PATHIAN ADI’N BANGKIM AHITHEI HI

Covid-19 in khen tuam neilou a ahon nawk dan i muhchiang in i hinna loungal a thupi dang bangmah om keina e maw chih hon ngaihtuah sak mahmah mai hi. Sum-le-pai tampite nei in, neih-le-lam thupi taktakte nei mah lehang mihingte hinna zaw i leitheih uh ana hi mahmah keihi.  Toupa a kikepsakna loungal leh Amah adia hing khiatna loungal a thupi dang bangmah leitung ah aom keihi. Hiai bang a hipi thupitak i tuahlai un lungsim khat a hong om mahmah nawn ahihleh Toupa’n khatkhat a honsapna le ahimai ta dia aw chih hon ngaihtuah sak hi. Saptuam sung ah hitaleh inkuan sung ah hitaleh Pathian adia kizang tata bang in hon omlouhsan chiang un lungsim khat ah thomhauna neih abaihlam mahmah hi. Huchi ahihlai in Toupa’n tunitan nang le kei a hon kepbit lai a ziak om ahi chih phawk thakthak in, i hun leh nite uh i zatdaan ki-en a Amah deihna bang a zang semsem theichiat ding in kisa sak chiat leng i chi mahmah hi.

News tuamtuam leh munteng a i muh phial uh “stay at home” inn a om ding chih thu hiai hipi tungtawn apat i zakmun pen uleh tamtakte’n haksa i sak pen uh ahi hi. Hiai bang dinmun a i omlai un thil dang a damlouhna tuah ding bang haksa pi a hongsuak hi. Nidang lai bang in ut hunhun a tanau laina kivehtuah leh kihehnem tuah chihte i utpen uh himahleh aom thei nawn keiphot hi. Hiaite ziakin thomhau kisakna, beidong kisakna leh lametbei kisaknate i maituah theih uh ana himawk hi. Hiai hunte ah Toupa mah bel tinten a nei in, a ompihnate phawk in Amah ah i lametnate uh nga chiat thei hileng puaksiamna leh theihsiamnate i neithei pen ding uhi.

Pathian neimite kichichi mahlehang khatveivei pathian om taktak mah adiam? chi’n dotna bawl hikei mahlehang lungsim a ngaihtuah abaihlam mahmah hi. Ahihkeileh Toupa honpii dante theihsiam haksa i sak hun uh a om thei hi. Hiai bang hunte a athute a iki khamuan uh apoimoh mahmah hi. Laisiangthoute sim a, thumnate nei a Toupa a lungmuanna i zong uh apoimoh hi.

Luke 1:37 “…Pathian adi’n lah hihtheihlouh bangmah a-om ngal kei a..”

Jesu pian ding thu Angel te’n Mary ahilh lai un lunghimawhna in Mary a om hi. Pasal neile hinailou hinapi mihing ngaihtuahna a zaw gingtak haksa ding mah hi. Hiai hun apoimoh mahmah tuh Mary in a theihsiam theihna ding in dotna bawl hi. v34. A sanggamnu Elizabeth inleng teknung in tapa apaita chih chetna tungtawn in, ataktak ahi chia chiamna amu hi.

Matthai 19:26 “Jesu’n amau a en a, a kiang uah, ‘Huai mihing hihvual ahi kei, Pathian adi’n bangkim hihtheih ahi’ a chi hi.” Hiai thu tuh tangval hausa gentehna thu ahi, na neihlelam tengteng zuak a mizawngte kiang ah pia in, huchi in, van ah gou na nei ding; huan hongpai inla, honzui in” chia Jesu’n sapna abawlna thu ahi hi. Hiai hunlai a hausa chihtheih dia om theite tuh tulai hun in bangtoh i tehthei ding ua. Thupi mahmah ding hi. Neih tengteng zuak a mizawngte kiang a piak ding chu mihausa khat ading in thil haksa pi ahi tham hi. Jesu nungzuite mahleng a buai zou hiai ua hiai bang in dotna bawl uhi, “Huan nungzuite’n huai a zak un, lamdang a sa mahmah ua, “Kua hotdam in a om zou dia?” a chi uhi.” v25. “Jesu’n amau a en a, a kiang uah, ‘Huai mihing hihvual ahi kei, Pathian adi’n bangkim hihtheih ahi’ a chi hi.” v26.

Eite’n leng Jesu nung i zuihna uah mahni hihnate (I-pil-i-siamnate, i neih-le-lamte, i thupinate uh) kimangngilh a Toupa adia kipiakkhiat gige apoimoh mahmah mai hi. Hiaite phawk kawmkawm hiam, hiaite lungsim a nei kawmkawm a Toupa i biaksek pen uh zaw Pathian a dia pomtak ana hi khollou ding hi. Tangval hausa thu bang a neihlelamte mah it a, tuate awlmohna toh Toupa nungzuih ahi theikei hi. Mahni hihna bangbang toh kipiakkhiatna pen Toupa’n hon pomzaw ahi chih theih thakthak ahoih hi. Haksa mahleh Pathian ah kinga in Amah ah muang phot peuhpeuh leng thil hitheilou omlou hi, Aman honpi ding ahi chih phawk ni.

