SINGTANGMITE’ KHRISTMAS

Khristmas Ni vaidawn ding leh lawm ding in na man ta hia?

Khristmas i chih chiang in, mi tampite a di’a innkuante leh lawm-vualte toh hun nuamtheipen a zat khawmna hun himahleh, bangzahhiamte adia lunglen daan chituamtuam tuntu ahi.
Khristmas anaih deuhdeuh leh, mi khenkhatte a di’n zu-le-sa, khamtheih leh kihaisakna chituamtuam a hun zat mangthai ding chih hileh kilawm khop in hun azatdan uh kikheng hi.
Nungak-tangval leh khangdawng tampite adia numei-pasal lam (sex) a thanghuaitak a omtheihna hunlem zon hun hiding hi; lawm-le-vual toh sa-lam nopsakna ding hiam, ngaihzawngte toh hunlem zattheihna ding hiam a ‘Carol’ leh saptuam programte suanlam a zang leng mi tampi hong omding uhi. Papi khenkhat a dia, zi leh ta khuallou zen a nungakte toh hunlem zattheihna ding a zuau gen a buai hun hong hi dia, Nupi khenkhat tangval saina in buai omding ua, a khenkhatte lah, pasal leh tate limsakman lou zen in van thak buaipih in om ding uhi.

Khristmas Ni a tunma, zan bangzah hiam akipat in Khristmas’ Late, kham philh-phelh kawm a khahkhia a, ki-haikou zoi-zoi a, ki uangsaktak a kholai fang pawl leng hong omzel ding uhi. I Pathian uh huchi daan khong a phawk ut hileh, tuni’n Singtangmite i dinmun uh hichi siat lou ding hi.
Gitlouhna suah ut himhim a kisaan pawl hong om get ding ua, kisual leh kisattuahna thawm hong omzek maithei ding hi. Thunei leh kiphasak ut pawl khenkhat, banghiam ziak a mi ngiik hiam ahihkeileh ki-ngiiktuah ding hiam hong om maithei lai hi. “Lem leng hen” chih hunbi hong tun chiang a Ei Singtangmite buai utdiak hileng kilawm hi. Lamdang!
Mi khenkhatte, van thak neihlouh ding ziak a Khrismas Ni lin mahmah leng om ding uhi. Jesu Khris lawm ihi uhia ahihke’h vanthak neih kidem? Huchikawmkal ah, mi bangzahhiamte, Khrismas bang hou sa gawp a, ahunbi veng meng dia deih bang leng omkha ding hi.
I thilchiinte uh ahoihlou teng kia hon taklang mahleng le, a hoih leng om tham hi. Bukimna leh siatna himhim omlou dia lamen hizolou in, ahoih sang a asia tamzo ahihziak in puaknat huai lua a, genkhiaklouh theihlouh suak hi.

Azualpi hiaiteng baan ah, “pistol lem a kappuak kap a i naupangte buaisak a, khangddawng leh piching khenkhat natawm haihuaitak a halpuak ngaihtaktak a haal leng hong omzek maithei” chih gelh tel ka sawm laitak in, halpuak leh kappuakte khamna philantrophic organization tuamtuam in Joint Press Release a bawl uh kava mukha chet a ka kipaak petmah hi. Ei Singtangmite’n i hihpeuh ah, i seppeuh ah, thupuukna leh vaihawmna peuh ah hitaleh, Khristian ihihna uh akilat gige poimoh ahih ziak in, hichibang khaamna in hon ki aansak mahmah hi. Immanuel in ei Singtangmite hon taisan lou ahihlam hiai thusuah tungtawn in leng kimuthei hi. Pathian kia ahi i kigawmtheihna ding uh chih i theih uh leng poimoh hi. Jesu Khrist in Amin thupi eite lak ah thupizo sem in hong thangsak zel henla, A thupina in hon ki-gawm sunzomsak zel hen aw.

