PATHIAN THUTE NGAIHTUAHNA A HUNZAT APOIMOH DAN

0

Michih i Khalam uh akhanna ding ua i hih theih uh a omte laka tam loute tuh Laisiangthou simtam, thumna neih tamna, an ngawl a thumna, Toupa thute ngaihtuahna leh midang gingtute toh kikholh khawmna tungtawn bang ahi deuh  hi. Hiaite ngaihtuah in neikhol keisek mahlehang, hiaite tuh Kha lam a i khanna uh, Pathian thu i theih semsem na uh ahi hi. Tua bang te lak ah ‘Ngaihtuahna’ a hunzat apoimoh dan saulou in i gen ding.

Adiak in tulai hun ah hon buaisak theiding thil atam mahmah hi. I na gensek mah bang un sawm petmah leh tup taktak a nei i hih kei uale zaw Toupa adia hun piak ahaksa mahmah mai hi. I hunteng uh hon labei thei ding adim in a om hi. Hun awl haulou a nasem a buai a thilhoih hih kahi i kichih hun natan unleng, tua i thilhoih hihte lak ua Toupa toh kipolhna dia hun i piak uh a om kei hi. Hun awl hau mahmah a chim kisa a omte’n lah thildangdang ah i hunte uh sukbei i sawm zel uhi. Hiai bang dinmun a om sek i hihziak un bang chi’n tua bang hunte ah i ‘ngaihtuahnate’ uh hongkhia in Toupa thute, a thilsiamte ngaihtuahna in zang leng bangzah ta in amanpha dia!

“Huaikhit chiang in unaute aw, thil dik peuhmah, thil phathuai peuhmah, thil kilawm peuhmah, thil siangthou peuhmah, thil hoih peuhmah, thil minhoih peuhmah, hoihna himhim a om a, phatna ding a om leh huai thilte ngaihtuah un.” – Philippite 4:8.

A chihleh bang thilte ngaihtuah a nei ding i hi ua? Tuate’ tuh tua i Laisiangthou a i muh bang ahi. Thil dikpeuhmah, thil phathuai peuhmah, thil kilawm peuhmah, thil siangthou peuhmah, thil hoih peuhmah, thil minhoih peuhmah, hoihna himhim a om leh tua te tuh i ngaihtuahtuah ding uh ahi. Hiaite bang ding a poimoh a? Hiai te’n thil ngaihtuahna diklou, thil hoihloute apa’n ahon venbit gige hi. Thugen tamtakte’n ana gen uh i zakkhak chiat uh i gingta hi, huai tuh bang hiam i chihleh mihingte ngaithuahnate khong Film bang a milim a lah khiattheih hi zenzen leh kua’n i en ngam tel ding ua? Hichi bang dinmun kihi ahihziakin Pathian thute mahmah hunteng a i ngaihtuah ngitnget kei ule zaw sawtlou kal in ahilou lamlam ah i tung nak uhi.

Kumpi David hinkhua enleng, Toupa lungtang bang pu mi chia minloh in Kumpi ding a sep in a om hi. (1 Samuel 13:14). Ngaihtuahna siang Toupa mitmuh a siangthou neih gige apoimoh dan hiai apan sinlai i la thei hi. Toupa’n i lungtang i ngaihtuahnate uh hon en hi zaw ahih dan Samuel in kumpi ding a David atel tungtawn inleng i muthei hi. (1 Samuel 16:7). Kumpi David tuh Toupa toh kinai gige mi, a ngaihtuahnate Amah adia pe gige mi ahih dan Sam laibu muntamtak ah i muthei hi. “Toupa aw, ka thute ah na bil hondoh inla, ka ngaihtuahnate ngaihtuah in” – Sam 5:1. Toupa aw, ka suangpi leh hontanpa, ka kam a thupawtte leh ka lungtang a ka ngaihtuahnate na mitmuh in pomtak hi hen. – Sam 19:14. Laisiangthou sut mite apa’n a kimu dan in Sam laibu sung a bung saupen Sam 119 ah “Ngaihtuah” kichi kammal  (Toupa thute ngaihtuahna) giat veitak Kumpi David in ana gen hi. (v15, 23, 27, 48, 78, 97, 99 and 148). Hiai in Toupa thute mahmah ngaihtuah gige poimoh hina e chih hon theisak hi, Toupa hoihnate, a thilsiamte, a thupina, a thilhihte leh adan thute.

