MELMATE IIT HAKSA

0

Matthai 5:44
Ke’n zaw k’on hilh ahi, na melmate uh it unla, a hon sawite thum sak un

‘Melma’ i chih chiang in ei hon hawte, ei a dia thilsia deih, ei hon hihna leh ei hon langpansante ahi uhi. Huchibang mi kuapeuh in i hinkhua uah khat bek i tuakkha diing un i gingta hi. Himahleh, huchibang mi i tuahkhakte uh ahihleh i theihngei hetlouh leh muhkhakngei hetlouhte uh hi khollou uhi. I theihngeite mah leh i kinaihpihte mah ana hisek uhi. Ataangpi in, i innsung mite leh khawsakkhawmpihte mahmah bang hisek zomah uhi.

I Toupa thupiak ngaihtuah sau mahle’ng, Mahni innsungmite mahmah iit zoulou i hihleh, i melmate iit diing in i kichiil zou di’n a gintathuai kei hial hi. A pawlam a i melmate i iit theihna di’n innsung a i melmate iit di’n kithunun masa le’ng, a hi diingdan hong om di’n i ngaihtuah hi.
Jesu Khrist’ nungzuihna hinkhua a lungmuanhuai mahmah chu, i zuih diing a thu hon piakte i Toupa Jesu Khrist ngei inleng khovel a a omlai a a mualsuahsa vek ahi. Amah deihbang i hihtheihna diing ua A thu kia hilou a, gamtat a hong sinsak Pathian i neih ziak un, A min thupi ka phat ahi. Khelhna leh sihna apat hon tatkhiakna nna subuching diing a Khros ah kilhdet a A-om lai in, taksa, lungsim leh kha ah mihing thuaktheihval gentheihna a thuak lai in, a melmate adi’n, “Pa, amau ngaidam in; a thil hih uh a thei kei ua hi” chi’n a thumsak hi (Luke 23:34).

I chaangtel ah i Toupa’n i melmate iit diing in thu hon pia hi. Huai leng haksa i sak naklai a, huaisang a sangzaw a kalsuanna, huai chu, amaute adia thuumsak diing in thu hon piak behlap sawn lai hi. Mihing ngaihtuahna mai in zaw theihsiam ahaksa a, mihingte’n ei tupna a i hihtheih uh thil leng ahikei hi. Huaiziakin, Khasiangthou’ nnasep a i kingak uh poimoh hi; Khasiangthou tungtawn a khalam mit a hong vak chiang in thupiak i theisiamtheita di’a, i theihsiam chiang in, a zui diing in i kiniamkhiaktheita diing hi. Thumanna di’a kiniamkhiakna bang poimoh masa ahihziakin, i gaalte iit i sawm ma a eilam ah khauhtak a kithununna in asep masak ek poimoh hi.
Philippi 2:6-8 a i muh mahbang in, Jesu Khrist in hon iit ziak in, Pathian toh kikim ahihna koihkhe zen a kiniamkhiak in, mihing meelpu in, sikha bang in hong om a, khros a sihna tanpha in thumang hi. Toupa Jesu Khrist, ettontaak Siampulian i neih ziak in i kipaak petmah hi. Toupa kipiakzohna thupi lua e! Hotdamna i saan ma ua khelhna ziak a Pathian melma i hihlai un, A hon iitna a latsakna di’n, a Tapa Jesu Khrist eite a di’n hong si hi (Romte 5:8). Huaiziak in, eite’n leng i melmate i iitna i latsak theihna diing ahihleh thilhih mah ahi a, huai chu, amaute thuumsak ahi. Ei hon hawte hi’n en i huatte hitaleh, amaute adia thuumsakna in eilam a khekngai omte hon khek daih hi chih kei mimal ngei inleng ka chetsa ahi.

Pathian’ thupiakte zui zoulousa a kikoih a, tup a leng neilou chih tam mahmah hi. Himahleh ei hotdamsate’ adi’n zaw, thumanna mah in Toupa i kipaaksak a, eimah adi’n leng hoih hi chih i kitheihthaksak poimoh gige hi. Melmate iit diing chih thupiak sepsuah thil haksapi himahleh, hon hihhaatpa Pathian toh a hitheilou omlou chih Luke 2:37 leh Philippite 4:13 ah i mu hi. A haksatna suanlam lemtaang a zang a, sepsuah sawmlou leh kitheihmohbawl a i om sang in, haksa sa pipi in sepsuah tum tinten le’ng, i zoh louh chiang in, Toupa’ Hepihna in i chitlouhna liahkhuh zou mahmah hi. I gimman a thawn hilou di’a, Van ah i gou di’n ana kikhol lai diing hi (Matthai 6:19-21). 

Jesu Khrist mitsuan kawm ni maw, lawmte!

 

-Chingngaihlian Tunglut

August 08, 2020/NH_17

(Laigelh toh kisai kupbeh nuam a omleh, +919892316430 ah laigelhtu thuzaak theih diing hi.)

Chingngaihlian Tunglut
WRITTEN BY

Chingngaihlian Tunglut

She is one of the two co-founders and the in-house counsellor. Her freelancing works include lots of voluntary and 'Pro Bono' counselling in church and community. She is also extensively involved as a counsellor at Bombay YMCA Counselling Centre, CBD Belapur, Navi Mumbai. She has been trained and certified in several Mental Health and associated courses. She is also a certified trainer. She is passionate about young people and the issues they face. She has facilitated workshops on Mental Health and other relevant issues and is involved as facilitator in counselling courses and Sunday School teachers training from time to time.

(Please contact her for seminars and workshops about adolescent and youth issues and mental health etc. As a trainer, she is also passionate about training and equipping people to better serve the body of the Lord Jesus Christ in children, youth and women ministry)

Leave a Reply

Your email address will not be published. Required fields are marked *

Book Appointment