SAPTUAM (SAP-TUAM): PATHIAN SAPTUAMTE’

Huan, ka hon hilh ahi, nang Peter na hi, hiai suangpi tungah ka saptuam ka lamtou ding.” – Matthai 16:18a

Tukal sung a Weekly Inspiration ding a bang thu gelh ding ka diam chih ka buai mahmah mai hi. Ka ngaihtuahna ah gelhding a hong tam mahmah mai a, huaite kana en zel hi. Tua le lak ah avankim a hongdawk den khat a om hi, huai tuh “Saptuam” ahi. Ka ki ngaihtuah a hiai thu pansan a thu gelh ding ka hi maw ka ki chih chiang in a thu-tun zau lua ahihziakin ka ngam khin kei hi. Himahleh lungsim a hong om adang gelhdia hoih kasak te ka pat chiang inleng hiai thu mah in lungsim hon la zaw ahihziakin saulou chik in poimoh kasak teng ka hon gelh hi.

Mi tamtakte’n i ngaihtuah mengmeng kholhlouh uhleh pau vantang a i na neihsek uh chu Saptuam ahi. Saptuam i chih chiang in thumal nih kigawm ahi a huai tuh, SAP + TUAM = SAPTUAM chihna ahi hi. Kei hi’n midang hileh mi’ i theih ngeilouh te bang nou bang saptuam uh e chih khong in i ki dong sek uhi. Tua bang dotna te om chiang in kou hiai Saptuam te (Pathian saptuam te hi zaw lou in, min nei a tua min pen mah thupi ngaih zaw), hiaite ka hi uh chi’n iki dawng tuah uhi. A thu-tun taktak pen ngaihtuah detdet hileng zaw i thugen pen pau vangtan a ki pawng zatlou ding hi a! Nou kua pawlte, nou bang saptuam te chi in iki dong sek uhi. Tua te sang in i ginna thu te, hotdamna a i om na thu te in ki dong zaw leng dik zaw ding hi. Khenkhat inlah Saptuam i gen khak chiang in a Biakinn/building mah mitsuan in i nei zawsop zomah uhi. “A in ua (A IN UA) saptuam kikhawmte leng chibai honbuk sak un aw.” – Romte 16:5a. Hiai ah Paul genna ah leng chiangtak in imu hi, saptuam i chih a inn (biakinn) ahihlouh dan i thei hi.

Saptuam i chih tuh Jesu Khrist genna leh Amah gingta khovel chih a omte (gingtute tengteng) genna ahi. (1 Korinte 1:2; 2 Korinte 1:1; Galatiate 1:1-2) “Huan Aman bangkim a khe nuai ah a koiha, amah tuh bangkim tengteng tunga Saptuam lutangin a bawl, saptuam tuh a pumpi a hi-a, amah bang kima bangkim hihdimpa tangchinna ngei.” – Ephesate 1:22-23. Saptuam Khris pumpi ahih bang in Amah tuh a lu pen ahi a, eite tuh Amah taksa pumpi ihi uhi. “Itnaa thutak gena, bangkima Amah, lupen, Khris ngeia i khanlet jawk ding uh ahi.” – Ephesate 4:15

“Huai a deihlam thilgel bel; hunbi hongkim chianga, thil tengteng-vana omte leh leitunga omte-Khris-a gawmkhawma a suktuah vek ding tuh ahi.” – Ephesate 1:10

I theih nawn ding ua hoih ahihleh Laisiangthou ah Saptuam chih kammal akizat chiang in thil nih in ki genthei hi. Amasa in mun tuamtuam a om Saptuam omte genna bang in leng aki zang hi. Etsakna in gamkhat sung a khua tuamtuam omte genna in, Galatia Saptuamte’, Ephesa Saptuamte’ chih bang in. A nihna ah, leitung pumpi a gingtu om tengteng genna in aki zang hi. I hondampa Jesu Khris a hongpai nawn chiang a michih Amah gingta a, Amah a hotdam a om a laktouh ding a omte genna in.

“Toupa mahmah kikou aw toh, angel tungnungpen aw toh, Pathian pengkul ging toh, van akipana hongpai suk ding ahi ngala, huan, Khrisa siasate a thou masa phot ding ua; Huai khit chiangin eite hingdama na om laite, huihkhua ah Toupa tuak ding in amau toh mei lakah lak touhin i om ding ua; huchiin khantawnin Toupa kiangah i omta ding hi.” – I Thessalonika-te 4:16-17.

