MIDANGTE TUNG A ITNA LAHDAN

Ei singtang mite’n “itna” i chih chiang in numei-pasal kal a itna pen vuak ilungsim ua om a bang hi. Itna i genchiang in a uap khak za’ lua hi, i na ngaihtuah khollouh atam ban ah, itna tuh Pathian apan ahi hi. Etsakna in, midang khat hehpihna toh nava panpih a, nava khotuah te khong nang a itna na neih ziak ahi hi. Itna in a uap khak teng genseng lou ding ihih ziakin igen kei ding a himahleh itna i hauh leh Pathian itna i muh semsem dan sau lou a et sawm ihi.

Midangte’ mai a itna va lah haksa nasak hun a om ngei sam hia? I theih mahmah te nangawn leng khatveivei i itna i va lah ding haksa ka sak hun om hi. A langkhat ah, Itna i hauh louh chiang in ning kitel abaih lam a, heh thut na bang leh thil theihsiam haksa sak na atam hi. Khopi mun tuamtuam a om atam zaw in i tuak kha ta di ua, office kai hiam hoh na di nei ki noh sim, Traffic khong a i tangchiang in ning a kitel ban ah, ei-le-ei bang ki sukheh a baih lam mahmah hi. A hih kei leh sepna khong a seppihte’ va houpih masak, va lawm bawl masak chih te khong le thil haksa isak mahmah khat uh hidi ding hi. Tulai hun in Social Media te en leng, midang toh iki hou na ah, mi tampi apawl a iki kupkhawm na uah bangbang thugelh i nei a? I thugelh te itna thuhoih kammal ahi hia? Pathian deihdan ahi diam chih ngaihtuah ding leng atam hi. Ki sel na, midang toh ki thutuak louhna, mahni kia’ ngaihdan genna leh midang toh ki muh dahna in i na zang hia chih ki dottuak mahmah hi.

Midangte’ itna tuh Jesu nung i zuihna ahi chih i phok thakthak ding un a deih huai hi. Bangziak a haksa sa i diam? chih iki dotna nawn hileh ichi hi. Thupiak Thupipen: Pharisaite’ te lak a Dan sinsakmi khat in Jesu ze-etna ding a dotna abawl sim leng, Jesu’n bang chi in adawng a…

“Sinsakpa, dan ah bang thupiak pen ahia thupipen? a chi hi. Aman a kiang ah, “Toupa na Pathian tuh na lungtang tengteng in, na kha tengteng in, na lungsim tengteng in na it ding ahi, chih. Huai thupiak thupipen leh poimawh pen ahi.

Huan a zom in, a kibatpih hiai ahi, ‘Nangmah na ki-it bang in na inveng leng na it ding ahi chih” – Matthai 22:36-39

Hiai a I Hondampa Jesu’ dawngna ngaihtuah thak di, bang na mu? Dan ah bang thupiak pen ahia thupipen? Dotna khat a dawng ding bang maw?…. himahleh Jesu’ dawngna sim thak di… thuvual nih in a dawngna piak hi. Tua te lak a khat tuh “Itna” a hi. “… nangmah na ki-it bang in na inveng leng na it ding ahi chih”
Mi atam zaw te’n Pathian itna neih zaw haksa kisa lou hi maw, himahleh midangte it ding haksa isa thei lua ua hiven maw! Ka theih thakthak ahihleh midangte’ tung a i it na i lah semsem leh, Pathian i itna lian semsem a, a pung semsem hi. Sappau a i na gen sek uh, “While we teach, we learn” chih mah bang in, itna midang tung a i lah chiang in ei a itna khang deuhdeuh hi. Tua ahihziakin, hiai in Pathian hon itna hon muchiang sak semsem a, Amah toh ikikal a ki itna leng a pung semsem hi.

