“A saan dan leh amel hoihna lam ah en ken… ken lungtang ah ka en zaw ahi. I Samuel 16”
David leh Goliath tangthu a theilou om ding in I gingta kei. David Kumpipa dia teel ahihdan lungsim ahong om bangbang gen sawm i hi.
David kumpipa diing a teel ahih ma in, Toupa’n Saul kumpipa dingin tel hi. Saul Israelte Kumpipa ding a sawt a hong pantak in, Toupa sawl bangin a gamtang kei a, Israel mipite alauh man leh akihtaak man in Toupa sawl bangin pailou hi. Tua ziakin Toupa’n deih nolou in Kumpi dang teel dingin Samuel asawl hi.
Toupa sawl bangin Samuel in Bethlehem mikhat Jesse kiang ah va hoh ding leh atapa te lak akhat kumpipa dia teel dingin sawl hi. Jesse in tapa giat nei a, David a naupang pen ahi. Samuel atungtak in Kithoihna laan ding a hong ka hi chi pah in, Jesse leh atapa te kihahsiang a tua kithoihna mun a pai ding in gen pah hi. Tua hunlai takin Jesse tapa neupen David bel, ganching a mundang a om ahi.
Kithoihna diing mun atun tak un, Samuel in Jesse tapa te lak a khat Eliab amuh tak in, alungsim in, ‘Hiai pen Toupa miteel ahi tham ding’ chi hi. c6. Tua mipa amel et in hoih mahmah leh adin zong saan mahmah hiding a, Kumpi dia mel et a ching mahmah hiding in ka ngaihtuah hi. Himahleh Toupa’n deihlou hi.
“…Toupa’n akiang ah, ‘A saan dan leh amel hoihna lam kia ah en ken; Ken amah deihlou ka hi. Ken mihing etdan in ka en kei a, lungtang ah ka enzaw ahi’, achi hi” c7.
Tua bang a Toupa’n Samuel ahilh zoh in, Jesse kiang ah atapa dangte khatkhat a honpi ding in ngen hi. Himahleh atapa sagih teng a hon tonpih tan in Toupa’n hiaite kua mah ateel kei, Tapa dang nanei lai hia? chi in adong hi. Jesse in, “He naupang neupen a omlai a, mundang ah ganching in a om chi’n adawng hi. Samuel in sam ding in a sawl hi. David bel tangvaal chidam, melhoihtak leh mit hah kilawm mahmah ahi. Amah hongtung takin Toupa’n Samuel kiang ah, “Hiai ka miteel pa ahi, sathau nilh in!” c12. achi a, huai hun akipan in Toupa kha in David a om pihpah hi.
Hiai a I zil theih diing te:
# Eite’n leng bang hiam, I teel nading te a, Toupa I dot masak gige ding ahi.
# Tulai’n pasal-leh-nungak / zi-leh-pasal ding eimah deihteel na in I na zong sek ua, tua ding hi zaw lou in, Toupa kiang ngen a; Amah I teel sakding ahi.
# I laisim na ah hi ta leh I nna sep tuamtuam ah lohchingna ngah zel mah lehang, Toupa’n ei adia hon teel sak ahidiam? chi a Toupa mah I dot a, Amah I teel sak ding ahi.
Thil bangkim Toupa khut a nga in, I hihpeuh eimah thupi nadiing hilou in Toupa Min thupi na ahih zawk theih nading in ‘Hih in Sem ni’.
Kakipak!