THUAK THEIHNA POIMOH HINA E!

I niteng hun zat dante uh en le hang bang hiam ngak i hi den uhi. Zing thoh apat i lup hun tan un ngak i nei sek uhi. Tuate bang hi hiam chih i gen kim zou kei hial ding a, i theihsiamna ding un annek ding ngak, lup hun ding ngak chih lel inleng a theihtheih mai hi. Mi chih in niteng a i poimoh uleh i taksap uh a om chiat hi. Khenkhatte maban a khosakna ding ngaihtuahna bang, sepna zongna ah bang, ahihkeileh zi-le-pasal ding zonna ah bang leh lam tuamtuam ah i poimoh uh aom chiat hi. Hiai te i buaipih lailai un Toupa hon chingtu muanhuai ahihdan mangngilh louh a, lungke lou a Amah a muanna ngak a, ngakzohna leh thuak theihna neih apoimoh mahmah hi.

“Toupa tuh hon chingpa ahi a; ka tasam kei ding hi.” – Sam 23:1.

I Toupa phawk zou gige a, Amah a ki tulut zou gige kihile zaw lungkhamna i na neihsekte uleh i buainate uh a puak dan le omdi hia. Himahleh eitung a haksatna leh buaina hongtung chiang in Toupa ngak a, Nang deihdan hong hihen Toupa chih ding abaihlam kei hial hi. Ei adia hoih zaw ding ahi chih theihtheihna chian i neih hun tan unleng i buainate uleh i lungkhamnate uh i khahkhe nuam kei lai uhi. Kei mimal hinkhua mahmah a leng tua bang a ana om kha zel ka hihziakin haksa ahihdan katheisiam mahmah hi.

“Amah ngakte kiang ah Toupa a hoih, amah zong mi tung ah.” – Kahlate 3:25. Hiai Laisiangthou thu tuh kei adi mahmah ahi chih theih chiat a poimoh hi.

Buaina a tuak lou ki omlou a, michih i puakdan uleng a tuam chiat hi. Khenkhat in puak lah chihtak in i polah ua, khenkhat lah bang chituk in buainate tuak zel sam mahle uh awlsam takin a pothei uhi. Himahleh Toupa a lametna nei a Amah ngak teitei te ading in polah in polah kei lehang leng lungmuanna neih abaihlam zaw a, i bitna na pen uleng ahi hi.

Hiai leitung a hun tomchik i hinsung ua kipak den ding, nuamtak a khosa dending kihi mahmah lou ahihziakin a kalkal in haksatna leh buaina i tuah hun uh om ding mah ahi hi. Buaina leh haksatna i tuahte uh tungtawn apan in zillai lak ding leh i muh thak ding uh a om gige hi. I tung ua hongtung bangbangte Toupa apat leng ahithei a, eimah khelhna ziak a i tuah khak uleng a om thei tham hi. Himahleh bang peuh i tuah hun un tuate Toupa muansemna ding in zangthei chiat hileng i niteng hunzatnate uah a hon panpih mahmah ding hi.

“Ka unaute aw, na ginna uh ze-etna in kuhkalna a siam chih thei in, khemna chiteng na tuah chiang un kipahna ngen in sim un. Na ginna ze-etna un kuhkalna a siam chih thei in.” – Jakob 1:2-3

Laisiangthou a Sam laibu chu hiai bang hunte a sim gige ding in ahoih mahmah a, amanpha mahmah mai hi. Buai hun leh beidot hunte a i galvan hoih penpen tuh Toupa phat ahi chih hiai sam laibute’ apan inleng i mu chian mahmah hi. I hun awlte vuak ua sim mai hilou in, buai pipi a i om hun unleng Toupa ading hun pe thei teitei hileng amanpha mahmah ding hi.

Ka mangbatna a kipan in Toupa ka sam a, Toupa’n ahon dawng a, ahon suaktasakta hi. Toupa tuh kei lam apang ahi a, ka lau kei diing; mihing in bang ahon chih thei dia? – Sam 118:5-6.

Khovel kitaitehna a khosa i hi uh a, siam pen hih utna, hauh utna leh midangte tung a tungtuang utna delh in niteng in i hunte uh i zang bei gige uhi. Tua bang hilou te’n lah mahni nopsakna ding kia zong hileh kilawm in i hunte uh i zang uh a, i hun neihte uh phattuamna omlou in i zang bei uhi.

Hiipi leng ziakin inlam a bangtan hiam hun ka zangta a, tunitan ka omna ah Lamka khosung a mi omdan, mi hunzatdante ka muh a ka theihna chian aom mahmah ta hi. ‘Aw ana i gam simthu’ chih laa Htp. Pumkhothang laphuah bang ka lungsim ah hong kilang sek hi. I Lamka khosung ua mi om dang a sungthu taktak thei vek himai zenleng lungkham huai chih inle agen kha nawn keihi. Pathian lauhna a tawm mahmah a, Amah adia hun zang a Laisiangthou sim ngitnget a vang mahmah ta hi. Himahleh Toupa’n tunitan i gam uh hon kepbitsakna ziak, nang le kei i bitna ziak uh zaw Amah adia gin-om leh chitak mi bangzah hiam a om ziak hikha ding hi. Toupa mai a hoihna khat le neilou I hihdan uh kiphawk a, tua i om dan te uh ki-en thak a Amah adia hun i piak uh apoimoh mahmah ta hi.

“A guuk a thil ahih naakte utuh, agen leng azumhuai ngal a. Huan vak a thil tengteng phoulaak ahih chiang un, chiantak in ahihna diktak uh adawk hi; thil tengteng muhsak a om saktu lah vak ahi ngal a.” – Ephesate 5:12-13.

I thukhitna dia i gen utpen ahihleh buaina tuaklou ding ki-om lou hi. Nuamsa ding a om kihilou ahihziakin i tung ua haksatna hongtung hun omlou theilou hi. Tua bang hunte a thuak zou ding leh Toupa a kinga mi i hih uh apoimoh mahmah hi. Eimah hatnate suang ding khat mah leng aom kei a; i hoihna uh om sunte leng Toupa apat i muh uh ahi chih i phawk thakthak ua Amah a kingak louh zaw leitung a i buaipih ding uh aom keihi. Khovel thilte en a buaipih pen a neilou in Toupa a kibulphuh na taktak neichiat ding in kisa thak ni. Mihing in i sih hun ding uh kigen theilou ahihziakin sihnung a vaihawm hun a i omchiang in koi ah i om dia? chih kingaihtuah chiat in Toupa kiang ah ki laan khethak ni aw.

“Nite ahoihlouh jiak in, hunlemtaang na neih peuh uh ahoih theipen in zang un. Huaijiak in hai kei unla, Toupa deihlam bang ahi hiam chih thei zaw un.” – Epehesate 5:16-17.

Toupa’n i thugelhte tungtawn in theihsiamna leh Khamuanna i tanchiat uah hon  piak i ngen a; theihna bukim louh ziak a i  gen khelh omte angaihdamna i ngen lailai hi.

  • Thangginom Hangshing

 (Laigelh toh kisai kupbeh nuam omleh, Laigelhtu +919615804759 ah thuzaak theih diing)

11th August, 2021 | Weekly-Inspiration – 80

Leave a Reply

× Direct Appointment