Joshua 1:9
Thu ka hon pia hilou hiam? Hattak leh hangtak in om in; lau ke’n la, lunglel sam ke’n: TOUPA na Pathian na paina peuh a na kiang a om zel ding ahi, chi’n a gen a.

I chaangtel ahihleh, Khristian tamzawte’ lak a thang mahmah, mahni leh midangte khamuanna di’a ki-hahzat mahmah khat ahi. Pathianthu ahihleh, a chaang khat kia eukhia a ei hoihsakdan a zat khaak diing pilvan poimoh hi. Bible i sim chiang in, a hun leh dinmun, kua leh bangthu toh kisai ahia chih thei kawm a, ei tulel a di’a bangchi zat diing ihia chih leng theih poimoh hun tam mahmah hi. “Na melmate iit in” chih bang, a chaang khat kia eukhiak in zatheih mahleh, mi tamzawte’n kihasuanna di’n kizang ngellou hi. Huai sang in, “Amah hon hihhatpa ah thil tengteng ka hih thei hi” chih bang ei mimal hamphatna leh masuanna diing ahihziak in, eukhia in zat poi kisalou hi. “I melmate iit haksa lua himahleh, Amah hon hihhatpa ah itt-theih hi” chih beek in zang le’ng chu, chang khat kia eukhe le’ng le, zat dik hikha di’n ka gingta hi.

I Toupa Jesu Khrist ngei leng Laisiangthou pansan in Melmapa’n khem den hi (Matthai 4:1-11). Huaiziakin, Setan leh a kaihzatamte’n Pathianthu mah awlsamtak a mi khem leh kaih-buaina di’n zang remchaang diing uhi. Laisiangthou i suut tam a tuipaaitak a i na omleh, khemna i tuahchiang in, Pathianthu mah zang in huai khemnate ana dou zel thei diing i hi.
Mituam va chi se lou in, eimah bang gentehna’n ana kingaihtuah zual le’ng, ki-sung-et a, ei-le-ei i hihna bangtak a ki-maituah ngam i hihleh, i sung a teeng Khasiangthou in hon awilouh thei kawmkawm i sa leh lungsim’ utna i sukbuchinna hiam ahihkeileh mahni gamtat a kisiamtanna diing hiam a Pathianthu kizangkha lawtel di’n i ngaihtuah hi. Khempuuk a huchia ana omsek i hihlam kitheilou leng kitam di’n a gintathuai hi.

Pathian thutak kia in Setan’ zuau zouthei ahihziak in, Khristian kichi i hihleh, Laisiangthou sim a suut i chhing zongsak uh poimoh hi (Isai 28: 9-10). Pathianthu i theihkei leh, Pathianthu mah hong kiheekkawi a khemna hong pai chiang a kihemkhe theilou diing i hi. Pilvangtak a om a, melmapa khem chatvaih a i-omlouhna di’a gul bang a pil a poimoh tuk in vakhu bang a nunnemna leng poimoh hi. Kei mimal bangleng ka kisin khop tek sek hi.
Bible sim tamlou a Khasiangthou piina kia a kinga gingtu hinkhua hingtak zattheih louh diing hi. Bangziak hiam i chihleh, Bible sim ngailou zen a Khasiangthou in hon luah dimna diing a Khalam thilte kia buaipih man kihi geuh lou ahihziak ahi. A thu sim a, suut a, huaite tungtawn a Khasiangthou in haatna hon gotdan dungzui a, gamtangkhe thei diing kihi zaw hi. Bible sim diing omlou chih hilou zomah lai maw? Tu hun diakdiak bang a chu, nidang toh teh a, internet ziak a Bible suut bang awlsamzaw tham ahihna toh suanlam diing kinei tawm mahmah hi, adiak a internet khoihthei chiangte pawl adi bang inchu. Nachi kei uh maw?

I chaangtel ahihleh Pathian in Israelte a Gamchiam Gamlam zuan a Joshua’ makaih a a pii tuunglai ahi a, Johsua A hanthawnna leh a khamuanna ahi. Mosi’ tha khekkhia a, Israelte nuaih nih phial makaih diing a hong kisa ahihziak in, kisitna leh lauhthawngna lianpi nei le’ng hikha in a theihsiam theih hi. Huaiziak mahtak le’ng ahi di’a, Pathian in Joshua nasatak in haanthawn a, naakpitak in khamuanna thu genpih hi. Bung 1 chaang 1 a kipat i simsuk leh, chaang 9na i tun tan in Pathian in Joshua a khamuanna di’n 3 vei tak hanthawnna gensak man hi: “Lau ke’n la, lunglel sam ke’n”  chi in.

A Gamchiam Gam zotna ah Pathian in Joshua ompih diing thuchiam pia a, laulou leh lunglel lou di’n khamuan hi. Huai mahbang in eite kiang ah leng i tangtawn Gamchiamlam zuan a niteng hinkhua i zatna ah, Jesu Khrist ziak in hon ompih den diing hi chih khamuanna i neithei ta hi. Toupa hoih hi. Himahleh A thu zui lou a, a lungmuanna leh khamuanna kia lam-en leh gen i hihleh chu, ei-le-ei kikhem a midangte leng ei tungtawn a Setan in khem chihna hikha diing ahi. Pathianthu i chih ei ut hunhun leh utna munmun a zuih a, peihlouh leh remchanglouh chiang a zuihlou chih omtheilou hi (Jacob 2:10-11). Huchidan a om i hihleh zaw hattak leh hangtak a Tangtawn Gamchiamlam zuan a pai kihi mawk lou diing hi. Toupa’n Joshua kiang ah, “thu ka hon pe kei a hia?” chih dotna a bawl masa hi chih chiamteh poimoh hi. Bang thu pia ahi di’a leh i chihleh, I na genzek sa mahbang in, A thu a kibulphuh diing ahi (Joshua 1:7-8). A Thu in kibulphuh masa le’ng, zuau ngeilou Pathian in A thuchiamte semkhia in, A thupina tampi hon musak zel diing hi.

Tangtawn Gamchiamlam i zotna lampi lauhthawnghuai sek mahleh, laulou diing a thu hon pepa’n hon ompih a, hon tonpih diing thu hon chiam ahihziak in, khamuanhuai lua hi. Himahleh, A thupiak zuilou leh hinpihlou pi a, haksatna i tuah chiang a thakhat a hon hehnem leh panpih di’a i lamet uh hai-vai lua hikha diing hi. Pathianthu i chih niteng a i nek kei leh kibahse thei hi. Taamsawl in hon phaak man ngak sese lou in, niteng in i poimoh diing zah ana ne zel leng, khalam thagum leng ana kingah toutou di’a, i poimoh chiang in hihhat in ki-om zel diing hi. Niteng hinna diing a  salam ann i poimoh tuk in, niteng Khalam ann (Pathianthu) leng i hinna diing in kipoimoh hi. Salam ann kia nesek i hihleh, khalam a ana kikhang khollou diing hi.

Tangtawn Gamchiamlam zuan a hiai khovel gamdaigam a hattak leh hangtak a malam i nawt theih zel na di’n niteng a Pathianthu a kibulphuh di’n pan lathak chiat ni. Pathianthu a tuipaaitak a omna in i lauhnate a hunhun in delhmang zel hi.

 
Jesu Khrist mitsuankawm ni maw, lawmte! 

 

-Chingngaihlian Tunglut 
August 01, 2020/NH_16

(Laigelh toh kisai kupbeh nuam  a omleh, laigelhtu +919892316430 ah  thuzaak theih diing hi.)

Leave a Reply

× Direct Appointment