NUNGZUI HINKHUA: TOUPA HOIH HI

Sam 34:8
Aw, Toupa hoihdan chiam him dih ua: amah a muanna koih mi a hampha hi.

Mihingte hi i doldan uh leh i mumal louhdan uh Pathian in hon thei lua hi. I huchihna tak un, Amah lou a phalou diing ihi chih thei ahihziak in, A Tapa tungtawn in lei leh van khek danglam zen in hong tankhia hi. Lei, Van leh Tuipite siampa’n A thangpaihna mihingte hon suahkhum hileh, ki thuak zoulou a mangthang diing ihihman in, A hoihna leh A iitna mah pansan in Amah i zot theihna diing lampi, A Tapa ki pumpiakkhiakna ah hon bawlsak hi. Pathian hoihdan leh lemgelsiamdan lawmlawm! I Hondampa thumandan lawmlawm!
Toupa hon iitna tangtawn daih ahi tel hi! A hehpihna lamdangdan leh A zahngaihna hauhdan thupi lua hi. Toupa hoih hi! Toupa thupi hi!

Toupa hoihna chiamkha i kichih chiang un, salam thilte kawk in i gen deuh taangpi uhi. Sa a omlai i hihna uh i phawk luat ziak un, salam mah inleng Toupa’n A hoihna simsenlouh hon chiam kha sak hi. Salam a masuanna leh lohchinna, punna leh taksa damtheihna a hon vualzawlnate ziak in Toupa’ hoihna mu in i ki thei a ‘Toupa hoih hi’ i chichi thei hi. Ahimah leng ahi. Himahleh, Toupa hoihna chiamkha i chih chiang in, khovellam leh salam kia hilou a, khalam a vualzawlna tampi i muhte leng i simtel diing ahi. Salam a hon vualzawlna leh lamkaihnate ziak kia a ‘Toupa hoih hi’ chi chi i hihleh zaw , Toupa hoihna bukimtak a mu napi a, a kimkhat chauh gen gen i hihkhak diing uh lauhhuai kasa hi.
Khalam a vualzawlna i muhte uh i gen sang mah un salam a vualzawlna i muhte uh gen i thanuam zaw uhi. Huaite mah eite’n leng kipahpihzaw leh huailam i muhte mah uh mi’n hon paakta ua hon kipahpih zaw uh ahihziak hidi’n ka ngaihtuah hi. Huchi ihih khaak leh zaw, i khalam nuntaakna a zawng law pi khat kihi kha diing hi. Gingloumite toh i kikhiakna uh omlou diing china himai in ka koih hi. Gingloumite’n leng salam a vualzawlna amuhte uh suang mahmah ua, a pathian un deihsaktuamna leh hamphattuamna in vuk chi sek uhi. Huchi ahihziak in, a pathian kiang ua hamphatna a donte uh sahkhua leh khotaang phattuamna diing pawlpite (philantrophic organization) leh tup-khat-nei pawlpite (institution) ah ‘pekik’ sek uhi. A pathian ua kipat vualzawlna a donte uh ‘pai sawnsak’ chi in ahihdiing uh hihkhin kisa in, lungmuangtak in om uhi. Ei gingtute’n leng, i Pathian a kipat salam leh khalam a i muhte koilam hiam hi’n Amah kiang hiam a piakkik zoh vual ahikei chih thei mah leng, i hihtheih khomkhom chi in, i ‘pekik’ zel sam uhi. A hidiing mah leng ahi. Himahleh huaitan kia diing zaw hilou ahi ; Ei gingtute bel, Salam a vualzawlna tungtawn a Toupa hoihna i muhte uh Khalam a i khanna dia Toupa’n hon bawlsak ahi chih i theih poimoh hi. Aziak ahihleh, ei hinkhua a i tup-le-ngiim pen Pathian biak leh Amin tawisang ahihziak ahi. Huaidan ahihman in, Khrist’ sisan a tatsa ihihlam zumpih lou a i puanzaak sem diing, Athu i zuih sem diing, i chapouna akiam sem diing, i innvengte a dia iitna i hauh sem diing, hehpihna, zahngaihna leh ngaihdamna i hauh sem diing, lemna i delh sem diing, sianthounalam a ma i suan sem diing ahi….Avek in i genseng kei hi. Himahleh, i hih diingdan pen i Laisiangthou ah kigelh chitchit ahihman in, hon sungluah Khasiangthou in i zuih diing lampi ah hon pii zel hi. Toupa hoih hi!

