SAWINA HAKSATNA I TUAHTE ZAW I KHALAM KHANGNA DING ANA HI ZAW HI

Mi tamtak te’n sawina I tuah ding uh pumpelh sawm hileh ki lawm in, tua bang te I tuah ding uh I lau in I  lau thei uhi. Himahleh hiai bang sawina haksatna I tuahte’ zaw I Khalam adia poimoh ahih dan leh, I Khalam dinmun hon suhat tu leh hon khangsaktu ana hi zaw hi.

I niteng hunzatna a tunitan hiai bang sawina hiam haksatnate’ tuak ngeilou ka hi I kichih leh ei ah adiklou om ahi zaw thei hi. Gingtu khat leh Jesu nungzui I hihna uah hiai bang haksatna leh sawina te chu I mai tuah louh theihlouh hun uh a hong om hi. Hiai bang tuak kha nailou I hih leh I Khalam dinmun leng I ki et thakthak a hong poimoh kha thei hi. Sawltak Paul in, “….Ahi, kuapeuh Khrist Jesu Pathian limsaka om tum photphot in sawina a thuak sam ding uhi.” – 2 Timothy 3:12. Sawina i chih thumal khat in mitengteng thiltuah a gen kim kei hial ding hi. Mihing te lunglutna a tuam dungzui in leh khosakna dan in tua bang sawina haksatna I tuah te uh aki bang kim vek kei ding hi. I theihsiam sem na ding in sawina I chih in bang teng uam kha a chih dotna a om thei hi. Nidang lai a gingtu te sawina tuamtuam I theih a om hi, Vuah na tuak na bang (Isai 50:6), Suang a deng bang (Nasepte 14:19), Chiamnuihbawl na’n bang (Luke 23:11), Khosung apan hawlkhia na bang (Nasepte 13:50; Johan 9:22), Suangkulh a khumna bang (Mark 6:17) leh sawina tuamtuam Laisiangthou a I muh theih tampi tak aom hi. Tulai hun a practical mahmah khat a ka theih etsakna na ding in houchik in enleng, ei dikna mah hileleng midangte tung a thunuailut a kiniamkhiak chih bang thil haksa pi a hong hithei hi. I ngaihtuahna a houchik himahleh hiai te chu I dou zoh a poimoh a, I zohzoh angai hi.

Haksatna tuak ngeilou ding I kisak khak ding alauh huai mahmah hi, gingtu I hih na uah I tuah ngam uh a ngai hi. Hiai te I tuah hun a I zoh theih na dingin Laisiangthou a iki bulphuh angai pen mah hi. Pathian ompihna lou in hiaite a I puknak uhi. Hunteng a Pathian toh om khawm a, Amah a ki ngak a Jesu a hotdamna ki chiantak neih apoimoh dan hiai ah chiantak in I muthei hi. “…Himahleh amah ah zung a omkei a, sawtlouchik kia a om a, thu ziak a gimthuakna leh sawina a hongom tak in a pukpah hi.” – Matthai 13:21.

Mimal Khalam a I khangna ding ua sawina I tuah uh mah bang in Saptuam sung ah leng nna asem thei hi. Sawina tuamtuam I tuah te un Saptuam sung ah khangna leh masawn na a hontung thei hi. Saul (Paul) in a piangthak ma a nungzuite matding leh sawi a om ding thu agen lai in, mi tamtakte Judia gam khawng, Galili gam khawng leh Samaria gam khawng ah aki theh zak uh hi.  (Nasepte 11:19) Amau te’n tua tanchinhoih mah apaina chiat ua pua uh ahih ziakin midangte hilh sawn tu in pang uh a, hiai in gingtu tampi tak behlap in khanlohna thupitak tung hi. “…Huchi in saptuamte Judia, Galili, leh Samari gam kimvel ah a kip deuhdeuh ua, muangtakin a omta uhi; huan Toupa laudansiam in, Kha Siangthou khamuan in a om ua, a hong pung deuhdeuh uhi.” – Nasepte 9:31. Hiai mah bang in sawina haksatna mimal in I tuahte uh midangte kiang a I genkhiat chiang in amau te’n ei apat Pathian hoih na mu in Khalam ah hatsem na ding in ana zang thei uh ahi chih leng I phok thakthak apoimoh hi. Mi dangte adia vualzawlna hi thei gige I hi a, midangte kiang a tanchinhoih hilh sawn thei gige I hih dan ki phok thakthak ni.

Haksatna I tuah ding deih thu a tel theih hileh a deih I om kei ding hi. Himahleh I ginna ziak a haksatna te tuak a, sawi a I om leh hiai te tuh ei adia vualzawlna hi zaw ahi chi I Laisiangthou mahmah ah leng I mu hi. “Diktakna ziak a sawina thuakte a hampha uh, van gam amau a ahi ngal a.” – Matthai 5:10.

Mihing te’n hoih lam nawt nawn lou I hih ziak un, I maban a bang thil hongtung ding hiam chih I genthei kei hi. I mimal ah hi ta leh, I saptuam sung ah hita leh denchiang in I ginna ziak un sawi in I hong om thei uhi. Tua bang te hong om kei leh chih I ut ahih lailai in gingtu I hihna ah a hong om thei gige hi. Toupa ompihna toh hiai bang hun hong om khak lehleng tua te maituah ngam ding in ki langkhe thak chiat ni. Jesu a I hotdamna suang in, Amah toh I hun te a tamzaw zang thei chiat ding in ki sa thak ni.

 Khrist min ziak a tai na hih uleh, na hamcpha uhi; thupina kha leh Pathian kha na tung uah a om gige hi. – 1 Peter 4:14

Huaiziak in Khrist ziak a hatlouhna ah, liamna ah, taksapna ah, sawina ah, lungngaihna ah ka kipak zel hi; ka hatlouh peuhpeuh chiang in ahi ka hat zawk. – 2 Korinte 12:10

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing hi.)
07th October, 2020 | Weekly-Inspiration – 40.



Leave a Reply

Your email address will not be published.

*
*
*

× Direct Appointment