NUNGZUI HINKHUA: KHRISTIANTE SOISAKNA THU A LUNGPUT

Matthai 5:44
Ke’n zaw k’on hilh ahi, na melmate uh it unla, a hon sawite thum sak un. 

 

Khristiante soisakna leh bawlsiatna khawng a vangkim in kiza zelzel hi. Huai baan ah, Bible paih, Bible haal, Bible botsia chih khawng leh Biakinn hihsiatna, luhna leh thaanghuaitak a zatna khawng leng kiza zelzel hi.
Huchibang thute i zaak chiang un i lungsim uah bang a hong om sek? Amasa pen in i lungtang hon hihliam pah a, ki pawna petmah hi. I lungsim nat toh kiton in thangpaihna in zui sek ahihziak in, Pathian in a khialte gawt ek in gawt pah mai leh chihhuai sa tampi ki-om di’n a gintathuai hi. Puaknak luat ziak mah in, a khialte bangchihiam khat a thukthei ahihkeileh leng theisiamsak thei bek hile’ng chih uthuai tuntun chih bang leng omthei lua hi.

 

Himahleh, huchi diingdan hikhin lou hial hi chih thei ni. Hiai toh kisai a, amasa pen a i theih d’ua poimoh mahmah khat ahihleh, ei mihingte hum (protect) Pathian in poimoh hetlou hi. I ginna leh A Thu i gup diing him himahleh Amah i hum diing hilou a, i hum vual leng hilou ahi chih thei ni. Amah thil tengteng Siamtu leh bangkim tung a thuneitu ahihziak in ei mihing, asiamsate’n Amah hum na di’n bangmah hihtheih i nei kei uhi. Ei hon poimoh kei mahleh Amah ah i kipahna di leh Amah thupina di’n A seppihtute di’n hon zang hi.
(Nasepte 17:25 ; Eksodas 3:14 ; Sam 50:9-12 ; Isai 40:17 ; 1 Korinthte 3:9 ; Romte 8:28)

 

‘Biakinn’ i chihchiang in, ei mihing’ khut in i bawltawm ahi. Amah i biakna mun ahihziak a siangthoutak leh zahtattak a i kep diing him ahi. Huai toh kiton a i theih diing ahihleh, ei bawltawm biakinn sang in Amah khutsuak A Biakinn diktak eite ah Pathian buai zaw hi. I lungtang mah buaipihzaw a Ana enchian gige ahihziak in, huchibang thute i zaak chiang in leh huchibang a khialte tunga bangchibang lungsim i na pu a chih ah buai zaw hi.
Ahia lah, ei gingtute lungsim nasak thilte’n Amah leng sukha ahihziakin, huchia gamtaangte Ama’n ana dawng di’n koih pah thei leng, hoih diing hi. Amah vaihawm diingdan i ngaihtuahsak poimoh hetlou a (Isai 40:13-14), i lungtang put pen i na bawldik poimoh hi (Paunaakte 4:23 ; Romte 12:2).
I pawna na mah ke! Himahleh, huchibang a khialte tung a thangpai a, hua a, Pathian in A gawt diingdan leh A gawt diing hun hiam ngaihtuah in buai kei thei ham le’ng hoih pen diing hi.
Amaute siamtu Pathian in a lungtang uh A theihsuak vek baan ah, Amau a dia le Toupa Jesu Krist si ahih ziak in Pathian in a hih diingdan thei lawtel a, a tung uah thutanna dik Ama’n tun diing ahi chi in ki lungmuangsak ni (Matthai 5:45 ; John 3:16). 

 

I chang tel ah, melmate iit diing kia hilou in, hon sawi te a di natawm a thumsak di’a Toupa Jesu Khrist in hon deih ahihmahbang in, a gamtatdan ua i lungtang kikhamsa toh amaute a di’n i na thumsak diing uh ahi zaw hi. Amau a dia i thumsak leh amaute tung a iitna suah kihi ahi chih leng chiamteh poimoh diing hi.

 

Pathian vaihawm diingdan va saisak sawm lou in (Matthai 5:45), i melmate iit a, a hon sawite thuumsak a, vualzawl zaw geih (1 Peter 3:9) thei diing in eimah adi’n leng thuum ni.
En i hih diing hihlou zen in Toupa Pathian hihdiingte buaipih nawn kei ni.

 

Jesu Khrist mitsuan kawm ni maw, lawmte! 

 

-Chingngaihlian Tunglut 
June11/2020_NH_15
(Laigelh toh kisai kupbeh nuam omleh, Laigelhtu +919892316430 ah thuzaak theih diing hi.)


Leave a Reply

Your email address will not be published.

*
*
*

× Direct Appointment