I biakna lam toh kisai a kisakkawlna leng gen zek le’ng uthuai kasa hi:
Tha-le-zung, sum-le-pai leh hun tampi seng in, Khristmas lopna di’n lam tuamtuam ah ikisakhawl a, hoihthei in manphathei lua hi. Tangtawn sihna akipat a hon suaktasak Khrist Jesu, Khrismas ni kia lou a leng i lop luat ding uh ahi.
Huchi kawmkawm in, pilvan leng poimoh mahmah ta hi’n ka thei hi.
Tumlam gammite (sapte) a tangpi in i ngaisang mahmah uhi. Amau mah Gospel hong pawlutte ahi zomah ua, Pathian hing be khalou hileng bang zaw, amaute kibe ut phial leh kilawm in kilang hi. A huchih ziak mah in amau chiindan tampitakte etton a nei in, changkanna in i koih uhi. Amau suangtute’ thugousiah leh tawndaan, Pathian hing a biakma ua a chiin te uh, Pathian hing a biak nung ua leng a khahkhiak vek louh uh om hi. Huaite hei lamdang ua, biakna toh kisai tawndaan a azehtelte uh, singtangmite’n (mimal, innsung leh saptuam) ina aangvaan atam sim ta hi. Tu diakdiak in computer leh internet ziakin Khovel neu gawp a, Tumlam gammite chiin i koppihte uh (Khrismas lopna toh kisai a) i pii bawl zo deuhdeuh ta uhi. Khris neu deuhdeuh a, a Birthday lopna thupi deuhdeuh hi. A birthday (ei mihingte’n i bawltawmsak), ei nuamtuamna dia i lop pen, A hehpihna leh zahngaihna ziak in hon saansak hiding in i ngaihtuah hi. Himahleh, en, Amah pahtawina leh angvaanna a zangkha nawnlou in mihing vai a nopsakna leh bangtan hiam a, ikisiamtanna ding a, A pianchampha lawm kihi ta in ka thei hi. A hi huau-huau leh anopsakna hahbuaipih law mahmahta in, I hondampa val hita chih ka ngaihtuah khak chiang in, ka lungtang a na vulvul hi.

Apoimoh hi hetlou napi in, innsung hi’n Biakinnte hitaleh, chei dingin ikithalawp mahmah uhi. ‘Christmas tree’ lianpipi te, sum tampi seng in, nalh taktak a chei in biakinn sung khong ah i koih hial uhi (Huai singkung chei in khalam a i khanna dia bang semkhia a, hon bang chi panpih ahi di?). Biakinn natawm chei poimoh salou ahihdaan Toupa Jesu Khris’ kamsuak Luke 21:5-6 ah kimu hi; tangtawn daih ding thilte sang a tangtawn daihlou ding khovel thilte apoimohtan khel a thupi zo a koihlouh ding chihna ahi. Santa Claus (Khrismas puteek) leh a uniform diakdiak; Khrismas lopna toh kisai ah sunglai tangsak in, i paakta mahmah uhi. Pathian hing biakna compound sung ah Santa Claus, milem phuahtawm leh bawltawm ahihlam thei kawmkawm in, Pastorte leh Upate theihpih leh lemsakpih a koihkhe liau-luau pawl bang ana ki-om hi. Poisakna ding a poisalou a, poisaklouhna ding; Khalam vai thilte khong soisel a, kilehlak tak a bangtan saptuamte, Pathian mai a kizuak a om ding ihi ua? I gam, khotang leh saptuam dinmun sia kua ziak hituan eita? Nang leh kei thulimlouh ziak mah himai lou mo? Asiatna dia thohkhak neilou kichite’n leng, dai dide a asia leh adiklou omte et thoh hikha thei kihi hi. I hih ding thei zen a hihlouh leng khelhna ahihlam phawk ni (Jacob 4:17).

Khrismas Ni hong tung a, zu-le-sa, ganja, khamtheih-guihtheih, ‘sex’ leh khelhna chiteng a pengnawng in, taksa polam silsiang vilvel in, van hoih pipi a chei in Biakna programte Biakinn teng dimlet zen in i uap uhi. Nitaklam annkuang kilui sek pen leng, saptuammite kinaih sem na’ng leh ki-unau nading a zang zolou in, innkuankuan a kihuituam tuktuk in, ann nekkhawmna phual a va pang zual in, innlam kinoh deuh in iki zot chiat hiau uhi. Khrismas’ ann nekkhawm omzia; Khris a i unaute toh i kinaihsem na’ng ahihna dau petmah ta hi (Nasepte 2:46). Tutung zaw, ann ne a i kuan chiang un, i kiim ikiangte leh midangte va houpih in, va huai ni maw? Huai hun tomchik pen manphatakin kikantuahna ding a leng zattheih ahihlam thei chiat ni maw?

