NUNGZUI HINKHUA: AMAH AH NA OM HIA?

Amah ah ka om gige, chi mi tuh amah om bang in a om sam ding ahi. – 1 Johan 2:6

‘Toupa Jesu ah om kahi’ i kichih leh ‘Amah om bangbang a om diing kahi’ i kichihna ahi. Huchibang a om zoh ngeilouh diing suanlam in bawl sek mahleng, Khrist lungput leh omdaan batna delh a malam nawt zel diing ihihlam uh dau tuanlou hi. A omdantak ahihleh, Amah i sut deuhdeuh diing uhi ahi, a tam-a tawm, akin-a awl thutuam ahi. Amah deihbang a i kikhek lam mahni i kitheih kia hilou in, mite muhtheih diing a leng akilat zel diing ahi. Huai di’n, I sa hatlouhna suanlam tawpsan a, etton tak Sawltak Paul dan a i hatlouh chiang a Pathian hatna a i kingak diing uh ahizaw hi. Eite’n bel, i masuan louhna, nungtohna leh puksiatna suanlam pha-ze dia i hatlouhna uh kizang geih zel!

 

‘Piangthak kahi’ iki chih leh, Amah ah i om gige hiam chih avangkim a i ki suut zelzel poimoh hi (2 Korinthte 13:5; Kahla 3:40).
Toupa Jesu ah om i hihlam alatna ahihleh midangte i iitna ah ahi (John 13:35). Huchi in, midangte iit ding a thupiak a om ihihna ah, ‘mite ka iit’ iki chi ut sam hi. Mite iittheihna i neih ziak leng Aman hon iit masak ziak ahi lel hi (1 Johan 4:19). Himahleh, mi iit diingdan leng ana om zel hi. Huai i theihthaksakna di’n Ama hon iitdaan taklang thak leng ka chi hi: A hon iitdaan ahih leh kipumpiak leh sihchilh zen in hon iit hi. Ama’n hon iitdan enton diing i hihman in, i innveng te I iitdan i bawldik zelzel poimoh hi.
Angmasial tak a, amau poimohdan hizaw lou a ei hoihsak daan a, ei phattuamna diing ngaihtuah kawm leh lam-et neikawm mi iit ihih leh bel, Jesu Khris iitdaan a iit kha lou kisuak diing hi. Jesu Khrist ah om kichi, lah Amah omdan a om diing a thu hon piakte zui lou ihihleh chu, mi zuauthei thutak ei a omlou chihna kihi lel hi (1 Johan 2:4). Thutak a hing kha lou a, ei leh ei kikhem lungawina diing tan lel a Amah ah ka om kichi hikha thei hang. Gim tak a Amah ah om kisa himah le’ng Amah a omkhak hetlouh theih hi. Khawngei-ngai ni!

 

Jesu Khris mitsuan kawm in iitna suah sawm ni maw, lawmte! 

 

-Chingngaihlian Tunglut
May14/2020_NH_A/04


Leave a Reply

Your email address will not be published.

*
*
*

× Direct Appointment