Toupa thute i ngaihtuah semsem theihna ding un Laisiangthou sim gige apoimoh lotel hi. Laisiangthou sim chih bang leng ahi di mong sakziak lel a va sim khak abaihlam mahmah hi. Va sim zual a Laisiangthou sim kahi chih minhoih deihna ziak ahih lel khak ding leh, mite’n hiai in sim ahi chih hon theihna di lel ua i simkhak ding alauh huai mahmah hi. “Kuapeuh thu ngaikhia a zui tuanlou zaw limlang a a pianpih maitang hoihtak a ki en bang ahi. Hoihtak in a ki en a, a paimang zoh in mi bangchi ahia a hih a ki mangngilh nawnpah hi.” – Jakob 1:23-24. I Laisiangthou simte i sim zoh toh kiton a mangngilh pahpah mai di mah i diam?  I simte bang a, bang thu a, bang phattuamna kanei thei a chihte ngaihtuah a nei a i sim ding hina pi’n i pawng sim khasek uhi. Hiai in ngaihtuahna a hun piak poimoh hina e chih a hon langsak mahmah mai hi, a simmai a hun hilou a, i simte ngaihsutna piak a poimoh mahmah hi. Tuate mah i niteng hinkhua a hon panpihtu ahi a, i Khalam hon vaktu ahihziakin hunteng  a i poimoh uh ahi gige hi.

 “Hiai danbu in na kam pawtsan hetkei hen. Hiai a thu kigelh tengteng na zuih chinten theihna ding in sun leh zan in na ngaihtuah zaw ding ahi. Huchi in na lampite na tuahpha sakdia, na hong lamzang ding hi.” – Joshua 1:8.

“A kipahna uh Toupa Dan ah ahizaw a; a danthu sun leh zan in a ngaihtuah ngitnget hi.” – Sam 1:2.

Toupa toh hunteng a i omkhawm gige apoimoh hi, i omna koimunpeuh ah Toupa deihna bang a om in a thute ngaihtuahna in hun i zang thei uhi. A tung a i Laisiangthou sim bang in Toupa danthu sun leh zan a i ngaihtuah ngitnget ding uh zaw ana hi gige hi. Omna mun haksatna ziak hiam, bang hiam ziakin tua bang  ngaihtuahna neih ahaksat hun a om thei hi, tua bang dinmun a i om inleng mundai, mi om louhna hiam hon buaisak thei di omlouhna a va om theih apoimoh nawn mahmah hi. Isak hinkhua enleng, Rekebah a zi ding a aneih hun ding ah mipi hu toh abuai mahmah ding uhi. Himahleh tua bang hun inleng ‘pawn ah kingaihtuah ding in a pawtkhia hi.’ (Genesis 24:63-64).Hiai ah Isak in hiai bang hun zang zel hi ding ahihdan a kithei hi. Hiai mah tuh i hondampa Jesu’n thum ding dan a hon sinsakna mahleng ahi. “Nang zaw na thum in, na dantan sunggil ah lut inla, na kongkhak khak inla, na Pa a guk a om kiang ah thum in. Huchi in na Pa a guk a om in honmu in, a hondin ding hi.” – Matthai 6:6. Mundai, munthoveng hon subuai theite omlouhna te a thumna leh ngaihtuahna a hunzat theih apoimoh hi.

I thukhitna ding in, Toupa thute mah a kikni. Hiai khovel ah hon buaisak theite gen ding hileng i gen bei ngei kei ding a; I gen tawp ngei kei ding hi. Tuate i vualzoh uh a ngai a, hun haksa i sak pen ualeng Toupa thute mah lunggulhna nei a, Amah adia ngaihsutna pethei ding a pan i lak teitei uh a poimoh hi. Tua bang a i om zohlouh chiang un sa thilte ah om abaihlam lua hi. Sa thilte pai khia in i Khalam ading mah ngaihtuah in nei ni. “Kha thil deih bel hinna leh khamuanna ahi.” – Romte 8.

Toupa’n i thugelhte tungtawn in theihsiamna leh Khamuanna i tanchiat uah hon  piak i ngen a; theihna bukim louh ziak a i  gen khelh omte angaihdamna i ngen lailai hi.

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing)

20th April, 2021

Weekly-Inspiration – 68

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published. Required fields are marked *

Book Appointment