Tutan a ko’n taklatte Khrismas hihna leh lopna ahoihlouhna ngen mah ahi. Khrismas lawm hinapi in Khris toh kisai kha mahmah lou a, Khris mel kilangkhe lou ahihziak in i taklat a, i gengen poimoh hi. Kikhekna a omna ding a i hihtheih omte lak a amasa pen ahih leh, thil omdaan diktak genkhiak ahi hi. Za-ah-za (100%) Khristian kichi Singtangmi atamzote lungput leh omdaan a kipat i muhtheih ahihleh, Pathian honsapna toh kituak a, i hinkhua te uh, zangkha teuhlou ihihlam uh kilang chiang mahmah hi (Ephesians 4:1).

Kou Mumbai lamte’n leng lenkhop nuam kasa thei mahmah uhi (EBCC leh ZCF ka theihphaak tan ahi). Huaidaan in muntuamtuam ah leng Pathian phatna leh pahtawina, Amah phatna late leh Amah ngaihna late sa a, limtak leh nuamtak a lenkhopna om law tham ding hi. Ahia lah, mun khenkhat a lenkhop khong kidem bawl chih bang, mike ngaihtaktak a ki khawng-tuah vengvung, kho khat a om, saptuam tuamtuamte’n ki elna khong a zangkha ihih leh, Pathian pahtawi hi kha lou a lasak a bengseng kidem kihimai hi. Koi Saptuamte’n Biakinn chei nalh zaw a, koi saptuamte’n Khrismas zangsawt zaw chih khong a kidemna in Pathian pahtawikha hetlou ahi chih thei ni. Pathian leh A Sapum Saptuamte paulam a mihingte ki-el ihi lel uhi.

Lenkhopna khenkhat bang, kisuklimna tamthei lua a, Pathian biakpiakna ahihlam beisak thei hi chih thei ni. Amah i biak Pathian siangthou lua ahihman in Kha leh Thutak a biak ding hon ngiat ahi chih leng chiamteh ni (John 4:24). Mihinglam leh khovel vai a nopsakna leh kipahna ding zong a huaite i piibawl luat uh hiveh aw i paisual naak na uh. Toupa Jesu’n khovel nopsakna piibawl dia A sisan mantam tak leh gimthuakna chiteng thuak a, hon tankhia a, hon sap hilou ahi aw, lawmte! Ei leh ei kingaihsak lou a, i Khros kipuak a, I tangtawn mun, a nungzuikawm a zuan ding a hon sam ahihlam gen tam lua chih omlou hi’n ka ngaihtuah hi (Luke 9:23). Khovel a om a, khovel paidaan a pai lou a, lungsimte hihthak a kikheklamdang ding a hon deih, leh Ama’ deihdaan zong ding a Thu honpia Pathian ahi chih ki phawksak thakthak ni (Romte 12:2).

Khrismas hihnatak bang ahia?
Ei Khristiante a ding in bel, Khrismas omzia taktak ahih leh, Khovel Hondampa Jesu Khris pianchampa leh Amah ngei lopna ahi. I Toupa Jesu, mihing hong suak a, ei mikhial niin mahmah, ‘tangtawn meidiil’ tang dingte, hunkhia kia hilou a ‘tangtawn hinna’ hon pe ding a, ahong pianni lopna dia kumkhat a khatvei Khrismas i zat luat ding mah uh ahi. A hong piang ngei ahi chih iki phawkthaksakna ding in leng poimoh a, a manpha thei pen a zat isawm ding mah leng ahi. Himahleh, Khrismas hongtun teng in kha-lam vai ahihna hong kiam hiaihiai a, sa-lam vai in hong kihei hiaihiai ta hileh kilawm in hong kilang khe deuhdeuh hi. I sapum khial leh niin himah leh, Jesu Khris ziak a Pathian’ Temple ahihna bang a puahpha zawlou a, polam kizepna leh silh-le-ten a thupi taktak a chei ekek chih khong i poimoh koih zawta uhi. Khrismas ahihleh Jesu Khris ah ngiim in khohsak (focus) le hang, ahihnatak ah lawm kha kihi mai ding hi. I dinmun hichi ahihlam phawk a, vei a, pawna mahmah bangzahhiam ki om di’n ka gingta hi. Huchi ahih leh, thil hong kikhekna ding a pan la ding in iki hanthawn hi. Midangte i lametna tan kia in beisak nawn kei ni. “Ke’n kana hihtheih omte ka hihta ding” , “A pantu in ka pang ding” chi a, chihtakna toh sa-lam sang a kha-lam piibawl a Khrismas lop pantu hi ding in thupuukna na la thei hi. Na la ngam diam? (Jacob 2:14-26; Jacob 1:22-25, Matthai 5:16)

