I gingtu hinkhua uh a hatsem na ding leh Toupa deih na bang a I om semsem theih na ding un lam hon hilh tu ding, hon pitu ding I poimoh uhi. Tulai a adah huai mahmah khat ahih leh mahni a dik kisakna, mahni thulou thusak louh na leh mahni hihna pen tawi sang ut luatna in I gingtu hih di bang un hon om sak thei kei hi. Hiai te’n midangte ei sang a koih niam zawk na lungsim hon nei sak a, tua ziak mah in mite thugente leh thuhilhnate I nek ding bang un I ne thei kei uhi. A hoih ding i deihluat ziak ua ki gensia i hi kei ua, i ki bawl hoih theih chiatna ding uh i deihna ziak un hoihlou i ki sakna te uh ki gengen hi zaw i hi uh chihleng I theih masak uh deih huai i sa hi. I Laisiangthou ua Sawltak Paul in Timothi leh Titas te a thuhilh a, api touh bang in tulai in ei gingtu te’n leng hon thuhilh tu ding, hon pitu ding Toupa’ neimi i poimoh uhi.
Mihingte’ mahni a hoih hun tawk i ki sak chiang un ei ah a diklou khat om ana hi sek hi. Mahni vuak ki enen a ei a diklouhna neilou i ki chih sung teng adik lou ana ki hi zaw hi. Ei i hih na i ki theih sang in midangte’n i hih na, i omdan, i gamtat kho-hel te a hon theih uh a om a, tua te’ mahni a ki theih ahaksa mahmah hi. Hiai ziakin midangte’ thuhilh nate ngaihpoimoh a poimoh dan hiai ah i theithei uhi. I gingtu hihna uh a khan semsem theihna khat tuh midangte toh i ki tuahna tungtawn uh leng ahi. Midangte’ apan in sinkhiat ding tampi tak i nei uh a, tua te’n i gingtu hih na uh hon bawl hoih toutou hi. Ei tungtawn inleng midangte’n kipahna, ki muh khiat thakna leh ki bawl hoih na ding a hon muthei uh a, tua mah bang in enleng midangte tungtawn in i hihna uh iki theihtheih na tan uh a om hi. Hiai a theih khelhlouh dia hoih ahi leh, midangte a ki etding i ki chi kei hi. I Toupa Jesu a i ki et masak gige ding ahi. Tua te banah I mihing pihte tungtawn in le khat-le-khat i ki hanthawn thei uh a, khat hoih na ziakin midangte’n leng ki bawl hoih na ding tampi tak i nei thei uh chih ahi zaw hi.
Awle tua i gente tuh tulai a poimoh mahmah leh michih in i hihna uh saulou a i ki mat theih na ding ua i gen ahi zaw hi. I gingtu hinkhua ua hon pitu ding leh lampi dik a i pai theih na ding ua hon thuhilh tu ding i poimoh chiat uhi. Hiai a thuhilh tu ding nang leh kei i hi thei a, a thuhilh a om ding leng nang leh kei mah i hi thei hi. Thuhilhtu apoimoh dan i Laisiangthou pansan in i en pah ding. Sawltak Paul in Titas a sin sak bang in, Titas 4 “Nungak deuhte tuh a pasalte uh leh a tate uh it ding leh lungsim hoihtak pu a om ding a a hilhtheihna ding un”. – v4.
“….Huai bang in, tangvalte lungsim hoihtak pu ding in thuhilh in” – v6.
“….Pitekte leng huchibang in, siangthouna toh kimeh, khohei a zahdan siam ding leh heh hatlou, uain hailou, thilhoihte zilsakte hizaw ding in hanthawn in.” – v3
Hiai a i sinkhiat theih a poimoh mahmah khat tuh tangval, nungak, pitek chihte agen a, tuate tuh mi piching ngen ahi uhi. Hiai in mihingte i piching ziak ua thuhilh ngai nawn lou i hi uh chih hilou in, thuhilh a i om uh apoimoh dan hon sinsak hi. Hiai thuhilhnate mah tuh (1 Timothi 5:2) ah leng i muthei hi. I theihlouh kal ua midangte sunatu in i om kha thei uh a, ahih keileh midangte ziak in haksatak leh gentheitak i om kha thei uhi. Ngaihtuahna a khial thei gige leh gamtat kho-hel a ta khial thei gige i hih ziak un tua bang thuhilhna te i zak mun uh a, i ki thuhilh mun uh apoimoh hi.
Thuhilhtu a hon pitu vuak hilou in thumsaktu ding leng i neih apoimoh mahmah nawn hi. Sawltak Paul in saptuam te a thumsak bang in enleng thumsak tu ding i neih a poimoh hi. “….Noute k’on phawk tengin ka Pathian kiang ah kipahthu ka gen hi. Na vek ua ding a kipaktak a thum a k’on ngetsakna teng ah.” – Philippite 1:3-4. Khenkhat te i hoihlouh na ua pat i ki bawl hoih theih na uh tuh hon thuhilhtu leh hon thumsaktu te ziak leng ahi. Kei personal testimony khat tuh ka hinkhua ah hampha ka kisa mahmah hi, hon thumsaktu ding mi bangzah hiam tak tunitan in ka nei tou den lai a, kakipak mahmah hi. Tua thumna te ziak a hiai bang a om thei ka hih ziakin Toupa min a thak in ka phat ahi. Hiai a lak khelhlouh dia poimoh nawn ahih leh hon thumsaktu te, hon thuhilhtute ziak a ki bawl hoih thei i hi kei ua, Toupa ompihna ziak kia ana hi zaw hi. Thuhilhtu leh thumsaktu te ei adia Toupa vanzat ana hi zaw uh ahi chih i theih uh apoimoh hi. Bang ziak a hiai tantan gen i hiam i chihleh i kipahna uh, i lohchinnate uh leh i thil muhdan uh, i thil etdan te uh adik louh khak ding i ki ven na ahi zaw hi. Khatveivei Toupa hi lou a mihing ki pahtawinate liansak zaw khadek sek i hih ziak ua i pilvang theihna ding ua i gen hi zaw hi.
“….Kipina pil omlouhna mun ah mite a puk ua: himahleh thupha gen tampi omna ah bitna om hi.” – Paunakte 11:14.
Midangte’ thuhilhtheih dia i om theih na ding in eilam leng ki man masak apoimoh hi. Mahni hih na kia dik kisa leh ki letsakna i neih chiang in pitu ding i nei thei kei hi. Jakob 4:6 “….Pathian in mi kisatheite a dou a, kingaineute hehpihna a penak.” Hon makaihtu ding a i theih Toupa nei te mah zong ni, nei nailou i hih lehleng i nu-le-pa te, i Pastorte uh ahi thei a, i sanggam te leh i lawmte leng ahithei hi. Hiai bang thuhilhnate ngaina in, limsakni, ei ading a goumanpha ahi a, i gingtu hihna ah ki vel chet na leng ahi gige hi.
A tawp pen in thuhilhtu manpha penpen i neihtu i Laisiangthou ahi gige hi. Tua mah simtam ni, i simte zui zou ding in pan la thak ni. Toupa ah ki enchian gige ni, thum tamni, i diklouhnate, i hoihlouhnate theihtheih na Toupa kiang ah ngen ni.
Saulou chik a i thugelhte theisiam a, ei adia poimoh omte zuithei chiat ding in Toupa’n simtute i tanchiat uah hon vualzawlsak hen!
- Thangginom Hangshing
(Laigelh toh kisai kupbeh nuam omleh, Laigelhtu +919615804759 ah thuzaak theih diing hi.)
25th November, 2020 | Weekly-Inspiration – 47