TOUPA GAM NNA SEM DING A SAP A OM I HIH LAM BANG CHI’N I THEITHEI DIA?

Khovel in siat lam manoh huaihuai mah leh, Pathian gam nna a sem ut leh a kuan ding mi tamtak om uh ahi chih I theih in I kipahna hon liansak mahmah mai hi. I hinkhua ua thil tuamtuam te a I buai sang un Toupa gam nna sem dia kipiate buai nate eng huai leh hampha uh kasa mahmah hi. Leitung a bang hih ding a om I hia chih thei a, asem khebuching te vuak uh hilou in, mi tam takte kiang a Khris tanchinhoih hilh tu leh Jesu kiang tungtu te ahihman un tunglam a kipahna amuh ding uh thupi lotel ding hi. Pathian gamna a sepna uah, a haksa a tuah dingte uh gensiam hilengle I gen kim zou kei hial ding a, khasiat na ding leh lungngaih na ding atam mahmah ding hi. Himahleh hiai bang haksatna tuah ding omte tuak ngam a masuan uh ahih man un thupi I sa a, Pathian a aginna uleh ahatna uh etton tham leh suang huai uh I sa mahmah hi.

Awle, amau te bang a enleng bang chi bang a Pathian gam nna sem theiding I hia? Ahihkei leh Toupa gamnna sem ding a sap a om I hih lam bang chi’n I theithei dia chihte I gen thei dandan in I gen ding. Toupa gamna sem ut ka hi I kichih a, sapna nei ka hi I ki chih leh hiai dotnate ki dong leng. Na hinkhua ah, na tulel dinmun ah, na nasepna ah maw ahihkeileh na om nana ah Pathian bang chi bang in na theihpih a? Amah thute ngaihtuahna in na hunte bang chibang in na zang a? Laisiangthou leh thumna hunte bang na chi zat a? chihte I ki ngaihtuahna masa hileh I chi mahmah ahi. Hiai dotna te ei-le-ei ki dawng ding chileng bang chi bang in I ki dawng dia? Sap a om ka hi chileh, hiai ding a manta ka hi na hiam chihte hiai dotna tungtawn a mahni a ki dawng thei chiat ding in I ki gingta hi. Toupa thute leng genkhe ngeilou, A hoih na I muhte, I ginnate leh I kipahnate gen khe ngeilou mi I hih a, a thute simlou leh ngaihsak lou I hih lai a hiai bang sapna nei I ki chih khak ding alauh huai mahmah hi. Pathian gam nna sem theilou ding I hi I chi kei a, himahleh I phuk hun a hong om teitei kha ding hi, huai ma in I hih ding leh I sep ding om zek lai ding in I gingta ahi zaw hi.

Pathian gamna lohching tak a I septheih na ding in Jeremiah leh sawltak tuamtuam Paul, Peter leh adangdang te’ bang in ei ah Pathian thu gen khiat ut tuntun na I neih leng a poimoh mahmah hi. Pathian Kha pi na leh bangkim a Amah neih a poimoh hi. “…Toupa ka mangngilh dia, amin in thu ka gen nawn kei diing, ka chih chiang in, na thukhah tuh ka sung a meikuang bang ahi hi. Ka theihtawp in iim teitei ka sawm a, himahleh ka iim zou mahmah kei hi.” – Jeremiah 20:9. Hiai Laisiangthou in I hinna bang chi bang in a hon gen kha a? Peter leh nungzui dangte, Jesu’ min a thu gen leh thuhilh hih nawn lou ding a thu piak a om lai un, amaute dawngna tuh “….Kou zaw ka muh uleh ka jaakte uh gen lou thei ka hi kei uh’ chi in a dawng uhi.” – Nasepte 4:20. Nungzui te bang a I muhte leh I zakte midangte’ kiang a I genkhiat a poimoh mahmah hi. Hiai te chu I gensa bang in  Pathian hoih na I muhte leng ahon hithei a, amah tungtawn a avualzawlna I dongte, I kipahna te, Amah hon hihsak thiltuamtuam te, haksatna tungtawn a vualzohna I ngahte bang leng ahong ki thei hi. Hiaite chu midangte a ding in lametna thak, thathak lakna leng a hong suak thei hi. Hiai bang te neilou a, om muang maimai hiam, tanchinhoih genkhe ngeilou mi hiam, ahihkeileh Pathian thupina te mulou leh Amah toh ki polhna nei ngeilou I hihleh Pathian gam nna semdia man zou nailou I hi kha ding hi. Tua ahihziakin Pathian sapna I theih na ding in Amah toh I hunte I zat gige apoimoh mahmah hi. Nungzui te bang a hangsantak a Tanchinhoih puangzak ngam a angai hi. Sawltak Paul thupina mahmah sim nawn leng, “Tanchinhoih gen mah leng kisaktheihna ding ahi kei hi. Hihlouh theihlouh ka tung ah a kinga ahi; Tanchinhoih gen keileng ka tung gik ding ahi. – 1 Korinte 9:16. Hiai a I deih mahmah chu ‘Tanchinhoih gen keileng ka tung gik ding ahi’ chih ahitel hi. Thupi lotel hi lou maw! Pathian toh om khawm gige leh Kha a dim ahihman in Tanchinhoih genlou theilou ahihdan leh gen keileh puakgik ki tung ahih dan agen hi. Hiai in Toupa gam nna I sep utna bang pentak a chih ei a ki theihtheih na hon behlap lai ding in I ki gingta a, sap a om I hi taktak hia chih leng I theithei hi.