Pathian’ lemgeelsiamdan, i ngetma a leng i poimoh theikhin a, ahunhun a thil hon na lepfelsak sek dante khawng, A vaihawmdan theihsiam lou a dah-le-ngui a i om chiang a, i lungsim hon zou mahmah thilte a hon khem lungawidante khawng, i gintat hetlouh leh lamet hetlouh a ei khamtawk a bangchi chi hiam a mimaltak a hon houpihnate leh hon muhsakdante khawng, i theihlouhkal a mualphou theihna diing khenkhat a hon na humbitdante khawng, lamet phaak hetlou a i poimoh hun a ei a di’a mi hon na koihsak chetchetnate khawng bildoh in phawk tamzaw leng zaw, A hoihna i muh diingte manpha diak a, simsen hilou diing hiven.
I khelhkhak chiang a hon thuakzohdante khawng, i nuaksan hun a A ginomdante khawng, haksatna hun i pal diing hon phalsak chiang a, haih vuallouh a hon ompihlam i kha mahmah leh mite tungtawn a hon chetsakdante khawng, i thuman louh chiang a A zahngaihdan khawng, thumna nei peihlou leh Bible sim thadah tak a hun tamveipi om himah le’ng, hon iit leh khotuah A tawp tuan louhdante khawng, leh a dam theipen leh nem theipen a hon thununnate khawng ngaihtuah tam leng, Toupa hoihna i muh diing tamsem om kia hilou in, manpha leh buching diing hi.

Huaidan a salam leh khalam a Toupa hoihna buchingtak a chiamkhate mi hampha ahi ua, vualzawl a omte ahihlam uh i chaangtel in hon hilh hi. Toupa hoihna chiamkhate ahihleh Toupa muangte ahi uh chihna ahi. Pathian muan i chih chiang in ei lametdan leh hoihsakdan a leng thil hong om khollou diing chih thei a, Pathian mai a ki tuluut diing chihna ahi. Huchia, Toupa lemgeeldan pom a, hun nuam a pahtawina pia a, hun haksa a, ‘Kei thu hilou, nang thu hihen’ chi a, Toupa hoih ahihdan phawk a, a muanna uh Toupa tung a ngate Toupa muangte ahi uhi (Jeremia 17:7). 

Khovel paidan a thil hoihlou i tuah chiang in, ‘Toupa hoih hi’ chih haksa sek hi. Himahleh, huai chihthei a i omleh Toupa muang i hi chihna ahi zel hi. ‘Bangchidan in? ‘ i chihleh, hun haksa leh hun lungziinhuai i tuah chiang a Toupa hihna (Toupa hoihna) ana kikhek hetlou hi; I dinmun a kikhek ziakin Toupa hoihna kikhek tuanlou hi. A hoih ngeingei in hoihlai a, ahoih ngeingei in hoihden diing hi. Huchi ahihman in, hun haksa leh nuamlou ah leng, Toupa hoihna mu teitei te mi hampha tungtuang ahi uhi.
(Hebrute 13:8 ; Jacob 1:17)

‘Kei TOUPA lah ka zulhzau ngal kei a; huaiziak in Jakob tapate aw, hal bei in na om kei uh.’ (Malaki 3:6)

Toupa hoihna mitsuan kawm ni maw, lawmte! 

Chingngaihlian Tunglut 
June29/2020_NH_18
(Laigelh toh kisai kupbeh nuam omleh, Laigelhtu +919892316430 ah thuzaak theih diing hi.)


Leave a Reply

Your email address will not be published.

*
*
*

× Direct Appointment