhna, lauhna toh om aki om mahmah dingin i gingta hi. Himahleh ei gingtute’, Toupa a lametna neite a ding in hiai lauhnate apa’n lungmuanna i Toupa ah i neithei gige uhi. 2 Timothy 1:7 ah “Pathian in launa kha a honpe kei a, thilhihtheihna leh itna leh kithuzohna tak neihna a honpe zaw hi.”  Lauhnate leh thawmhaunate om lou bikbek ding chih ahikei a, himahleh hiai bang hunte inle Toupa lam en zou gige hileng, lametna leh kipahna i neithei gige ding uhi. “Jesu, i ginna siampa leh hihkippa, a ma a kipahna om ziak a zahlaknate ngaineu a Kros a thuakpa, Pathian mangtutphah taklam a tupa, Amah lam en in.” – Hebrute 12:2.

Tuhun haksa ah Toupa mah mitsuan pen in nei in, thuthang tuamtuam i zak ua i muhte uah lungkham leh lungngai in om keini. Toupa’n atate hon ompih a hon kembit gige ahi chih phawk in, i mangbatnate uh, i thomhaunate uh Amah ah nga in kipaktak leh lungnuam in om chiatni. Tua ahih kawmkawm in hiai bang hunte ahoihthei pen  Toupa toh kithuah semna a zang chiat ding in simtute i ki chial hi. Toupa’n hiai thomhaunate leh lauhnate apan hon homdam ding ahi chih mangngihlh lou in, Toupa, hon hondam in chih i thumna pipen uh hileh i deih pen ahi.

Ahi, Toupa,  Hon hondam in! Ka dam ding uh!

Toupa’n i thugelhte tungtawn in theihsiamna leh Khamuanna i tanchiat uah hon  piak i ngen a; theihna bukim louh ziak a i  gen khelh omte angaihdamna i ngen lailai hi.

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing)

04th May, 202 | Weekly-Inspiration – 70

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published. Required fields are marked *

Book Appointment