NUNGZUI HINKHUA: NU-PA KIPOLHNGEIHNA

Solomon La 7:10
Ka ngaihnou a ka hi a, a deihlam kei lam ah a om.

 

Kitenna geelkhetu Pathian ahihziak in, Amah deihbang kitenna a sut deuhdeuh theihna di’a, alaizang a Jesu Khrist pangsak a, Nu-pa a panla te mah in Nu-pa hinkhua lohching leh ettontaak in zang uhi. Nu-pa kipolhngeihna kaan a khawvel a lungmuanhuai leh tawldamhuai Nu-pa kikaal leh innsung a di’n omlou hi. Nu-pa hinkhua soiselnabei zen a hoih bukim chih omkei mahleh, lohchingtak leh iitna a dim Nu-pa hinkhua zang tampi om uhi.

 

Kitenna pen Khrist leh saptuamte kitenna diing lahna a Pathian in Ana lemgel ahihziak mahtak in, siangthou leh iitna a khang diing in Pathian in vualzawl ut gige hi. Huchi ahihlai in, Setan inleng pan naaktak a la ahihziakin Nu-pa tamzawte kituak ngellou in a hinkhua uh zang lel uhi. Amau kikal ah buaina gen fel theih louh leh kingaihdam tuah theihlouhnate’n mun lianpi luah hi. Giltak a lungtang a kizopna neilou a, ki-iitna, kizahtattuahna leh kitheihsiamtuahna omngellou, a minpu lel a kitenna hinkhua zang uhi. Huchibang kitenna zaw saltaanna chikhat hi’n ka koih a, tawlhuai mahmah di’n ka ngaihtuah hi.

 

“Ka pasal a ka hi”, “ka zi a kahi”, “a deihlam keilam ah a om” chih lungmuangtak leh iitna a dim in i chithei diam? Ta-le-nau ziak khawng leh innsung khualna leh mi hon muh diingdan khualna ziak khawng lel a kiteng lai a, Nu-pa hinkhua zang i hihkhak leh zaw, gentheitak a taaksap lianpi toh hisel hetlou a hinkhua zangkha kihi maimah diing hi.

 

Tuhun khawng in zaw, khawvel inleng masuan lawta ahihziak in, siamna, lohchinna leh sum-le-pai a kidemna leng saang lawta hi. Mahni zi leh pasalte chiat khawng a nanunglam leh a poimohlou zaw a koih zen in sum-le-pai, khotaang leh saptuam ah mohpuakna delh hial kei ni. A zekai nung a kisiik sang in a hunlai in innsung bawlhoih tawmtawm zaw leng, ki thaman zaw hi. Nek-le-taak, inten-louten leh khosakna dia poimoh leh nuam huntawk i neih nakleh ‘hun’ chi thei le’ng zaw, innsung leng dam diing hi. Nu-pa kal a bit leh innsung leng bit a, gou manpha sum in a lei zohlouh nei kihi chihna ahi. Hindan a innkuan koih neu a, thildang i ngaih thupi zawk ziak un, i khotaang leh saptuam inleng siatlam manoh hiai-hiai ahita hi.

 

“Na zi na duat law zezen” ,”na pasal na duat law zezen”, hon chi a, zaakdah toh athuah uleh, i Nu-pa kal a kipolhngeihna manphatak pen haza ahihziak un, Melmapa vanzat ahi uh chih thei ni. I ki-iit leh kipolhngeih luat ziak a hon mu thadah tampite sang a, i koppihte manpha zaw daih ua, huchibang a ki-iittheihna hon petu Pathian, i kitenna in pahtawi ahi chih leng chiamteh ni.

 

Pate deihsakna thukhah:
Pate aw, Khotaang leh Saptuam ah mite pahtawi leh zahtat in om mahle uchin, innsung a na zi-le-tate adia kipumpiak iitna neilou ‘Pa’ na hihleh, Pathian hon sapna lampi tawnkha nai deklou nahi chihna ahi. Milak a siam leh sum phal tak a om, zi-le-tate adia kiren/chiil di thu genkhop chih bang zaw, kipilsak tawk lechin leng, haihuai lua ahi. Inn lianzaw leh Gari lianzaw delhna leh mite ngaihsan leh koih poimoh di utna ziak khawng in na zi-le-tate nelhsiah kei un aw?
Nute deihsakna thukhah:
Nute aw, khotaang leh saptuam ah mite phat  leh ngaihnat in om mah lehang, innsung a kiniamkhiakna neilou i hihleh, Pathian hon sapna lampi a paikhalou chihna kihi ahi. Mite’ awlmohna hau in mite saisai mahleng, mahni innsung buaipih diing tuk a buaipihlou i hihleh, kiveel thak ni. Dik kisa le hang leng dik hetlou hi hang. Pathian, Pathian chi chi le’ng le, i omdan leh kampau in i Pathian neihna a latsak keileh, zumhuai lua hi! Kibawl niuh!

 

Ataktak leh giltak a kitheituah leh ki-iittuah a Nu-pa hinkhua zattheih ahi aw!  Kipolh ngeihna thuuktak thil hithei ahihziak in, huchibang kizopna omtheihna di’a Pathianthu pansan a pan la thak diing in thupuukna bawl ni. Manpha law diing ahihziak in.
(1 Korinthte 13 ; Ephesate 4:2-3 ; Ephesate 5:21 ; Eklijiasti 4:9-12 ; Paunaakte 3:3-4 ; 1 Johan 4: 16 & 19 ; Philippite 2: 3-4 ; Romte 12:10)

 

Pathian’ gawmsa Nu-pate’n Jesu Khrist mitsuan kawm in pan la thak ni maw, lawmte! 

 

Chingngaihlian Tunglut 
June15/2020_NH_16
(Laigelh toh kisai kupbeh nuam omleh, Laigelhtu +919892316430 ah thuzaak theih diing hi.)


Leave a Reply

Your email address will not be published.

*
*
*

× Direct Appointment