Thupukna Dik Bang Chi Theihtheih Ding?

“Toupa tung ah leng kipak in; huchi in na lungtang deihlamte a honpe ding hi.” Sam 37:4

I niteng hunzatna ah hiai “Ka Hih Diam” “Ka Hih Kei Diam” chih dotna miteng in i tuak vek uh hi. A second a second in thupukna in hon ngak sek hi. Hiai hih di maw hih lou di, hiai sem di maw, semlou di chi in thupukna ngen in a dim hi. Bible sim di maw simlou di? Sepna zongte’n, huai sepna la di maw la lou di? Lai simte’n, hiai simdi maw simlou di? chi in thilteng i hih peuh ah thupukna lak di i mai a om gige hi. Hiai thupukna te michih i tuam dungzui in tuam hi, himahleh hiai bang thupukna te’n i maban saupi hon sukha hi.

Thupukna dik bang chi leh i la theidia? Pathian deihdan toh a kituak diam i thupukna laak te? Hiai te i theihtheih na ding in Pathian thupina, Amah Kumpi ahi dan leh Amah adia thil haksa omlou ahih dan i chet masak poimoh hi.
“Toupa’n a ut peuhmah, van ah, lei ah, tuipi ah, tuithukpite ah a hih hi.” – Sam 135:6
“Kei TOUPA, mi namchihte’ Pathian ka hi a; kei adi’n bangmah haksa a om kei hi” – Jeremiah 32:27
“Jesu’n amau a en a, a kiang uah, “Huai mihing hihvual a hi kei, Pathian a di’n bangkim hihtheih ahi” a chi hi. – Matthai 19:26
“Pathian thupawt himhim thil hitheilou a omkei hi” a chi hi. – Luke1:37

Awle, thupukna i lak chiang in thil nih i lungsim a koih gige leng i chi ahi. Tua te saulou in i en ding.
1. Pathian deihdan
2. Pathian thiltup (God’s Plan)

Pathian deihdan: Pathian deihdan bang ahia chih a thupi penpen leh amasa pen ahi. I thil hih utte hi’n, bang peuh ihih te Pathian deihdan ahi na hiam chih iki dot ding ahi. Pathian deihdan bang a chih i hon kichian chiang in bang peuh i hih pen a hoih leh hoih lou ki theithei a, hiai in thupukna dik hon pe thei in, i hih peuh ah lungmuanna ki nei thei hi. Etsakna khat enleng; I Laisiangthou ah zuihding Pathian deihdan i mu hi, tua te lak a thupi pen chu “Itna” ahi. I mihing pihte nangawn i it zohlouh chiang in ihih na lamlam chu ki lim bawlna, lungsim noplouh na leh Pathian mai a dik kisaklouh na in i dim hi. Hiai in ihih na lamlam ah hoihlam sang in diklou tak a thupukna lak na, siatna hontun thei hi. Tua ahih man in, Pathian deihdan toh ki tuak a i om chiang in Thupukna dik ki la thei pan hi.

Pathian Thiltup: Anih na a i ngaihtuah nawn ding tuh Pathian in ei a thil tupte bang ahia, hun paisate ah hi’n hun hongpai ding te ah chih ahi. Pathian thiltup kuaman i thei kei ding, himahleh Pathian in ei a athiltup hon bawl sak bang ahi chih i theih a i muh suah a ngai hi. Kal masa Weekly Inspiration ah “Ei A Siamna Kiselgu Zongkhe Ni” chih saulou i gen zou ta a huai ah leng chiang takin i gen ta hi. I sim naikei leh huai leng ana sim ding in iki ngen hi. “Thil kiselte Toupa i Pathian a ahi, thil hihlatte bel hiai danthu tengteng i zuih theihna dia eite leh i suante a ahi gige ding ahi” (Diut. 29:29a).

I thil hih tengteng a Thupukna lak hi maw haksat i sak leh i lunggim pih gige uh, i thupukna lak te’ adiklou sak khak ding, i nnasep te ei toh ki tuaklou sak khak ding, lampi diklou a pai khak ding leh zum huaitak a om khak ding i lau hi. Himahleh hiai te bangjiak a ngaihsun thei i hi hiam? chih hi nawn hi. Hiai bang ngaihtuah na i neihtheih te Pathian i muh na, Amah i naihsem na ding hi zaw hi. Mi khialsa a piang i hih ziakin i mihing hih na hong hat mahmah sek hi. Khat veivei mahni a dik leh hoih kisakna in i dim hi . Pathian a iki ngak khak louh chiang in hiai te’n hon zui a, hiai in lampi diklou hon tung nuam mahmah hi. Ei vuak hilou in i innsung, i khotang leh i saptuam sung natan ah buaina i tuak thei hi. Tua ahih man in hunteng a Pathian a ki ngak gige, Amah a muanna neih leh thumang poimoh gige hi.
“Pathian in a itte, aman a seh bang a a sapte adin, a hoihna ding un bangkim in a sepsak chiat chih i thei hi” Romte 8:28

“Pathian Thiltup” saulou in i genta a, chihleh bang chi bang in Pathian thiltup te i theithei dia chih thumal guk (6) en lai leng i chi hi.

