NAUPANGTE ETTON TAAK HI IN

Paunaakte 22:6
A paina ding lampi ah naupang chiil in, huan a upat hun na ngawn in leng huai a kipan a paimang kei ding hi.

‘Chiil’ ichih chiang in, thuhilh hizawlou in, ‘mit a muhtheih dia lak a sinsak’ chihna hizaw hi. Kampau leh omdan diing hilh a hilh thoh sang in muhtheih leh etton taak in hinkhua zang le’ng ‘chiil’ dik kisuak diing hi.

Tu a naupang hong khangthak dite i houpihdan uh tu khonung in saptuam leh khotang ah muhtheih in hong kilangkhe diing hi. Tulel a i kampau leh omdan innsung, saptuam leh khotaang a amuhte mah uh hon zangtou diing ahih ziakun, etton tak a piichingte i om uh Pathian mai a i mohpuak uh ahi.

I mi zahtatte zahtattak in ki houpih hi. Huaidan in naupangte le amau hihna tan a zahtatdan om ahi. Naupang chia ninbawl leh nawlkhin hang a, ka ‘ta’ chia van neitu a van akineihsak dan a tate bawl hang a, a omdan uh Nu-le-pa, saptuam leh khotang standard toh akituahlouh chiang a, ‘THUMANGLOU’, ‘MIGILOU’ chi a ademte leng a khanletna ua mohpuakna neikha ngen hizel. A hun hong tun chiang a, amohpuakna uh la dia thakhat a sawl leh dinmun ziak in nget in omzel zomah uhi. Ahuchih chiang in ahi diingdan theilou a buai den tampi om uhi chih tulel khang a omte tungtawn in chet theih hi.

Etton taak diing in kampau leh omdan ah pilvang ni hang (1 Korinthte 11:1). Huchilou in zaw, i mangthai gai di uh. Ase sa bawlhoih sang in asiatma a kepbit in thil tampi siatbeh diing veng zaw hi.

Etton tak hi diing in Jesu Khrist mitsuan kawm in pai ni maw!

May 01, 2020/Parenting_01

 

(Laigelh toh kisai kupbeh nuam a omleh, +919892316430 ah laigelhtu thuzaak theih diing hi.)

1 comment

  1. Hoih mahmah ei. Nuamlua hon navaak sak mahmah.

Leave a Reply

× Direct Appointment