PATHIAN MITMUH AH NA MANPHATDAN KI THEI IN

Khat veivei na hinkhua ah bangmah lou na kisak hun a om hia? Ahih keileh milak a nawlkhin kisakna, tuam kisakna, zahtak theih na di mun ale zahtakna mulou na kisak hun a om sam hiale? Mi dangte na eng vungvung ni, mahni ki niam muh a bangmah lou na kisak hun aom sam hia? Tua bang te neilou i ki chi hia le? Hiai dotna iki dong lai di aw. A chihleh midang te bang i chi muh in bang i chi et a? A tanchin uh bang chi bang in i gen sak a? Mi i simmoh deuh, zattak louh i sak deuh a om sam hia? Huai nu, huai pa zaw huchi deuh chih na, midangte toh buk a tehna nei kha sam chiat ding in i ki gingta hi.

I hunte atam zaw mi toh ki hou hiam, milak a om i hihziakin iki houna te uah hiai bang ngaihsutna te i nei thei uhi. Midang te tung hitaleh, ei mahmah tung ah leng ngaihtuahna diklou i nei thei gige hi. Hiai bang ngaihtuahna te’n i omdan, i gamtat dan leng hon sukha mahmah hi. Kuamah Pathian mai a dik leh hoihkim ki om lou ahihziak in, niteng a i ki bawl thak uh a, i ki et thakthak uh apoimoh mahmah hi.  Gingtu i hih ziak un i hoih bukim ding uh chih ahi het kei, hunteng a Pathian deihdan ahi na hia chi a i hih peuhmah, i ngaihsutnate i ki et gige apoimoh mahmah hi.

“Kawlgit nih dal dangka khat in a zuakzel uh hilou hiam? Himahleh a lak ua khat leng na Pa uh theihlouh in lei ah a ke kei ding hi.  Na samzangte uh nangawn leng simvek ahi. Huaiziak in lau kei un; kawlgit tampi sang in na manpha zaw uhi.” – Matthai 10:29-1

Pathian thilsiamte lak a Kawlgit neuchik mahmah Pathian in awlmoh a manpha asak leh Amah ki batpih a hon siamte bang chibang in i manpha tel sem ding ua? Thupilua hilou maw. I lungkham leh mangbat hun a bangziak a ki ngaise khanak i hia; Pathian mel batpih a bawl i hih lam le ngaihtuah manlou a bangziak a ki pe senak i hia. Ki ngaihtuah thak ni, Pathian mitmuh a manpha i hih dan uh ki phok thakthak ni maw. Mihingte i dam theih na uh ki bang vek lou hi, khenkhat te bel damtheihna ginatlouh ziakin lungsim lam a buai kha thei hi. Himahleh atam zawte zaw tua bang ihi kei uh a, haksa i tuah hun te uah Pathian i sam thei gige uh a, Amah i bel thei gige uhi. Ngaihtuah lai mah di, Kawlgit Kha (spirit) neilou natawm Pathian in manpha sa a, a awlmoh leh Amah ki batpih a hon bawlte, Amah toh om khawm ding a hon teel te bang chi’n hon awl tel dia? Manpha lua hilou i hi uh maw! I lungkham mangbatna te Amah kiang tung ni, ki ngaise het ni maw! Manpha i hih dan uh ki phok thakthak ni.

Pathian hon itdan, Amah a dia manpha i hih dante i theita uhi. Huchi ahih lai‘n i mihing’ pihte bang chi bang in i mu a, bang chi bang in i en a chihte i ki et nawn uh apoimoh mahmah hi. Ei Pathian a dia i manphat bang in midangte toh i manphat dan leng aki bang hi. Hiai kikal thei siam mahmah leng ka chi hi. Ei thilhih thei leh siam kisa a, midang ahih theilou, a siamlou omte muhdan koihdan i neihlouh ding ahi. Pathian in “Talents” tuamtuam thil hih theihna mi chih a hon pia hi. I siamna, i pilna leh thilhih theihnate uh ki bang vek lou ding mah hi. Khenkhat te mawlsim i sak om ding a, tua te leng Pathian in manpha takin a zang hi. Tua a hihziak in i lungphut, i ngaihsutna te khial thei gige ahi ziakin Pathian deihlouh dan a midangte i koihlouh na’ng inle pan i la thak ding uh.

“Mi dangkaeng siangthou sang a leng manpha zaw in ka bawl ding a, mihing mahmah lah Ophir dangkaeng siangthou sang a leng manpha zaw in ka bawl ding.” – Isai 13:12

Pathian in nang leh kei dangkaeng Ophir (Gold) sang a manpha zaw a hon bawl ahih dan i phok thakthak ding uh. Lungnuam takin om ni, kipaktakin Pathian adia i hih theihtheih i sem chiat ding uh.

I thugelhte i khitna ding in hiai anuai a laa kipia ana ngaichiat ding in i ki ngen hi.

Toupa’n i thugelhte theisiam thei a, Amah min thupi na ding a midangte hanthawn theichiat ding in hon ompihin hon Khamuan chiat hen!

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing hi.)

July 08, 2020. | Weekly-Inspiration – 27

 

Pathian Mel – Ruth Chingmuankim

MP3 – Link https://bit.ly/2O7zPqy YouTube Link https://www.youtube.com/watch?v=tkcSrd-RNpM

Khimzing ah tu in mangbang gikpua in
Nopni lamen ngamlou in na om maw
Tunglam mitsuan leng I hondampa kiang
Pathian mel deihhuaipen ahong vak ngei ding hi

Na lungsung lungngai a thum in
Mangbang in na kap zong a
Na lametnate beizel mahleh
Mialna hong bei dia khua hong vak ngei ding
Pathian mel deihhuaipen ahong vak ngei ding hi

Na laukha bah in na lungsung a liam
I Pathian hoihnate na ginglel maw
Hizong ngak lai in kong hon ahi ding
Pathian mel deihhuaipen ahong vak ngei ding hi

Lei hinkhua zaw bei in mualliam zel
Pathian thu amang ngeilou ding hi
Khrist hong pai ni ding ahong naita a
Pathian mel deihhuaipen ahong vak ngei ding hi.



Leave a Reply

Your email address will not be published.

*
*
*

× Direct Appointment