KHRISTIAN SEPAIH GALHANG

0
2 Timothi 2:4
Sepaih a om diing a a teelpa kipahsak theihna di’n, sepaih kuamah kidoulai in hiai damsung khosaknate in a kisubuai ngei kei hi.

 

Sepaih galhang, hinna natawm piak poisalou a gam-le-nam a dia pangte thupi i sa petmah uhi. A sihna ua pahtawi ahihdan khawng uh i muh chiang in chimul bang thou thei hi. A luang uh amau tenna mun a kipuaktung chiang in thupithei pen in zahna sangpi toh ngainatak leh lainattak a vaidawnna, pahtawina leh gaalna neih in om sek hi. A sihna uh athawn hingei lou a, asihna un khangthakte ngaihtuahna tampi khekdanglam hi. Huai ban ah, amau kipumpiakna in a gam sorkar vaihawmna, kivaipuakna leh khawvel paidan natawm heidanglam thei ahihziak in thupi mahmah uhi.

 

I lei khualzinna i khit chiang in, ei leng i sihni tuang hong tung dia, i luang tung ah mite’n ahoihtheipen in hon gen sam diing uhi. Huai ni chiang in thildang teng sang in Khrist’ sepaih galhang ihihna a gen uh uthuai pen kasa hi. I luang tung a Pathian sepaih galhang i hihlam a gen diing uh uthuai himahleh, huai sang mah in, Van ah Pathian’ sepaih galhang dan a hon na vaidawn diing mahmah uh uthuai kasa petmah hi. I lei hinkhua pen a thupipen di’n koih khanaak mahleng, i Van inn pen i inn diktak leh thupizaw ahihlam mangngilh lou di’n Pathian’ Kha piina zui ni. I lei damsung a khalam sepaih i hihna pen ahidiing bang a zangkha lou zen a gammang a omkha i na hih lebel, sepaih diing a hon teelpa’n Amah kiang a hon sapkik chiang in i gen diing omlou kha thei hi. Huai phetlou in, i hihna hinpih khalou a i sep diing semkhalou i na hih leh, ‘kah leh hagawina’ lam a hon paikhe zomah lai diing hi (Matthai 24:51 & 25:30).

 

Sepaih ichih chiang in mi chitak, ki thununtak a khosa, a poimoh leh a hinna natawm a gam-le-nam a diing a pe di’a mansa zen a thupiak zui chihna ahi. Jesu Khrist tatna pom ihihleh, Pathian’ ta hihna piak a i om kia hilou in A Kumpigam a khalam sepaih hihna toh leng piakkhawm in i om uhi. I hihna, (Ta leh sepaih hihna) kithei le’ng i ngaihtuahna leh hindan leng hong kikhek diing hi.

 

Khristian sepaihte’n I doute uh sa-le-sisan hilou uhi (Ephesate 6:12). Melma haattak, i kigin louhlai leh i haatlouhna mun tak a hon dou zel zomah nei ihihlam uh i theih poimoh lua hi (Jacob 1:14). Jesu Khrist sepaih ihihna uah i galvan in i kithuam gige na hiam chih leng avangkim a kivelphat leh ki-ettel poimoh hi (Epheste 6:13-18). 
I taangteel in agen mah bang in, gingtute sepaih a om ding a hon teelpa Pathian i kipahsak diing ahi. Amah i kipahsak diingdan ahihleh, Sepaih galphual a om ihihlam kithei a, kidoulai a hiai damsung khosaknate ah kisubuai lou a i om diing uh chih ahi (Romte 12:2 ; Tita 2:12).

 

Lei a sepaih galhangte thupitak a leimite’n a vaidawnna uh leh van a sepaih galhang vanmite’n thupitak a ana vaidawnna uh tehvual hihet lou diing ahi chih mangngilh kei ni. Khrist Jesu sepaih hoihtak bang in gimthuak poisalou in phaakchiam delh tuntun ni ( 2 Timothi 2:3 ; Philippite 3:14). Lunghimoh lou in i galdou sunzom zel ni; eimah a ompa, sepaih diing a hon teelpa bangkim a haatzaw leh bangkim tung a thuneipa ahihziakin (1 John 4:4, Nasepte 4:24).

 

Jesu Khrist mitsuan kawm ni maw, Lawmte
-Chingngaihlian Tunglut
June 22, 2020/NH_14
(Laigelh toh kisai kupbeh nuam a omleh, +919892316430 ah laigelhtu thuzaak theih diing hi.)
Chingngaihlian Tunglut
WRITTEN BY

Chingngaihlian Tunglut

She is one of the two co-founders and the in-house counsellor. Her freelancing works include lots of voluntary and 'Pro Bono' counselling in church and community. She is also extensively involved as a counsellor at Bombay YMCA Counselling Centre, CBD Belapur, Navi Mumbai. She has been trained and certified in several Mental Health and associated courses. She is also a certified trainer. She is passionate about young people and the issues they face. She has facilitated workshops on Mental Health and other relevant issues and is involved as facilitator in counselling courses and Sunday School teachers training from time to time.

(Please contact her for seminars and workshops about adolescent and youth issues and mental health etc. As a trainer, she is also passionate about training and equipping people to better serve the body of the Lord Jesus Christ in children, youth and women ministry)

Leave a Reply

Your email address will not be published. Required fields are marked *

Book Appointment