Niteng Hinkhua A Pathian’ Thu Vaak Ki Salh Sak

0

“….Pathian zaw vak ahi a, amah ah mial a omkei hi. Mial a om napi in Amah ka kithuahpih chi lehang zuau i gen a, thutak i zuikei uhi. Himahleh amah vak a a om bang a ei leng vak a i omleh i kithuah chiat ua, huan a Tapa Jesu sisan in i khelhna tengteng a hon silsiangsak zel hi.” – 1 Johan 1:5-7

Ahi thei tan in zing ka thoh chiang in Bible ka sim sek hi. Ka table toh window ki zom ahih ziakin nisa vak (sun rays) in hon tanvak kha zel hi. Khat vei chiang in leivui (nin) tua nisa in a koh-khak na te ah nin chiang tak in ka mu thei zel a, nisa in a koh-khak louh chiang in huchi tel a nin ahih lam ka thei kei hi.

A khenchiang in parda peuh ki zak a, ni sa in hon tanvak di bang in insung ah ki lutsak lou kha zel hi. I niteng hunzatna uh leh I Khalam din mun uh tua bang in tehkhak na ka nei mawk hi. Khat veivei ei khomkhom in hoih leh dik iki sa a, thil bang hiam Pathian a muh thak ding le ngaihtuah khollou in i ngeingei in i ngei uhi. Huchi bang a i om khak chiang in thilhoih lou banghiam ana om sek hi zaw hi. Tua nisa vak in insung a hon tanvak a thil nin te aki muh bang in I hinkhua ah Pathian Thu i lungsim ah alut gige thei diam chih I ki dot na hi leh i deih luat ahi. Pathian thu i sim tam a i theih tam chiang in bang chi? Pathian mai ah tua I omdan maimai a ching lou i hih dan iki thei a, ki bawl hoih na di ki mu toutou hi. Eh! Huchi kana hi maw ki chih na di hun om a hiai in ki bawl hoihna leh I Khalam dinmun hon chom toutou hi.

Tulai in mahni khomkhom in buaina i hau thei mahmah uh a, tua te apoimoh lou ichi het kei hi. Himahleh hicia i buai khawmkhawm un I Khalam a hon tanvak tu ding amasa a poimoh ahi chih i phok thakthak uh deih huai hi. Mahni hoih kisak na leh hi kisak na in bang tan hon tunlou ding a, Pathian deihdan a om a, haksa mahleh nuam i na sak te tanngam na in i Tangtawn mun ding hon bawl sak hi zaw hi. Tua ding in i niteng hinkhua ah Pathian thu (nisa vak) lut sak gige thei ding in simtute Toupa’n hon vualzawl chiat hen.

“Na thu ka khe ading in khawnvak ahi a, ka lampi ading in vak ahi.” – Sam 119:105

– Thangginom Hangshing

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published. Required fields are marked *

Book Appointment