Et dan dang ah en nawn leng, mi tengteng Toupa gam nna sem ding a kikuan khethei lou ahih ziakin I septheih dan lam chi tuamtuam Toupa’n a hon piak a om hi. Tua te chu pilna siamna a hon piak te tungtawn bang leng a hi thei hi. I thil hihte tungtawn in Toupa I phat thei a, tuate mah zang in midangte kiang ah Tanchinhoih I hilh thei gige hi. Pathian thu gen ding in Pastor te hiam, Evangelist te hiam vuak a ngaihsutna I nei kha thei hi. Himahleh amaute vuak nasep ding a hikei a, nang leh kei leng hi gige I hi chih phok thakthak ni. I omna ah, na omna ah Pathian thu na gen thei gige hi. “Khovel tengteng ah pai unla, thilsiam tengteng kiang ah Tanchinhoih hilh un” – Mark 16:15 chih ahi lai hi. Hiai a khovel a chih in mundang gamdang a va pai ding chih ahi sese kei hi, I omna I kiim I kiang a omte leng gen ahi hi. Tua ahihman in Tanchinhoih I hilh theih na ding atam mahmah mai hi. I insung mite a hong hiding a, I innkiang leh I kiim ah mi tamtak I genna ding a om den hi. Hiai te kiang a tanchinhoih hilh tuh I mohpuak a hi gige hi. A poimoh nawn mahmah ahihleh, hiai tanchinhoih midangte kianga puangzak na ding in ei ah bang poimoh a om masa a chih I ngaihtuah masak a ngai nawn hi. Midangte kiang a tanchinhoih I hilh theih na ding in ei toh Pathian I kikal uh i bawl fel masak uh apoimoh mahmah hi. Pathian toh ki lemlou pi leh Amah nei taktak lou inleng midangte tanchinhoh ahilh theih tham hi. Himahleh I thuhilhte’ Pathian adia pomtak ahih theih na ding leh midangte’n I thu gente anek theih na ding un ei lam ki bawlfel masak a ngai hi. Eilam I ki man chiang in Pathian in hon zat ding bang in hon zang thei a, a thute in hon Khamuan in a poimoh na munmun ah Aman a hon zang ding hi.

Saulou chik a I thugelhte Toupa’n hon vualzawl sak hen la, theisiam thei ding in simtute hon ompih hen. Theihna bukim louh ziak a gelhkhelh leh gelh kimlouh om te Toupa’n hon ngaidam henla, I thugelhte I tanchiat ua Khalam a hatsemna, Amah I naihsem na uh ahong hih theih na ding in hon vualzawlsak leh I thumna ahi. Amen!

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing hi.)
23rd September, 2020 | Weekly-Inspiration – 38.



Leave a Reply

Your email address will not be published.

*
*
*

× Direct Appointment