Khristmas ni hongtung dek mahmah ah i ding lel uh a, nidanglai bang hileh kisak kholhnate hiai sang in a thupi zaw ding hi. Tu natna ziak a zang theilou ding in om mah le hang bang tan hiam ah mahni ah kisakkholhna leh lungsim khat ah utna khat i nei chiat uhi. Toupa saptuam mite mun khat a pai khawm a i Hondampa hongpiang ni kipaktak a lawmkhawm thei hileng a ut huai mahmah mai hi. Himahleh hiai bang dinmun a om theilou phot i hih ziak un, i zat theih dan chiat ua kipaktak a zang a, Toupa hoih na a thupi na i muhsem na uh leh, Amah i naih sem na uh hi ding in i omna peuh uah ki thalawp tak a zang chiat ding in iki chial hi.
“….Nuam gige un; Tawplou in thum un; Bangkim ah kipahthu gen gige un; huai tuh noumau lam a Khrist Jesu ah Pathian deihlam ahi.” – 1 Thess. 5:16-18
Awle tukal adia i tangtel tuh a thupi mahmah hi. A thute in agen nopte theisiam theivek hileng i niteng hun zatna uah hong panpih mahmah ding hi. Hiai i thugelhte i simsuak in hon theisiam sak ngei ding in I gingta a, tua mah tuh i thumna ahi pen hi.
Mi chih in haksa i sak chiat utuh kipahthu gen chih khong ahi sek hi, tua tan hileh hun lua ahihlai’n kipahthu gen ding leng theilou leh a hun ding leng nei manlou zen in kinohtak in i hunte uh i zang liam zungzung lai uhi. I tangtel ah, nuam un, thumun leh kipahthu gen un chih thumal thum i mu a, tua te tuh i leitung hinkhua ua i om ding dan uh i Pathian deihlam ahi. Hiai thumal thumte ngaihtuahna khat a koih mailou a, a thumalte khatkhat a ngaihtuah detdet ding in iki ngen a, tua te sau lou chikchik in i en ding.
Nuam Gige Un (Kipak Gige Un): Toupa Khasiangthou in a ompih te leh Toupa toh tonkhawm gige te’ tuh bang hun lai peuh in a nuam thei gige uh a, kipaktak in a om thei gige uhi. Toupa toh i omkhawm chiang in i ngaihtuahna te a siang a, i hotdamna a bit a hon lung-buai sak thei ding bang hiam hong om inleng tua te tung a kipahna i neithei lai hi. Gingtu te nuamna leh kipahna zaw bang hiam thil a akingak ding ahi kei hial hi. Hiai bang a i kipahna te uh bang hiam i thil hoih hihte, I lam-ette, i utte leh i deihte uh i muh chiang lel ua kipahna taktak neithei i hih leh ei ah adiklou om ahi kha thei a iki etchet gige apoimoh hi. Piangthak na taktak nei a, Toupa a ki bulphuh na taktak nei mite’n tua kipahna thuguk anei thei gige uhi. Amau te’n haksatna leh buainate tuak nawn lou uh mawle? Ii, tuak tham mah uh ahi. Himahleh hiai haksatna leh buaina te ziak in a kipahna uh bei leh om theilou ahi kei a, hiai te tungtawn in lametna leh kipahna i Toupa a om gige ahih dan a thei uh a tua te ziak in anuam un akipakthei gige uhi.
Hiai tan i sim in i ngaihtuahna bangtan a i omsak a, hiai la thu tele ngaihtuah lai ding in i ki ngen hi. “A Hoih Hi, Ka Kha Ding (It Is Well With My Soul)” Muanna’n tuipi bang ka lampi honzuih chiang’, lungkham tuipi bang kihawt chiang’; Bangteng ka tuak zong, hiai thei ding non sinsak; “A hoih hi, a hoih hi, ka kha ding.”
I hinkhua ah haksatnate tampi tuak tham mahni , i mailam hun ah le i tuah touhtouh ding hong om lailai ding hi. Himahleh hiaite ziakin lungkham leh mangbang a om a, lungliap in om kei ni. Hichi bang hunte tuak lou ding a chi thei kuamah i om kei uh a, hiai bang hunte i tuah hun in Laisiangthoute sim in, Toupa ah iki hat thei gige hi. “… Huai thu ziak in ka bah kei uhi; i pawlam mihing zawngkhal hiaihiai mahleh, i sunglam mihing pen niteng a bawlthak zel in a omzaw ahi. Ka gimthuakna neukha uh tu mitphiatkal sung kia a om ding in, thupina thupitak tangtawn a ding in a hon bawlsak hulhul ahi; Thil muhtheihte enlou in, thil muhtheihlouhte ka en zaw uhi; thil muhtheihte zaw sawtlou kal a ding ahi a, thil muhtheihlouhte bel tangtawn a ding ahizaw hi.” – 2 Korinthte 4:16-18.
I kipahna atawm hun leh bah i kisak hunte in i Toupa’ Jesu tungtawn in i ki hat thei a, Amah lam i en gige thei hi. “…. Jesu, i ginna siampa leh hihkippa, a ma a kipahna om ziak a zahlaknate ngaineu a Kros a thuakpa, Pathian mangtutphah taklam a tupa, Amah lam en in.Na khalam ua na bah ua, na lungkiak louhna ding un, mikhialte apan a huchibang a selkalhna thuakpa ngaihtuah un” – Hebrute 12: 2-3.
