MIMAL’ BUAINA TUNTU MIMAL’ TAKSAPNA AHI

Laisiangthou a i muh kia hilou in, telsuimite leh mimal’ hinkhua a, i tuahsate ua kipat thudik i muhtheih khat ahihleh, mihingte’n Eden’ Kiaksiatna (The Fall) ziakin Dangtaakna lianpi leh Gilkialna thuuktak i neita uhi (Sam 42:1; Mathai 5:6, Isai 55:1-2). Puuksesa khovel ah Setan in pan nasatak a la ahihman in taaksapna, giau-tauna, zawngkhaalna leh gentheihna chiteng in mihingte a hon bawm zel zel hi (Johan 10:10 ; Ephesate 6:12; 1 Peter 5:8).

Mimal a I taaksap tampi om mah leh, a zualpi thum (3) in Dr. Larry Crabb in khen hi. Huaite ahihleh:
1) Significance (poimohna): Poimohna nei hi a i kitheihna pen lungsim damna diing a poimoh petmah khat ahi.

Mi’n (innkuante, lawmte, khotaang leh saptuam) hon poimoh uh ahihlam i kitheihtel leh i lungsim nuam petmah a, niteng hinkhua a i hih dingte leng ki hih thei zel hi. Mi’n a hon poimoh louh hun uh ahong om chiang a, i lungsim pai buai thei ahih ziakin, poimoh i hi chih iki theihtelna pen mihing ah hizawlou in Pathian ah ngak kuul hi. A huchih leh Pathian ah hehnepna kimu a, tawldamna leng kimu thei zel hi.
Pathian in ei hon poimoh chihna hizawlou in, hon koih poimoh lua ahi chih i ki theihtel leh mi’n hon nawlkhiin chiang un leng, i ngaihtuahna buai sawtlou mai hi.

“Mi kuapeuh in belam za nei hen la, a lak ua khat vak mang taleh, sawmkua-le-kuate tuh nusia in, tang a pai in, a mang peen a zong kei dia hia?” – Matthai 18:12 

2) Security (bitna): Mihingte iitna in hon zou mahmah hi. Ahuchihziaktak in leng, iit a om i hihlam i kitheih poimoh petmah hi. Huai i kitheihna in bitna (lungmuanna) hon pia hi. Hiai bit kisakna hon petu iitna pen i mihing hinpihte akipat i lamet chiang in ki buai zel hi. Mi’n hon iit nawnlouh chiang un, i lungtang kikham pah in, ki-ngaihsiatna hon tun pahpah hi. A tawntung a hon iit den, Pathian, iit a om i hihlam i kitheihtelna bulpi (source) ahih chiang in, mihingte deihlouh/iitlouh a i om hun chiang in leng Toupa’ iitna ah ki bit a, ki buaise lou hi.
Romte 5:7 ah hichi’n achi hi, “Mi dik sik a sih, mi a ut ngel kei hial ding ua, mi hoih sik in bel mi kua hiam beek in sih a ngaap khamoh kei ding.” A baan a chaang 8na ah, “Himahleh, Pathian in A hon iitna a langsakta mikhialte i hih lai a Khrist i sik a a sihna ah.” achi hi.
Mihing a kipat iitna i muh in phaak-chiam nei a, hunchiang nei hi. Toupa a kipat iitna i muh pen zaw bukim in, tawntung hi. Khamuanhuai law tel aka maw! “Toupa ka kipaak” chih chih di himai hi. Huaiziak a, iit a om ihihlam i kitheihtelna dia mihing dangte a ki-nga lou a Pathian ah i ki-ngak leh, i lungtang ki-kham sek mah leh, ahunhun in damna kingah pah thei zel ana hi ahi.

3) Self-worth (manphatna): Mihingte’ tehdan a, ‘manpha’ i chih chiang in, mi ah muhtheih thil deihhuai a om ziak hiam, ahihke’h thil hihtheihna hiam, siamna hiam a om ziak hi sek hi. Pathian in bel, i siamna hiam, i hoihna ziak hiam hizawlou in Ama’ siamsa i hih ziak in manpha hon sa gige hi. Sam 139:1-18 a i muh mah bang in, bangmah i hih nailouh lai a, mihing bukim i suahma a kipat a leng hon na ngaihtuah nget-nget a, lauhuaipi leh lamdangtak a hon na bawl a, i damsung nite diing natawm hon na ngaihtuahsak khin a, bangchiklai peuh a khotuah tak leh iittak a hon etkol dingdan ana geel khin hitel hi. Thupi lua! Eilam ah khat lel leng manphatna i neihlouh lai in leng, Toupa’n manpha tak a hon na koih khin hi. Khros ah, ei sih taang a si ngaap hial ding khop in manpha honna sa hitel hi. Mite’n manpha hon sakdan ua ki-nga zawlou a, Amah hon koih manphatdan ah ki-nga hizaw leng, ki-ngaihtuah buai lou deuh ding ihi uhi.