Laisiangthou a I muh bang in Saptuam tuh min nei hiam pawl min ahi kei a, Khris a pumkhat ihihna genna ahi zaw hi. “Na lak ua Khris a baptisluta om peuhmah tuh Khris in na kithuamta ngal ua. Huaiah tuh Juda mi a om theikeia, Grik mi leng a om theikei; huaiah tuh bawi a om theikeia, bawi lou leng a om theikei; huaiah tuh pasal leh numei leng a om theikei hi. khris Jesu ah na vek un pumkhat na hi ngal ua.” – Galatiate 3:27-28.

“Amah tuh i kilemna ahi ngala; aman ei nihte tuh khata siamin i kikala kimelmakna banglai tuh a hihchimta, Thusehte leh dan thupiakte a saa hihmangin; huchia nihte tuh Amaha mihing thak khata siama kilemna a bawl theihna dingin; Huan, khros jiaka nihte tuh pumpi khata Pathian toh honkilemsak theiha, kimelmakna a beisak theihna dingin.” – Ephesate 2:14-16

“I vek un pumpi khata om dingin Kha khata baptisin i omta ua Judate hiam, Grikte hiam, sikhate hiam sikhalou hiam- huan i vek un Kha khat akipan dawnsakin i omta ngal ua.” – I Korinthte 12:13

Khris a saptuam a omte i hih man un i mohpuakna uhleng a lian mahmah mai hi. Khen khat in saptuam sung a i ki vaipuak na uah dinmun bang i deih mahmah uhi. Tua dinmun te ah i om chiang un Toupa deihdan hi nawnlou in eimah utdan leh deihdan in vai i hawm kha dekdek uhi. Khris a lu pen ahihdan leh ei a pumpi ahih dan manghilh a mahni hoihsakna leh nopsakna ding a saptuamte’ i pi khak ding alauh huai mahmah hi. Khua chih a Toupa bia a i om khawm na uah, khenkhat in saptuam min a i ki gawmkhawm na ua i pawl ‘min’ uh thupi ngaihlua in Saptuam bang chihna a chihleng ngaihtuah nawn lou in mihing deihdan in vai i ki guankhum uhi. Jesu Khris gingta a, I hondampa dia sang a, Baptist a om peuhmahte tuh Khris ah pumpi khat i hih ta uhi. Tua mah bang in Saptuam aomte i ki vaipuak na ding uleh Khris a sap a omte pung semsem a i khanlet sem na ding apoimoh mahmah leh Khris pumpi lamtouh na ding a poimoh mahmah Paul in leng ana gen hi. Michih i hih theih ki bang lou ahih ziakin i hih theihtheih uh hihkhawm a i omchiang un Khris a khanlet na thupi tak a om hi.

“Khenkhatte sawltak hi dingin, khenkhatte jawlnei hi dingin, khenkhatte Tanchin Hoih gen dingin, khenkhatte pastor hi dingin, khenkhatte thuhilh dingin a pia hi. Hiai misiangthoute thopna ding, nasepna sepna ding, Khrist pumpi lamtouhna ding in Huai tuh ginna leh Pathian Ta theihna lam a thukituak a, piching a, Khrist tangchinna bang a i vek ua i om masiah ading ahi. 14Huchi a mihingte diklouhna zekhemna bang a lepchiah pil a khem tawmtawm a om a thuhilhna huih chiteng a a langlang a sep leh mut lengleng naupang i hih nawnlouhna ding un. Itna a thutak gen a, bangkim a Amah lupen, Khrist ngei a i khanlet zawkna ding uh ahi. Amah a kipan pumpi tengteng kizopna chiteng sep ziak a lemtak a suktuah leh kizomkhawm a, hiang chih in sep ding dan bang a sep chiang in pumpi a khang a itna ah amah leh amah a kilam tou hi.” – Ephesate 4:11-16

Saulou chik a i thugelhte theisiam thei ding in simtute Toupa’n hon ompih chiat hen!

Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing hi.)

July 29, 2020. | Weekly-Inspiration – 30



Leave a Reply

Your email address will not be published.

*
*
*

× Direct Appointment