KHRISTMAS MESSAGE Pathian in hon piakte hiate ahi uhi:
1. Naungek Jesu Khrist bawngbuk a hong piang, gan annpiakna a sial a om chih thudik mah ahihchiang a gen ding mah leng hi. Himahleh, Khristmas toh kisai a I Kumpi leh Hondampa Jesu Khris i gen chiang in, niamchik a ahong piandaan, gen thupi pen in inei sek ua, simmohna ding a zang ihi ta uhi. Niamchik a ahong piandaan i gen mun tuk un, van Pathian Tapa; Kumpite’ kumpi, Toupate’ Toupa ahihlam leng gen mun zawta le’ng, zahtat leh lauh ding ahihlam kiphawk thei zawdeuh ding hi (Kilaakna 19:16).
Isai 9:6-7 ah, ‘vaihawmna a liangzang ah a tuang ding a; a min Lamdang, Lemthei, Pathian Hat, Khantawn Pa, Lemna Lal’ chi in A thupina chiantak in a kigen vele. A kingaihniamna kia genkhop hang a, poilua hi.
‘David tutphah tung ah leh a gam tung ah a vaihawmna khandan leh lemna in tawpni aneikei ding, hihkip ding leh tua kipan a khantawn tan a leng vaihawmna leh diktatna tungding ding’ chi a mohpuakna thupi piak a om ahihlam leng i mu hi. Toupa Jesu Khris hihna thupilua hi. Hichituk a thupi leh lamdang, haat leh thilhihthei, diktat leh siangthou Pathian in eite hon iitziak a, ei mimal lungput leh dinmun dungzui a, i batphaakna tantan chiat a i na pomtheih ding a, ahong kisiamna pen, nelhsiahna in ina zang zawta uhi. Den chiang a Angel simsenlouhte toh Khovel thutankhum diing leh vaihawmkhum diing a Ahong pai chiang in, zekai hita ding hi. Ahunlai in, anaih lai in, zong thak leh thei thak ding in kisa thak ni. (Isai 55:6)

I Toupa’n hon khual ziak a, i theihsiam theihna ding leh pomtheihna ding kia hilou a, Ama’n leng hon theihsiam a, i tung ua a zahngaihtheihna ding leh kisuanglah hetlou a akiang i zot ngam na ding a mihing a, dinmun niamchik a hong piang hizaw hi, i simmohna ding uh hizawlou in (Hebrews 4:14-16). Toupa Jesu Khris pen i pianthak chiang in i Kumpi leh Hondampa ding a sang ikichi sek hi. I Hondampa ding a saan pen thanuam mahle’ng, i Kumpi ding in kisang utngellou bang zel hi. Tanchinhoih (Gospel) pen bukimtak a sang kichi ding ihih leh, Toupa Jesu pen i Hondampa kia hilou a, i Kumpi leng ihihsak ding ahi. Jesu Khris Kumpi ahi chih ki hilhhilh ding in poimoh kasa mahmah hi.