Tawplou In Thum Un: Thumna poimoh dan a theilou i om kei ua, ging lou mi te’n leng amau pathian ma ah diktat leh chitaktak a athum dan uh i mu hi. Hiai in thumna ei gingtu te ading bangzah ta in a poimoh zaw sem diam chih hon ngaihtuah sak mahmah hi. Ginglou mite’n pathian bawl tawm te bia in amau te mai ah a thum sek uhi, eite bel tua bang ihi kei uh a Toupa i kiang ah a om gige hi. Hiai tuh i phawk gige uh apoimoh mahmah kasa lua hi. Thum ding i chih chiang in mitsi sese a thum ding hiam, mundai hiam, eivuak a hiam leh biak khawmna te a i thumna te uh chih ahi sese kei hi, chiklai peuh in, koi mun peuh ah om mah le hang i lungsim un i thum thei gige uhi. I theih ding ua poimoh mahmah tuh Thumna i neih tam na utuh Toupa ompihna i phawkna leng ahi hi. Toupa toh iki kal hon naisak gige tu leng i thumna te uh ahi vek hi. Tawplou a thum ding a Toupa hon sinsak bang in, i thum tam in kipahna, lungmuanna leh Khamuanna a hongpia hi. Thum ngeilou mi’n zaw Toupa ompihna a phawk zaw gige kei chihna ahi a, himahleh Toupa nei mite’n zaw thumna ding, hun teng a Toupa houpih theihna ding a nei gige uhi. Kipahthu genna ding bang, Toupa hoihna, thupina a muhte uh tungawn bang leh a thiltuah te uh tungtawn in tawplou in thum na ding anei thei uhi.
“…. Bangmahlou ah mangbang kei un; himahleh thil bangkim ah, thumna ngetna, kipahthugenna toh na ngetnate uh Pathian kiang ah theihsak in om hen. Huchi in Pathian muanna, lungsim himhim a theihzoh vuallouh in Khrist Jesu ah na lungtang leh na ngaihtuahnate uh a hon kepsak ngeingei ding hi.” – Philippite 4:6-7
Khawl lou a, hunteng a i thumna neih in bang hon sinsak a i chih leh, bangkim a Toupa khut a kinga i hih dan uh a hon sinsak hi. Thumna neitam lou a, mahni hih utte hih a i hunteng i zat bei chiangin hiai in Toupa ah iki nga zou taktak nai kei a, ei mah pilna leh siamna omte mah suang ut zaw lai i hih dan uh a hon lak hi. Thumna neitam a Toupa kiang a kipahthu hiam ahoihna te i gen mun chiang in, hiai in Amah i Toupa a kinga ihih dan, Amah toh ton gige ihih dante leh Amah lou a hing zoulou ding ihih a hon theisak a, tua te’n ei ah kipahna te honpia in i lungtang deihlamte ah hon vualzawl semsem hi.
“….Toupa tung ah leng kipak in; huchi in na lungtang deihlamte a honpe ding hi.” – Sam 37:4
Bangkim Ah Kipahthu Gen Un: A tawpna a bangkim a kipahthu gen ding chih tuh mi tamtak te tung ah a hong hi thei pah kei hial ding hi. Bangkim a kipahthu gen theihna ding in bangkim Toupa khut a ngak zoh a ngai a, Amah a muanna i neih apoimoh masa pen hi. Amah ah i hih na bangbang toh iki piakkhiat chiang in bangkim ah kipahthu i gen thei zaw hi. Tua bang ahih louh chiang in kipahthu gen ding leng i nei tawm mahmah uh a, tua nak sang in i taksap te uleh i haksatna un i lungsim uh ala zaw hi. I tung ah bangteng hongtung lele Toupa Nang thu hi hen chia Toupa thumna a i na gen sek bang ua Toupa nang deihna hi zaw hen cia kipahthu i gen theih gige a poimoh hi. Tua ding in Toupa toh ton a, Amah a ki hih hat semsem a bangkim a kipahthu gen thei gige te hi ding in simtute i ki chial hi.
Tutung Khristmas te khong le maban a kumthak hongtung dingte khong utdan leh deihdan tak in zang thei kei mah le hang, lungnuam lou kei ni. Kipaktakin i omna munchiat uah zang chiat in, Toupa kiang a kipahthugenna in zang manpha ni. Hichi bang a i tung ua buaina hong om te ziaka kipahna i muhding tampi hong om ding ahihziakin tu-le-te in thei kei mah lehang, maban ah i theih ding tampi hong om ding hi. Toupa’n ei adia hoih zaw a hon sehsak ahi dan i muh a i chep tampi hong om ding ahihziakin nuam in, kipahthu genin, thumni gige ni.
“….Pathian in a itte, aman a seh bang a a sapte adin, a hoihna ding un bangkim in a sepsak chiat chih i thei hi.” – Romte 8:28
Toupa’n saulou chik a i thugelhte i tanchiat ua ding in hon vualzawl sak henla, theihna bukim louh ziak a gen kim louh hiam, gelhkhelh omte a hon ngaihdamna i ngen a. I gen dik sun omte a sim khempeuh ading a thathak lakna, Toupa’ deihdan a kipiak semna ahong hihtheihna ding in a vualzawlna i ngen ahi.
Toupa’n hon ompihin hon vualzawl chiat hen! Amen.
- Thangginom Hangshing
(Laigelh toh kisai kupbeh nuam omleh, Laigelhtu +919615804759 ah thuzaak theih diing hi.) 23rd Decmber, 2020 | Weekly-Inspiration – 51)