MIDIK SISAN

I kampau atuam dungzui in, i awsuak leh laimal tuam hi. Laimal kibang na pi’n omna atuam dungzui in laigelhdan leh awphawi tuam leuleu zel hi. Hiai tungtang gensau i sawmkei, gensau ding hilehangle i gensau theikei ding. I gen utchiang lualeh i chihziak ahizaw, Laisiangthou a mangkang te’n ‘innocent blood’ chi a ana gelh uh, ei Paite laimal zangte’n ‘poikhoihlou sisan’ ahihk’eh ‘midik sisan’ chi’n i letkhia ua, Bible Society of India nuai a i sutna uah, poikhoihlou sisan kizang tamzaw a, midik sisan chih mun thum chauh ah kimu hi. Tua i gen utpen midik sisan ahi.

Midik Sisan chi’a kigenna mun thumte ahihleh:
Thukhunlui ah:
1. Judah Kumpipa Jehoiakim sihna.
Thukhunthak ah:
2. Juda Iskariot in Jesu a zuak na man siampu liante leh upate va piakkikna mun, leh
3. Pilat in siampu liante leh upate mai a, mi dik sisan a kipan ka siang chi’n a khut silna..
(2 Kumpipate 24:4 , Matthai 27:5, 24).

Khatna ah, Judah Kumpipa Jehoiakim in a pi leh pute hihdan bang in Judahte thil a hih khelhsak, khelhna a simlou in leh poi khoihlou sisan nakpitak in a suahlai hi. A pu’ Manasseh in huaibang khelhnate ana hihsam mahleh, kisik in Toupa a Pathian a zong a, Pathian ma ah nakpitak in a kiniamkhiak ziak in, Toupa’n a thuumna ngaih khiaksak hi. Jehoiakim in kisikna hun lemtang nei mahleh, a kisik nuamlouh ziak in ngaihdam ahikei hi.
(2 Kumpipate 21:16, 23:37, 2 Kronikil 33:12‭-‬13).

Nihna ah, Khristian kichi peuhmah Juda Iskariot gamtatdan theilou i omkei ding. Jesu Khrist khovel a hong pailai in a nungzui sawmlehnih lak a khat, kisikna tellou Khrist nungzui pa ahi. Angmasial, duh-am leh kisatheitak ahi. Mary Magdalene in Jesu Khrist khe thaunamtui mantam tak nuh a, asam a anul lai in; (amah nekguk theihdia) thaunamtui zuak a genthei te kiang a pedia gen pa leh siampu liante kiang Jesu Khrist dangka sawmthum a zuakpa ahi. Kisiknuam hileh zaw kisikna ding hun lemtang kum thum val Jesu Khrist toh nungta khawm den- a thilhih theihna leh a thugente bil a zatupa zaw hi ve’n.
(Johan 12:1-6 , Matthai 26:15).

Atawpna pen in, Pilat in Jesu Khrist nunnemna , zaidam na mu in, a diklouhna zong mahleh khatle’ng a mukei hi. Jesu Khrist khros a kilhden ding a vai ahawm ma zan in a zi tungtawn in theihsakna kipialai hi. Himahleh Pilat in a thuneihna leh dinmun a itzawk ziak in Jesu Khrist mipi mai a gum ngamlou in, mipi deihtelna a zuizaw hi. Jesu Khrist sang a a dinmun a itzawk ziak in, Pathian in a ngaidam kei a, amah leh amah kithat in Tiber lui ah aluang pai in a om maimah hi…
(Matthai 27:19‭, ‬23 , Luka 23:22 , Johan 19:12)

Nang midik (Jesu Khrist) sisan bang na loh a? Juda Kumpipa Jehoiakim banga khelhna hih poisalou, khelhna a nungta den, kisikna tellou hinkhua zang na hi maimah hia? Ahihkeileh Juda Iskariot banga, neu a kipan A’ hotdamna thu, a thilhih theihna leh a thupina zil den, himahleh Hondampa dia sanglou a, mahni metna ding, dinmun deihna leh punna ding tanlel a Khrist nungzui na hi kha hia? Jesu Isakariot in kum thum val zek eive hun a neih, nang tu’n kum bangzah na hita a? Juda Iskariot sangmah aleng kisikna hun lemtang sau neizawte i hi kei maw! Ahihkeileh, Pilat banga – A’ hotdamna, diktatna leh sianthouna mu leh thei na pi – dinmun leh hihna deih ziaklel a hondampa dia sangnuamlou, mipi mai etna lel a aminpu lel a amin loulou i hikha hia? A hon tatna ngainep i hihkhak ding pilvanhuai!

Kingaihtuah thak ni, Thukhunlui leh Thukhunthak hun aom ; Jehoiakim , Juda Iskariot leh Pilat te’n midik sisan ana suah, zuak leh guplouh ziak un ngaihdam ahikei uh. Eite’n leng midik sisan ngeingaihlou a kisikna tellou hinkhua zang a, i zuak a i gup ngam ke’n zaw ngaihdam i hituankei hial ding!

‍I khelhnate thupha i tawi leh, i khelhnate ngaidam ding leh i diktatlouhna tengteng silsiang ding in amah a muanhuai in a diktat hi.
– 1 Johan 1:9

  • Liansang Khuptong – (21/11/2020)


Leave a Reply

Your email address will not be published.

*
*
*

× Direct Appointment