Ngaihhak Kasak Khenkhat

I tulel khovel dinmun ah, bangkim a baihsam pen, a kinthei pen leh a tom thei pen a hih vek i ut ta uh hi. Internet leh Social Media in i huai dinmun pen taw-sawn mahmah a, hiai tegel zanglou a hinkhua zat di bang taaksapna lianpi khat a ngaih theih di hial khop in i hinkhua uah i thupisak mahmah ta uh hi.
Social Media (adiak a facebook leh whatsapp) bang thuhoih-lahoih genna, suutkhawmna leh ngaihdaan hoih pipi sunkhawmna ding bang in phatuam tak, kin tak leh awlsamtak in kizang hi. Fake Account zang a banglouteng gente leh Account diktak zang a banglouteng gente chu atuam himhim koih zual le’ng.
Whatsapp ngial bang chu ki hah zat petmah in, Saptuam leh Khotang kivaipuakna leh thu kin leh poimoh ki zaksakna/ kizaaktuahna ding in leng i zang changkang mahmah uh hi.
Huchi ahih tak ziakin, Internet lingo(pau), expression leh emoji chihte bang leng azat dan kisin mai ngai ta hi. Aziak chu, I zatkhelh leh i gentup lehlam (opposite) khong genkhak daih in om hi. Internet ziak in I paudaan leh ngaihdaan genkhiak daan bang hong ki khek petmah ta a, shortcut/ abbreviation in i pau ziahziah ta uh hi.
‘Ok’ chihna di mun ah bang ‘k’ chouh khong a ki zat chiang in ka na ning sek hi. ”O’ type na dia haksatna bangchibang tuak tel uh ade aw?’ ka chi ut phial sek. A huchih louh chiah, buai-buai a birthday ki wish na dia ‘hbd’ / ‘HBD’ (capital letters chu azia omdeuh lai) mi facebook wall hiam whatsapp group hiam a va koih khia chih bang chu, hilou deuh bang kana sa thei mahmah hi. ‘Goodnight’ or ‘Good Morning’ lah GN or GM a kaihtom hita. Changkan na dan a ngai chu ihi di ua, changkan na di huaizah lak ah hiaite pentak a changkan louh zaw, poi di’n ka gingta hetkei ka chi!
Whatsapp committee (Example: saptuam committee) group khenkhat lah chu, Vai-sai ding hiam thu-kup ding hiam hong om chiang a, kumlou a khutpi-lik (👍) khong a ki dawn thuk chiang a bang chu nuam khollou. Hou a hou lah bang hilele hou hetlou. ‘Yes’ or ‘No’ bek chu thoh khethei sek le hoih di hia.
Social Media kha Pathian’ Thu leh La kupna leh puankhiakna ding in le vanzat manpha suak ta hi. Huchi lampang himhim ahong ki post chiang in, emoji tuamtuam:
👍🙏 , 😇 , 😍 , 👌🙌👏💪, chihte in i na dawng thuk sek uh hi. Huai daan in, ‘Amen’ a ngaih leh ‘Amen’ in i dawng sek hi. Huai kia hilou in, Pathian’ Nnasep thupi, lamdang leh kipahhuai thute leng tampi hong ki post zel zel hi. Huai hun chiang in ‘PTL’ chih dawnthukna ka na mu tam sim ta hi. Ka ngaihdan toh ana kituak kei sek hi. Whatapp group khat ah ‘PTL’ chih thumal ka muh masak pen in, ‘bang chihna a de aw?’ chi in ka na ngaihtuah a, huai laitak in midang khat in ‘praise the Lord’ chi in dawnthukna a hon koihkhiak beh leh, ‘Aw, PTL kha ‘Praise the Lord’ chihna ahi chih ka na man hi. A short cut a kizang tengteng poi sa lo khol kei mah leng, ‘PTL’ leh GBU’ chiah chu ngaihhak kasa a, poi leng kasa hi. ‘PTL’ sang a ‘Praise the Lord’ chih type huchi tel a haksa zo hikhollou di eive. ‘Text prediction’ om zomah lai. ‘Toupa Phat In Om Hen’ chin na di a ‘TPIOH’ va gelh di chih mawng mawng! ‘PHAT A OMPA’N a sang ut diam?’ chi ut phial ka hi.
[Sam 29:2 TOUPA kiang ah a min thupina pia unla; siangthou kilawmna silh in TOUPA chibai buk un.]
I Pathian Thupi leh Muanhuai, Itna, Hehpihna leh Zahngaihna a dim, Lei leh Van leh asung a om tengteng bawl’ Pa, Sihna akipat a hon hun khia a, Ama’ Kumpigam luah ding a hon sam Pa’ Nnasep pen nang le ana phawk sam nahi chih mite na theihsak ut leh ‘PTL’ sang in ‘Praise The Lord’ chih ana zang ta in aw?
Amah thupi lua ahihman in, A Nnasep i phawkna latsak nang in leng zahtattak in thumal leh laimalte zang ta ni. Kisikhuai hetlou ding hi. Haksa hetlou zomah lai maw?
I mihing hinpihte Nnasep hoih i phawkna mite muh di a i phoukhiak chiang in short/abbreviation in i hih ngei tel sam a! Nna manpha ikisepsak chiang un whatsapp tungtawn khong in TY (Thank You) chih chouh khong in kipahthu i ki gen ngei sam ua. ‘Hiai-huai na hih a na fel lua/non hihsak a ka kipaak lua’ chi bek ding in phone call i bawl sek vele maw a hon muhdaan uh asiat louh na di’n?
Pathian pen a ki khek ngeilou hi a, Thupi leh tungnung pen hi gige hi. En le Amah Thu toh kisai leh a Nnasepte i theihpihna i phoukhiak chiang in a short cut in hih nawn kei ni. Khris nungzui i hihna ua, i hihdite lak a haksa hetlou khat ahi chih thei ni.
[1 Korinte 10:31 Huchi’n, na nek uh hiam na dawn uh hiam, na hehpeuhmah uah leng, Pathian thupina ding ngen in hih un.] 
A tawpna di’n khat kon gen beh deh: Mi adia vualzawlna i sap chiang in GBU chi nawn lou in ‘God Bless You’ chita le maw? Pathian’ Vualzawlna sapsak ihihlam ki thei ni, Nna thupi/ kampau thupi tak sam ihihlam kithei in pilvang in zahtaat tak in hih ni.
Ahouchikchik te a kibawl i pat kei uleh, Athupite a kibawl haksa sa law kha tel di ihi.
‘Khemkhem’ i chih di hong tamluat chiang a, Pathian poi khoihkha di khelhnate le’ng ‘khemkhem’ chihsuk zel baihlam lua ahihman in, pilvan poimoh petmah hi.
Toupa’n Thilhoih hih sunzom zel ding in hon vualzawl chiat hen. 
– Chingngaihlian Tunglut


Leave a Reply

Your email address will not be published.

*
*
*

× Direct Appointment