2. Mihausa leh mithupi daan a hilou a, mi maimai daan a, mun leh dinmun niam tak a hong piang, ‘giahnamun ding natawm tangzou lou’ chi a i ki khasiatsak uh leng tawpsan ta ni. Va hehpih lawkha a, eite Tanpa ding a ahihtheihna neplua a koih khakha leng ihi ding uh. Pathian pen ei va hehpih ding hizawlou a, ei a dia Ahong kipiakzohna leh athuaknate pom a, Amah Kumpi a saang a, bia a, i hinkhua pen Amah thumanna a zat ding hizaw hi. “Mi zawngte leh gentheite a ding natawm a kipiaktheihna ding” chih leng hah gen law zel hang a, mi zawng leh gentheite piakbawl a, i puanten asang-asing man te toh, i suit mantam taktak te toh, saptuam leh khotang a i hihna uh thupitaktakte toh kiniamkhiak haksa simpi leng hiding hi. A mizawng leh genthei kichi te’n lah Toupa Jesu in hon hunkhia a, hon tawisang a, thilhihtheihna leh vualzohna hon pe ut ding a gingta zou nawnlou leng kihi ding hi. Miihing suangtuahna daan a, mi zawng leh gentheite i muhsit bawl bang a I hondampa leng mizawng leh gentheite toh dinmun kibang a koihkhawmkha a, musit hitel ihi uh. Lawmlawm! A diktak a, Laisiangthou a Jacob 1:8na gingta ding ihih leh, Jesu Khris ana saangte himhim mihingte suangtuahna a dinmun niam himah le uh, Pathian in adinmun uh sangpi a koih ahihlam kigen hi. Pathian in Jesu Khris ziak a ahon koih thupidaante leh hon koih saandaan te khong gen mun deuhta le hang, vualzawhna leh vualzawlna lam a kal kisuan tam ding a, manpha law ding hi. Jacob 1:9 ah khovelmite’n mihausate ngai thupi in biak bawl tuttut in, a maipha uh zon kithalawp mah le uh, suun khat nisa in ahai vul zel paakpalh bang a, athupina uh daihsawtlou ahihlam leng kigen hi.

Khovel a i zawnna leh hauhsakna, saptuam leh khotang a i hihna, numei ihihna hiam, pasal ihihna hiam toh tangtawn hinna leh Pathian Kumpigam a i tanmun ding in kisai khakna neilou himhim hi.
Pathian lauhdaan sin a, Jesu Khris’ Kumpi a saang a, thumangtak a anung zui chitchit te kia in
tangtawn hinna ngah ding ua, Pathian Kumpigam a tanmun thupitak nei ding uhi.

Lazar leh mihausapa’ tangthu itheihsasa hileh leng, taklat ut ka neihziak in, genthak zual leng ka chi hi: Lazar ahihleh mizawng ahi a, gentheihna, zawngkhalna leh natna in dim mahleh, vangam tang hi. Mihausapa ahihleh meidiil a tui taakkhat maimai a leimong a taaksak ding a ngen ngutngut hitel ahi chih leng athu a itheih dimdem sa uh ahi. Himahleh, ataktak gam ah, i tu dinmun ua kipat a ka muh ahihleh, mihausapa’ khovel hihna eng leh deihgoh ngoihngoih atamzaw kihi ta hi. Ei deihtelna a tel theih hileh, Mihausapa’ lei hauhsakna leh thupina tel ding in a tamzawte amansa uhi. Huchituk a Setan in i lungsimte uh hekkawi hita maizen hi. Atamzawte’n tangtawn hinna channgam zen a, lei hauhsakna leh thupina deih zo hitel ta uhi. Hiai i lei khualzinna tomchik petmah sung a i lampi tot pen in, i tangtawn gam hon tun ding ahi hia, ahihkeileh meidiil hon tun ding ahi zaw diam? chih theihkhenna ding a kivelchet chihte khawng bang kipeih nawnlou hi. Khovellam a hauhsakna, thupina leh nopsakte’n i Pathian’ mun luahta hi. Dahhuai lua.

3. Mihingte kiang a tangthupha, Jesu Khris hong pianthu Angel khat in Belampute kiang ah ava puang masa pen hi. Belampute mi zawng leh dinmun niam ahihlam uh i gen naak uhi. Hileh leng, Tanchinhoih atak a hong tangtunna zakha masapente leh apuangzaaktu (evangelist) masa pente ahihna uah, a dinmun uh athupi daan leh azahtathuaidaan uh i gen kholkei uhi (Luke 2: 17-18). Belampute’ zawnna leh dinmun niamna i hahgen ziak un, mi tampite’n i Toupa Jesu toh zawnna leh dinmunniamna mekbelh in, nawlkhin uh hi’n ka thei hi. Belamchingte ahihleh, Leilam a Amah hihna koppihtute ahihziak ua, Ama’n ngaisang mahmah hi. Belampu hoih toh Amah kitehkhin hitel hi. Belaampu hoihtte’n a belaamte uh awlmoh ua, kizopna hoihtak neihpih uhi. A belaam te uh a dia ‘Pu’ hi ua, thumangtak a azuihna ding un kipumpiak in ching uhi. Belamte’n a Pu’ aw kia akipat in thupiak zui uh a, achih bangbang in om ua, a pii na lamlam ah muangtakin zui uhi. A pu’n amau kem bit in khotuah mahmah a, huchi kawm kal ah, khat lel leng vaakmang a aom khak leh thuakzou lou a, 99 te taisan zen in khat vaakmang pen zong ding in kuankhia hitel hi. Belaampu hoih leh a belaamte’n kiguizopna hoihtak aneih bang ua, i hondampa eite toh hoihtak a kiguizopna ineihtheihna ding a, eite a dia hong kipumpiak hitel hi. Belaampute dinmun niam sa a, i simmoh bawl dan ua i hondampa Jesu Khris leng ki simmoh kha hitel veh aw. Dahhuai lua!

