2 Korinthte 3:17
Huan, Toupa tuh huai Kha ahi a, Toupa’ Kha omna peuh ah zalenna a om zel hi.
I Khristian khotaang i etvel chiang in, ‘Khristian’ kichi thumal leh hihna zangkhial i hita uhia chih ngaihtuahna ah hong luut hun tam mahmah hi. Nang leh ke’n Khristian min i putna adik hiam chih i ki-etthakna diing tam mahleh, zaleenna toh kisai in kietthakna nei le’ng i chi hi.
Khristian innsung leh khotaang ah piang mah le’ng, i pianthak keileh Khristian kihi kha mahmah lou hi. Jesu Khrist’ tatna pomte kia Khristian ahi uhi. Khristian kichi lah Pathianthu awi hih diing utlou a, chitak tak a Pathian adi’a hin haksa leh zohlouh di’a koih in, huphurhna a dim kitam mahmah hi. Chitak tak a Jesu Khrist nungzuih kipat diing ahi chih thei a kipankhe thei ngeilou mi tampi om uhi. Huchibang a omkha i hihleh, piangthak kichimah le’ng le, ki velthak poimoh diing hi.
Khovel mite paidan khat ahihleh, a hatlai un nna sem ua, nopsakna leh noptaalna zong ua, a teek chiang un, sahkhua leh ‘pathian’ zong in buaisek uhi. Khristian kichi i hihleh khovelmite buaidan a i buai diing uh hilou hi. Khovel paidan a pailou diingte khovel mite toh kibangsuk zel chih omtheilou hi (Romte 12:2). Kivel chian ni. Nekzonna leh innsung saina in bangchituk in buai in hun neilou kichi mah le’ng, i utnalam hihna di’n hun neilou kuamah kiom lou hi. I utnalamte Pathian nna sep, Pathian thu-le-laa leh huchilam a kisukbuaina, Pathian toh hun zatkhawm chih khawng a hi kholkei di’a hiven.
Hun hoih leh hun manpha i neihte khawng nei den diing kisa in, ‘ka hinkhua ka thu ahi’, ‘ka naupanlai, ka nungak/tangval lai, ka haatlai k’on zalzou (enjoy) phot/zek di’a huaichiah, Pathianthu awitak in ka om diing’ i chi sek uhi; ei thu a, ei uttan leh utdan a dam leh hing diing kisa i hi duam ah. Huchi bang lungput nei i hihleh, Pathianthu toh kituak a hin pen saltanna a ngai i hi chihna ahi. Lah Piangthaksa kichi ngal a, Pathian’ Kha in hong sungluah kichi zaleenna nei kisalou i hihleh, i ki suutthak poimoh diing hi. Galatiate 5:1 in, ‘Zaleen diing in Khrist in a hon suaktasakta a, huaiziak in ding kip unla, bawi hakkol ah zaw lut nawnta kei un’ achi hi. Hiai teng inleng Pathian thu kalh a lungtang taak takmai toh saltaang i hihna hon phoulaak khin hi (Romte 8:7).
Samitna leh salam utna hauhluat leh huailam a noptaalna chepkhaklouh diing lauhna ziak a, Pathian a di’a hinkhua bangtanhiam chauh kiphal i hihkhak uleh poi law kha diing hi. I theihlouh uh chu, I huchih sung un i saltanna a kip deuhdeuh ana kihi lim hi. I theilouh luatziak leh i muh kimlouhluat ziak hizaw sek hi. Toupa lam i ngat nakleh, a hon liahtu laakkhiak hizel ahi (2 Korinthte 3:16) chih chiamteh in, Toupa’ lam ngat kisin ni hang.
Tatsa i hihna ah, Khasiangthou tungtawn a hihdiing i theih lah i utlam toh kituak ngellou khawng a hong om a, i sa utnalam i delh chiang in, thutak liah a om chihna ahi a, Toupa lam nga ngellou chihna i hi mai hi. ‘Thutak na thei di ua thutak in hon suakta sak diing hi’ chi ahihziak in thutak liahtu a hong kilaak khiak chiang in Toupa thupina i mu zel hi. Toupa thupina mu himhim te zaw, Amah mel suun diing in khalam ah khek danglam touh zel in om uhi (2 Korinthte 3:18).
Dotna poimoh mahmah khat ahihleh, bangziak a zaleen diinglai zaleenna kisalou ihi d’ua? Pathian thu pen zuih khenkhat nei a zuihlouh khenkhat nei a, thutak kimkat khawng paipih nilouh i hih ziak hi utsek mahmah hi.
Hiai i khualzinna khovel ah Pathian’ thupiakte tengteng kizui khin vek zou tadih lou diing hi. Himahleh, i tup diing ahi. Tup ah zohlouhna ah Toupa’ Hehpihna kiningching lua hi chih thei ni. Lemtanlouh chiang a Pathianthu zuihlouh (zui theilou hilou a zui utlou) in zaleenna diing hon kam ana hisek hi chih leng thei ni. I vomkip dia poimoh nawn khat chu, khelhna ziak a Dan in hon mohpaih ahihlai in, Jesu Khrist ziak in Pathian’ thu mang di’n zaleenna piak in i hong omta uhi. Huai a hihtak ziak in, i kampau leh thilhih ah zaleenna tang i hihlam akilat diing ahi chih Jakob 2:12 ah i mu hi. Pathianthu in zaleenna hon piak ahibangtak a zang diing i chih leh chu, Pathianthu mah velchian a, mangngilh nawn maimah lou a, zui a, i sepkhiak zel diing ahi. Huchibang mi a thilhih ah vualzawl in a om ding hi chih Jacob 1:25 hon hilh hi.
Jesu Khrist mitsuan kawm ni maw, Lawmte!
-Chingngaihlian Tunglut
August 15, 2020/NH_18
(Laigelh toh kisai kupbeh nuam a omleh, +919892316430 ah laigelhtu thuzaak theih diing hi.)