Hiai i mimal Sa, Lungsim leh Kha a taaksapna; Significance (poimohna), Security (bitna) leh Self-worth (manphatna) pen eite’n i siamdan leh theihdan a suk buchinsawm in i pum buai sek uhi. Hiai thil thumte ahihleh, I mimal hinkhua hoihtak a, apai ding bang a apai theihna ding a poimoh mahmah ahi uhi. Niteng hinkhua a, i buaipihte i buaipih ziak uh leng hiai thil thumte i suk buchin sawm ziak uh ana hi lel hi. Suk buchin a a om vek leh, mimal’ pumpi dam leh navaak tak a om hiau-hiau dingdan ana ki hi. A kisukbuchin tam leh tawm dungzui kia hilou in, Pathian ah i suk buchin leh buchin louhdan dungzui in, i lungsimlam leh khalam dinmun diing kigeel kha mahmah hi.
Pathian kia in hiai i taaksap thil thumte subuching thei hinapi in, Amah ah zong ta lou in mihing dangte, neih leh lam, Khovel’ noptaalna, khovel’ kipahna leh hon hiipthei thil hoihlou tampite ah i zongta uhi. Ahia lah, kipahna bukim leh lungkimna pumluum chihte i mu zou tuan kei uhi.
I huchih sawt luat chiang in, ki-diktatsakna, mahni hoih kisakna, ki-sianthousakna, tatleekna, huaihamna, hai-na leh gitlouhna chituamtuam te’n hon bawm sek in, i kampau leh gamtat ah seel vuallouh in leng hong ki-laangkhe naak hi.
A huchih chih chiang in, I lungtangte uh taak gawp hi. Kisiik a, Pathian kiang a kiik diing bang haksa kisa deuhdeuha, ut leng ki utlou zomah thei lai hi.

khalam a keu mahmah in, khantouhna taktak neilou Biakinn-kai-taima Khristian bang, Laisiangthou-thei-lah-hin-pih-lou Khristian bang i tam kholoh uhi.
Huaiteng kia hilou in aguuktak a lungsimlam a buaina leh zawngkhaalna nei bang kitam mahmah dia gingtak diing ziak ka nei hi. Paam-paih kisakna, chimoh kisakna, beidotna, lungziinna , thawmhauna, kipahna ding theih zohlouhna, lungluutlouhna, kithalawp zohlouhna leh khavaatnate toh hinkhua ana zangzang bang leng kitam mahmah kha diing in ka gingta hi.

I theih dia poimoh nawn khat ahihleh, khalam dinmun a diklou a om chiang in lungsim buaina leh gimna nasatak hon tun zel hi. Kha-lam buaina tuntu lah sa-pum leh lungsim a hong kipan ahi naak a. Huchi ahihman in, Khalam buaina hih felna di’n lungsim leh sa-pum buainate hihfel masak apoimoh hun tam mahmah hi. Hiai mimal a taaksapna i neihte buching lou atam luat chiang in lungsim leh kha tokbuai a, huai in taksapum natawm ah zawngkhaalna leh damtheihlouhna hon tun thei mawk hi.

Huaiziakin, ki suut zek ni. I deihteelna, Pathian in thilhihtheihna dia A hon piak pen natawm zangthei nawn lou di zen a Setan thaang a awk i hikha thei hi. Huchi i hihleh, I hihtheih khat a om a, huai chu, i deihteelna pen ahi di bangtak a zat theihna ding a pan lak thak, ahi.
Bangchi’n pan i la dia i chih leh, i lungsim pen Pathianthu a nouh diing in ki sing-sa thak ni. Amah eive i ngaih uh; Thil dangdang va baan zeel-zuul na hang a, Amah a dangtaak leh gilkial ana kihi lel ahi. Amah chauh in huai i lungsung kawtawng leh Khalam a ahawm leh thawmhau (empty) pen hudim thei a, I mimal taaksapna leng Amah chauh in hih buching thei hi.
Huai i deihteelna mah zang in, peih leh peih lou in (thuumna a theihsiamna ngen kawm zel in) Bible sim kipan nawn ta ni. Aziak ahihleh, hichibang thuumnate dawng diing in i Pathian kithalawp peetmah hi. Thuumna neihte bang kisin thak in, biakna kikhop khong bang ngai poimoh thak ni. Mimal buaina i neih leh, ei kia a sikhop lou in, Pathian in a mi zatte va zot a va houlimpih diing poi sa kei ni. Amah a zon in zong in, nget in ngen in, A kong kiuh in kiuh leng ki mu diing ahi, chih hon chiamtu, zuau ngeilou leh zahngaihna a dim Toupa Jesu Khrist ahih ziak in (Matthai 7:7-11).

Khelhna ziak a i na mangngilh khaak, Amah toh i na kizopkhaakna pen hih hingthak a ahong om nawn theihna ding in, Amah mah zuan ding in i kihanthawn hi. Ama kiang a dawnna leh i taaksap tengteng om a, huaite hon pe ding in Amah mansa in om a, hon na ngak gige ahi chih mangngilh kei ni.

Kingaihtuah thak a, a poimoh bangbang a pan la thak diing in i Toupa Pathian in, i Hondampa Jesu Khris min in, hatna hon pia hen.

(P. S : Ei kia a i zonmuh zoh keileh, hon panpihtu diing Pastorte ban ah Trained Counselorte leng zot theih ahihlam i kitheisak thakthak hi. Panpihna zon/nget poi sa hetkei ni maw!)

 

– Chingngaihlian Tunglut

November 02, 2019/ Article No. 07

(Laigelh toh kisai kupbeh nuam a om leh, Laigelhtu +919892316430 ah thuzaak theih diing hi)

Leave a Reply

× Direct Appointment