4. Luke 2:9-13 a kipat itheihkhiak ahih leh, Toupa’ angel khat, belampute’ kiang a Naungek Jesu Khris hong pian hilh ding in va kilaak hi. Jesu Khris’ pianthu, thumanpha akipuankhiakna ding in Pathian thupina kiselzoulou hial in a kiim uh a taanvak hi. A thupi daan! Angel khat kia sawl himah leh, chang 13-14 a i muh bang in, Vanmite kisuumzou mahmah lou in, “Tungnungpen ah Pathian thupi hen la, leitung a a kipahpih mahmah mihingte lak ah lemthu leng hen.” chi in mihingte ading a lametna hongtung puangkhia in, Pathian phat zuazua uhi. Chimulthohhuai hilou maw, hiaite khong? Na ngaihtuahna uh ana taisak mah dih uh, Thupilua eive, i hondampa Jesu Khris! Nang leh kei a hon iit ziak a, tupmawng a, Pathian ahihna pen kitheihmohbawl a mihingte hihna hong koppih hitel eive!

5. Suahlam mipilte i gen kha gige hi. Amau tungtawn a Pathian in hon taklatte suutzek leng uthuai kasa hi.
Bible sutsiamte gen dan in, hiai mipilte (Magis) ahih uleh, kumpi bawlte (king-makers) ahi uhi. Kumpi Darius hunlai a, a kumpi vaihawmna a Daniel in a makaihte ahi uhi (Danial 2:48). Amau ahih leh, sahkholam a siamna hau mahmah, gamsung pai daan leh vaihawmna lam a siamna sangtak nei leh pil mahmah a zahtathuai petmah pawlte ahi uhi. Daniel toh hoihtak a ana kithuah khawm ahihziak un, Jesu Khris hong pian ding le ana kikhilh ngei uh hiding a, huchia akhang a ana kihilh sawn zel ua, ana suizom zel uh hiding in Bible suutsiamte’n gen uhi. Kumpi bawlte ahihziak mah un, Kumpi Jesu hong pian tak in, Kumpi a bawl ding leh be ding in gamlapi akipat in ana kuan vengveng uhi. Amau athilpiakte un gennei ahi chih, Bible siamte’n gen uhi. Dangka-eng (kumpi ading a thilpiak kilawm), Begaw(sathau namtui, siampu ahihna toh kituak) leh Murrah (sathau namtui mah, misite vuina a ana kizang, asihna di toh kisai a gen nei) in naungek Jesu Khris va en in, amai a va kuun in va bia uhi. Hiai suahlam mipilte ahihleh, mipil kia hilou in, mi hausa mahmah leh thilhihtheihna thupitak neite ahi uhi. Mipil, mihausa, leh thilhihtheina nei, mi thupi bangzahhiam gamlapi a khualzin khe ding in suak leh sepaih toh kuan ngei ding in gingtathuai chi uhi. Huchibang a, akaihzatam teng utoh thupitak a kuan lou a, amau mi bangzahhiam kia kuan hile uh leng, Kumpi Herod in zahtattak a ana vaidawn daan akipat in, ahihna uh thupi ahi chih theihtheih hi. Ahih ding uh khamlou a phutluih leh banghiam loh ngamlou hileh kilawm in Bible ah imu hi. Huai akipat imuhtheih ahihleh, Mi zahtathuai leh milauhhuai ahi uh chih ahi.
Kumpibawlte ahih ziakun kum 600 paisa akipat a, Kumpi Jesu Khris a pian diing kigenlawk ahihna bangbang in va bia in va pahtawi uhi. Hiai suahlam mipilte ahihleh hauhsakna, pilna leh thuneihna thupitak tawite ahihman un, amau Kumpi Jesu mai a kuun a, abiak chiang un, khovel a thil thupi penpen tengthum; khovel’ hauhsaknate (wealth), khovel’ pilnate (wisdom and knowledge) leh khovel’ thilhihtheinate (power) huaini in Jesu mai ah kuun khin chihna himai ahi. Khovel thupina tengteng Jesu Khrist ngeklai in Amai ah kunkhin ana hitel veh aw; ngaihnepna di mawngmawng omlou hi. Thupi lua, I Hondampa Jesu Khrist thupi lua hi. Halleluiah!

