NUNGZUI HINKHUA: Etton Taak Hi In – Part 2

Philippite 3:17
Unaute aw, kei hon entonte hi vek unla, kou non etton mah bang un zuih diing a ka hon piakte uh, a zui mite chiamteh un.

 

I chang teel ah, sawltak Paul in Philippite kiang a a lai khak ah, ‘kei hon enton un’ achi hi. Ei leng Jesu Khrist nungzui kichi sam i hihleh, mi khatpeuh kiang ah, ‘kei hon enton’ in i chi ngam diam? Tulel a eite dinmun toh bulhtuah leng; kikhom gigete achikei a, saptuam a naktak a kizangte a chikei a, thugen tampi ngaikhete achikei a, Bible simsuak te achikei a, Bible gelh suakte leng achi kei hi. Etton tak achihte ahihleh, Amah om bang a omte, huai ahihleh, paudaan, omdaan leh gamtat a niteng hinkhua a Pathianmitna langkhesak a Pathian thutak hinpihte ahi uhi. Mite’n ‘hiai minu/mipa zaw kikhom gige hiveh aw’ hon chih sang un, ‘kikhom gige inchin, Pathianthu hinpih zomah lai ahi’ hon chi zaw le uh etton taak ki hi pan diing hi.
Sawltak Paul in bangziak a amaute ombang a omte chiamteh poimoh sa ahia chih gen zek le’ng; Pathianthu mangte, Pathian laute, Khrisť tanchinhoih leh a Kumpigam a dia gentheih poisaloute, Pathianthu hinpih a, etton taak dia om; amaute toh ki chimat a, ki pawlkhawm a, kitheihtuah poimoh asak ziak a chiamteh tham ahihlam uh a gen tel ahi. Pathian’ mite kichimatna pen ki tathiamtuah na di’n poimoh a (Paunaakte 27:17), Pathian leng amaute lak ah om hi (Matthai 18:20). 

 

1 Korinte:4:16 ah, ‘Huaiziak in, ka omdan zui di’n ka hon ngen ahi’ chi’n ngetna a bawl nawn hi. Sawltak Paul in ‘kei hon enton un’ achih ziak a Jesu Khris sang a Amah lam mite’n en zaw dia deih chihna ahikei hi. ‘Jesu Khrist nei a hinpihte hichibang a hing uh ahi’ achihna ahi zaw hi. ‘Chituam diing a sap a a om bang ngei ua om uh ahi’ achih utna hizaw hi. Tuni’n, nang leh kei ah Jesu Khrist i neihlam ettontaak di’n a kilang khia hia?

 

Jesu Khrist mitsuan kawm ni maw, lawmte!

 

-Chingngaihlian Tunglut


Leave a Reply

Your email address will not be published.

*
*
*

× Direct Appointment