Kei hi’ in midang hileh atamzaw te i buaina uh tuh, midang tung a thunuam lou, thubuai hiam, ki lemlouh na leh i muh dan atuam ziak a itna va lah ding haksa kisa hi. Huchi bang hunte ah siam kitanlouhna i lungsim ua nei chiat ding in ka gingta hi, a hoihlou deihlou ki om ahihziakin a tak a lemna thu va gen pen haksa ki sa hi. I ki lem hun in leng atak a itna va lah masak ding haksa i sa mahmah lai uhi. Himahleh hiaite chu Thumna a Pathian panpihna ngetna toh ki zou thei gige ahi chih i phok thakthak uh ka deih hi. Itna pen atak a mitmuh in lak leng midang lungsim sukha ding a, lungtang khauh i sak mahmah te toh leng itna a kilem a nuamtak in akhosak theih hi. Ei hi zawlou a, midang in ei a itna a neih louh uh ahih leleng amau tung a itna i lah ding ahi. Midang te’ adia etton ihih a, amau te lampi dik a pi thei ihihdan i thei thakthak ding uh.

“..Hon enzuite hi un, keileng Khrist enzuipa ka hih mah bang in.” – 1 Korinthnte 11:1

Paul in Korin saptuamte’ a hanthawn bang in, Khris omdan ka zuih bang in, nou leng kei omdan zuite hi un chi a i om ding ahi. I omdan, i gamtat dante midangte a dia lampi salvak tu, hinna tungtu ahih ding ei gingtu te ading a poimoh mahmah hi. Ei vuak hilou a midang tampi in hiai bang ana thuak mualsuah uh ahi chih leng i phok uh ahoih hi.

Khatveivei milak a gingtu i hihna a ki Kha mi’ sak lua chih khong in demna i tuak kha thei a, midangte toh omkhom theihlouhna bang, ki polh theih louh na hon tut hun om thei hi. Thugen dang khat nana za kha ta diam ah, i gingtu hih pihte toh, Pathian deihdan a iki tuah pihte toh vuak i om khop leh nuam ahi chih thugen om hi. Dik mah e maw! Hilele tua bang mite vuak toh i om in midangte bang chi in Pathian kiang i tungpih thei dia? Tua ahihziakin Pathian thei nailou te kiang hi ta leh, gingtu hi in, gingtu ana hi sa a, ana nungtolh te i khotuah a itna toh i ompih ding i mohpuak ahi hi. I Hondampa Jesu leng hiai bang in ana chi hial uhi, “….Mihing Tapa a hongpai a, a ne in a dawn a, En dih uh, anhaipa, uain haipa, siahkhawnmite leh mikhialte lawm: na chi zel uhi.” – Luke 7:34

I mihing pihte mai a Itna lah ding haksa isak hun om tham ding hi, himahleh I Hondampa nungzui ihih dan i phok a, kipaktak a tua te i sep ding ahi hi. Midangte i itna va lah a, tua te tungtawn a Pathian hotdamna huangsung a pi lut ding thil haksa hi thei hi, tua bang ahih lai in amau toh hunzat khawm, ki polh lim chih te in i hunte zat theih masa hi. Singpi dawn khawm, annekhawm, games enkhawm leh thil dangdang ah i hih theih aom ding, hiai bang hunte tuh itna i lah thei na ahi hi. Ei ah sinding hon mu ding ua, i kiang a om anopdan hon gen ding ua, akipahdan uh leh gingtu i hih dan hon theithei ding uhi. Tua tungtawn in Pathian thu toh ei vuak hilou in amau hinna i khek thei hi. Midangte adia vualzawlna tungtu, lampi dik a pi thei tu leh panpih thei tu ihih dan ki phok thakthak ni maw.

Toupa’n i thugelh te tungtawn in theihsiamna hon pia in hon vualzawl chiat hen. 
Amen.

– Thangginom Hangshing / +91-9615804759

– 10/06/2020/weekly-inspiration/23



Leave a Reply

Your email address will not be published.

*
*
*

× Direct Appointment