Khristian i kichihna uh a ziak diktak theivek chiat ding in i kigingta hi. Toupa adia kipiakkhiatna leh a gamna sepna tuh i mohpuak uh ahi a, hiai mah tuh i hamphatna bik mahmah uh ahi chihleng i theih uh apoimoh lua hi. Ginglou mi tamtakte’n tua bang hamphatna muh ding anei kei uh a, eite’n bel Toupa adia nna septheihna thupi tak, koimun peuh a i omna uah aneu alian in i sem thei uhi. Hampha i hih dan uh kiphawk a, Toupa adia i hih theih bangbangte sem buching a kipaktak a i om uh apoimoh mahmah hi. Tua bang ahih kawmkawm in midangte’ ading a vakna tuntu, lampi dik hilhtu leh makaihtu a i om theih uh a poimoh hi. Hiai tuh Jesu hon sinsak mah ahi hi. Huchi mah bang in, na vak uh mi mitmuh ding in vak hen, huchi in na thil hoih hihte uh a mu ding ua, na Pa uh van a om a pahtawi thei ding uhi. –  Matthai 5:16,

A langkhat lam ah Toupa gamna i hih theih khomkhom ua i sepzel lai un, Amah nna semsem kisa na pi’n, ei adia semsem mah bang in ngaihsutna a kipiak theih mawk hi. A hoih theipen ding i deih luatna lam uah midangte apat pahtawina muh a zak ding, amaute hon theihpih ding deihna in banghiam i hih dingte uh i hih khak ding uh kiveng apoimoh hi.  Nu-le-pa bangzah hiam hiai hon na simsakte’n i tate muh in dikna, hoihna leh zahtakna i deih chiat uh a, Nu hoih leh Pa hoih hih i ut chiat uhi. Tua mahbang in mitengteng in bangtan hiam ah zahtaktheihna leh pahtawi a om utna lungsim i neichiat uhi. Tua ahihziakin Toupa adia i hih theihtheih i hihnate uah i ngaihtuahte uleh i sepdan te uh ki etthak zel apoimoh hi. Toupa adia sem taktak mah i hi hia, ahihkeileh eimah minhoih na ding asem? I hih khempeuh leh i sep peuhmah Pathian ading a pomtak ahih ding amasapen leh apoimoh pen ahi hi.

Pathian deihdan bang ahia? Amah a ding a hinna bang a? Mihingte deihdan bang hilou a Pathian deihdan a om mah ka hi chih bang-chi-bang in i chian ngam a chih kidawt a poimoh nawn hi. Huchi in tunung sa a a omlai teng mihing duhgawlna lam bang a omlou in, Pathian deihlam in a omta hi. – 1 Peter 4:2. I hondampa Jesu nung i zuihna uah, itna, hehpihna, kidektheihna leh hoihna chihte toh amah deihdan a i hing khiat chiang in Pathian deihna bang a hinna i neithei pan hi. Tua bang a Pathian deihna bang a i hing khiat theih na ding in Amah theih apoimoh a, athute Laisiangthou a om bangbang i zuih apoimoh hi. Laisiangthou simtam tuh gingtute ading in apoimoh mahmah hi, i sim kawm a athute i ngaihsut kawm chiang in, hiai in kikhekna, kisiam lamdangna / kikhekna ei ah ahon tun hi. Tuate apan in hiai zaw hoih ahi, hiai zaw Toupa deihdan hilou deuh ahi, kapaina diklou, ka hohna diklou, ka hihte diklou ahi chihtheihna i nei ding hi. Toupa deihdan a omna in i ngaihtuahnate hon khek lamdang vuak hilou in, i omdan, i gamtatdan, i thil etdan leh muhdante a hon khek ding hi. Laisiangthou thutak i hon zuih chiang in, midangte it-theihna, hehpihtheihna leng ahong om ding hi. Unaute it taktak ding a thutak zui a na kha uh na hihsiangthou tak ziak un lungtang a phatuamngaitak in ki-ittuah chiat un. –   1 Peter 1:22.

Hamphat huai nawn mahmah leh kipahhuai mahmah ahihleh, Pathian deihna bang a i om a i hing khiat chiang in midangte bawl hoih theihna, hoihlouhna leh haina apan lami dik a pi theih na i nei uhi. Hiai Pathian deihlam ahi, mihaite haina thil hoih hih in na hihdai thei ding uhi. – 1 Peter 2:15.

Mihing deihdan leh Toupa deihdan bang ahia chih sia-le-pha theihna tuh i neih gige uh ahoih hi. Niteng in Toupa ompihna i ngen thei gige a, i ngaihtuahnate a siang hia, Amah deihlam ahi na hia chi’n thumna ah i dong thei gige hi. Chiklaipeuh a Toupa deihdan a kibawlpha thei gige i hih ziak un i hampha mahmah uh a, tu hun hoih i neihlai ua kibawl phatna di omte a i kibawl hoih uh apoimoh hi. Midangte adia thumsakna, i melma te hoihna ding a thumsakna chihte tuh i mohpuak uh ahi hi. Toupa’n i khelhnate uh ahon ngaihdam bang a enleng i tung a khial i sakte, hon dou gige te itna toh i thumpih ding ahi hi.

Ken zaw k’on hilh ahi, na melmate it unla, a honsawite thumsak un. Na Pa uh van a omtate na hih theihna ding un. Aman migiloute leh mi hoihte tung ah a ni a suaksak a, mi diktatte leh diktatloute tung ah leng vuah a zusak hi. Nou hon itte kia na it un, kipahman bang ahia na muh ding uh? Siahkhonmite’n leng huchibang in a hihsam kei ua hia? Huan na unaute kia uh chibai na buk un bang na hihtam tuan ua ahia? Jentelte’n leng hichibang in a hih sam kei ua hia? Huchi in na Pa uh van a om a hoihkim sipsip bang in na hoihkim sipsip ding uh ahi. – Matthai 5:44-48.

Niteng hun i zatna uah khatveivei lungnoplouhna na ding, thangpaihna ding leh haksatna i tuah hun aom thei gige hi. Himahleh hiaite tung a i vualzoh uh angai a, hunteng a Toupa deihdan ahi na hia chi a i omdan uh kivel thak zel apoimoh hi. Toupa itna tuh lungtang siangthou leh dikte kiang ah a om hi. Toupa ading a mi muanhuai te hi thei gige a, Amah deihdan a hinkhe mite hithei gige ding in kisa chiat ni.

Ka mel zong un, chi a na genlai in, ka lungtang in na kiang ah, Toupa mel ka zong ding, ka chi hi. – Sam 27:8. Pathian deihna bang a i om semsem theihna ding in Toupa mel i zong angai hi. Amah lungtuak ding in i kiman hia? Ahihkeileh khovel nopsaknate mah zong ut lailai i hi hia chih i ki dawt apoimoh hi. Toupa mel ka zong ding chi a lungtang siangthou tak toh i om gige uh apoimoh hi. Kumpi David bang a Toupa a muanna i neih gige uhleng apoimoh hi. Toupa hon ompih gige ahi chih phawk a, a honpi nana a kipaktak leh lungmuang tak in om chiat ni.

Ka hinna a hon bawlhoih sak zel a, amah min ziak in diktatna lampi ah honpi zel hi. – Sam 27:3.

Toupa’n i thugelhte tungtawn in theihsiamna leh Khamuanna i tanchiat uah hon  piak i ngen a; theihna bukim louh ziak a i  gen khelh omte angaihdamna i ngen lailai hi.

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing hi 30th  March, 2021)

Weekly-Inspiration – 65      

Leave a Reply

× Direct Appointment