1. Hotdamna: Pathian thiltup amasa pen leh apoimoh pen tuh hotdamna a i om theih na’ng ahi. Hotdamna a i om theih na ding in Pathian in a tapa neihsun Jesu Khris eite ading a hon piak i pom ding ahi. I khelna te kisik a, lunghel a Pathian bel a, Amah a ginna i neih gige ding ahi. Tua te lou in hotdamna i tang zoukei ding hi. Hotdamna i neih chiang in Pathian in ei a tup te theihsiam theih na i nei pan hi.

2. Kha a dimna: Gingtute’ ading in Kha a dimna tuh mite’ mai a Pathian ta i hih dan leh hotdamna a om i hih na ki chet theih na ahi. Tua Kha gah te tuh Galatiate 5 na ah i mu hi. Kha a om a, Kha a i dim chiang in thupukna haksatak maituah hun te ahleng i panlak ding dan Pathian apat i theithei hi.

3. Siangthouna: “..Pathian in sianglou ding in a honsam kei a, siangthou ding in a honsam zaw hi.” 1 Thess 4:7.
Siangthou na toh kisai a Pathian deihdan hinkhua 1 Thess 4:3-12 ah i mu hi. Siangthouna tuh thil thupi takmai, gingtu te kikhek na leh Khris mel i hinkhua a hon lamlak tu ahi hi. Siangthou na lou in Pathian mel ki mu theilou hi. Hun haksa ah bang hiam thupukna i lak ding om chiang in hiai bang dotna i bawl thei hi; ka thil hih dek in Siangthouna hon tung thei diam? A hih kei leh mahni ang-masial na maw? Pathian thu toh kikalh maw? Pathian deihdan ahi hia chih i ki dot angai hi.

4. Kipiakkhiatna / Kituklutna: Laisiangthou ah Pathian in vaihawmtu ding michih amah deihna bang a bawl ahi chih chiangtak in imu hi. Amau te niallou a a thuthu ua om ding in hon deih hi. Romte bung 13 na ah leng chiang tak in i sim thei hi, “..Michih a tung ua vaihawmte thuthu in om hen. Pathian thu lou in kuamah vaihawm a om ngalkei ua; vaihawmmite Pathian seh ahi uh..”
1 Peter 2:17 ah leng “..Mi tengteng zahtak un. Unaute it un; Pathian laudan siam un. Kumpipa pahtawi un.” chih te i mu hi. Hiai in Pathian mai a ki piakkhiatna kituklut apoimoh dan hon sinsak hi. Nu-le-pa te mai a iki piakkhiat bang in, i tung a vaihawmtu dia seh a omte deihna bang a i om ding Pathian in a deih hi.
“Huaiziak in kuapeuh vaihawmmi sel Pathian seh kalh ahi; a selte’n amau tung ah vaihawmna a mu ding uhi.” – Romte 13:2

5. Gimthuakna: Nuam sa ding a omlou ihih dan i theih thakthak apoimoh hi. Jesu’n leng chiangtak in Gingtu hinkhua chu gimthuakna om lou theilou ahih dan hon hilh hi. “Ka min ziak in mi tengteng huat na hi ding uh; himahleh a tawppha a thuakngap peuhmah hotdam in a om ding hi.” Matthai 10:22;
“Khovel in nou a honhuat leh nou a honhuat ma in keimah a hon haw khinta chih thei un.” John 15:18
I nopsakna di lam kia lam-en a thupukna la ihih khak ding lauh huai hi, ahaksa te phu ngamlou a lampi diklou a ipai khak ding a lauh huai mahmah hi, hiai bang te tuh gingtu hinkhua hilou hi. I maituah ding haksa om a ahih lehleng i thuakngam a, Pathian deihdan toh kituak a thupukna i lak ding ahi.

6. Na utut hih in: A tung a point te apat iki chet chiang in i utut i hih thei hi. Pathian deih dan bang hi hiam chih i thei ta a, lampi dik, thupukna dik ei ah theihtheih na i nei hi. Pathian a i om chiang in thil haksa i maituah om ding hita lehleng tua te i maituah ngam ta ding hi. Na thupukna kei leh nang a ki nga ahi. Toupa deihdan maw ahihkeileh ei deih dan?

“Toupa tung ah leng kipak in; huchi in na lungtang deihlamte a honpe ding hi.” Sam 37:4

Simtute tengteng Toupa’n i thugelh te tungtawn in theihsiamna hon pia in hon vualzawl chiat hen.

– Thangginom Hangshing



Leave a Reply

Your email address will not be published.

*
*
*

× Direct Appointment