Job tangthu i theihchiatsa mah bang un haksatna a thuakte gin-om takin a thuak mualsuah hi. Hiai bang teng tuak mah leh hiai bang in gen thei hi, “Toupa aw, nang Bangkimhihthei na hi a na ut tapeuh na hihthei vek chih ka thei hi” Job 42:2. Job in a thiltuahte a ziak asante theisiam vek keimahleh Pathian a aginna leh a lametnate tawlnga lou a ngak ziakin haksatnate a thuak mualsuah hi. Tuhun a ei gingtute ading in sinlai hoihtak Job tungtawn apat muhding atam mahmah hi. Hipi ziakin haksatna tuaklou kichi hial lengle michih in hiai hunsung ah banghiam haksatna i na tuah uh gending om ding in ka gingta hi. Natna ana veikhate bang, ahihkeileh natna anavei kha sungkuante bang, tuahsiatna ana tuahte thomhau kisa a, theihsiam haksa sa mitamtak i om uhi. Hiai bang hunte ah Toupa muanpen in neih sawm teitei in, i lametnate uh ngak sawm teitei leng i deihpen leh i utpen ahi hi. I damtheihnate uleh i miziate uleng akibat veklouh ziakin khenkhatte’ ading in khamuanna taktak neih bangleng ahaksa mahmah thei hi. Leitung a lungnopna leh khamuanna honpia thei Toupa loungal omlou ahihziakin Amah belh louhngal zaw i hihtheih uh a omkei hi. I mai a haksa tuah ding om in, i maban ding bingsa mahlehang, i hihna bangbang toh Toupa kiang zuanleng thil hitheilou Amah ading in a om keihi. Amah muanhuai hi.

“Huan, TOUPA’N a honpi gige ding a, mun keu ah leng ahon taisak ding a, na guhte leng a hatsak ding; tui a vak huan bang leh, tuinak nei kang ngeilou bang na hita ding hi.” – Isai 58:11

“It tawplou in ka hon it a, huaiziak in lainatna in ka hon kai hi” – Jeremiah 31:3b

I thukhitna ding in hiai bang hun haksate a i zuihtheih ding uh thiltampi aom a, tuate lak apoimoh mahmah thil thum i ending.

  1. I lauh hun leh i thomhau hunte ah Toupa a i lametnate, Amah a i gingnate uh mah suangpen a nei in tuate ah kihih hangsan ni. “Ka lau chiang in, nangmah k’on muang hi.” – Sam 56:3
  2. Thumna mahmah neitam in, lametna leh thuaktheihna toh Toupa ngakni. “Toupa aw, zingsang in ka zaw na naza zel ding a; Zingsang in ka thumna na ma ah ka gel hoih dimdiam ding a, k’on na hungaih zel ding hi.” – Sam 5:3
  3. Toupa phatna aw te suah in, a phatnalate sa in Amah phat tawp keini. Paul leh Sila te bang in hiai bang hunte ah Toupa phat a thum in, late sa in om ni. “…. Zanlai in, Pathian kiang ah Paul leh Sila a thum ua, la a sa ua, hentate’n a ngaikhia uhi; thakhat in zin nakpitak in a hongling a, huchi in suangkulh suangphumte tan in a lingsak a, kongkhak tengteng a kihong paha, saltang chih kolbutte a kiphel vekta hi.” – Nasepte 16:25-26.

Toupa’n thil thupi i tung a hih thei gige ahi chih phawk in, i thum chiang unle tuate mah ah lametna hing nei ni. Haksa i tuahte uh, thil i theihsiam theihlouhte uleh i thomhaunate uh a athon hilou a, a ziak om vek ahi chih thei in Toupa ah khamuanna leh lungmuannate zong chiatni.

“Tu in amah ei a sem jelpa’ thilhihtheihna bang jel a,  i nget leh i ngaihtuah tengteng saang a thupi zotham hihtheipa’ kiang ah, Khris Jesu jiak in saptuamte’ lak ah, a thupina suan tengteng tan I om tawntung hen. Amen” – Ephesate 3:20-21.

Toupa’n i thugelhte tungtawn in theihsiamna leh Khamuanna i tanchiat uah hon  piak i ngen a; theihna bukim louh ziak a i  gen khelh omte angaihdamna i ngen lailai hi.

  • Thangginom Hangshing

 (Laigelh toh kisai kupbeh nuam omleh, Laigelhtu +919615804759 ah thuzaak theih diing)

08th June, 2021 | Weekly-Inspiration – 73

Leave a Reply

× Direct Appointment