6. Isai 53:9 ‘Huan, hiamgam a hih ngei kei a, a kam ah khemna himhim om ngei kei mahleh, a han mi giloute kiang lam ah sehsak ua, a sih nung in mi hausa kiang lam ah a om hi.’
Gutate leh migiloute toh asihdaan uh kibang mahleh, asihnung in bel mi hausate kivui daan in kivui hi. A mihing luang pen, tomchiksung lel ding himahleh, kilawmtakin leh duattak in sial (vui) in om hi (Johan19:39). Pathian in A Tapa tang neihsun ei migilou leh kihhuaite khelhna tatna dingin in asih phal mahleh, migilou te’n simmohtak leh nelhsiahtak a abawl ding uh aphalsakna tan ana om ahihlam hiai i changtel in taaklang hi.

7. Nasepte 13:37
‘himahleh Pathian kaihthoh in zaw muatna a mu kei hi.’
Jesu Khris taksa a kivui hunsung tan mihing kivui khinsa muatlou chih omlou hi. Amah, i Hondampa ahih leh, mihing’ sapum bang pu in, mihing dan in hong si mahleh, mihing vui in kivui mahleh, mihing taksa muatdan a Pa’n a muat ding ana phallou hi. Huchituk a koihchituam a koih manpha ahihlam thei ni.

Thukhitna:
Lungsung tawng a hon khamuan leh tha hon pesek khat ahihleh, kilkhat a mi khat-le-nih, Pathian lau leh diktattak a, kuamah pahtat leng lohlou a, Pathian Gam Nna sem ngitnget avangkim in ka mukha zel hi. Pathian sapna Aw kichiantak a za a, Pathian a iitna uh hinkhiakpih a, asep ding uh om bangbang, gim-le-tawl leng khawksalou a, sum-le-pai leng chiil hetlou a pang ka mukha zeuhzeuh hi. Lungtang tengteng, hinna tengteng leh lungsim tengteng a Amah iit ding a Thupiak zui dia panla, leh a Innvengte Amau ki-iit bang a iit ding a thupiak theihtawp a kalsuanpih omte bang ka muhkhak zel ziak in kipahhuai kasa hi. I lak uah Pathian om ahi chih ka chian hi. Amah kiang ah kik in, Amah thupi pen in koih le hang, innsung, khotang leh Saptuam in damna kingah diing hi. Singtangmi nam tuamtuamte kituah theihna ding leng Pathian kiang kia ah aom hi. Amah naih deuhdeuh leng, eite leng kinaih deuhdeuh diing ihi.

Asia tampi lak ah, Pathian in mite tungtawn A nna Asepte mukha zelzel diing a mitvaakna leh hamphatna a hon vualzawl ziak in Amin thupi ka phat hi.

Sam118:23
Huai tuh TOUPA hih a hi a; I mitmuh uah a lamdang ahi.

HALLELUIAH! AMEN!

Simtute Toupa’n Amah lungtuak in Khristmas hon zangsak chiat hen, Jesu Khrist min in. AMEN.

– Chingngaihlian Tunglut

December 21, 2019/Article No. 14

(Laigelh toh kisai kupbeh nuam omleh, laigelhtu +919892316430 ah thuzaak theih diing hi.)

 



One Comment

Avatar
T Roumuan
January 2, 2020 at 5:51 pm26

Hoih lua.. 👍👍👍

Reply

Leave a Reply

Your email address will not be published.

*
*
*

× Direct Appointment