Mi Muhdah Tawpsan Dingdan

Eklijiasti 3:8
It hun leh muhdah hun; kidou hun leh kilep hun.

Mi muhdah neih gim-huai dan kithei kha vek sim leh kilawm hi. Mi muhdahna pen Setan in Pathian toh i kizopna a sukbuaina dia a vanzatte lak a khat ahi chih i theih poimoh hi.

Mi omdan leh a deihteelna uh a zat dan un hon hihnat hun bang om kha sek hi. Akhenchiang in, atup uh leng hikhollou thei hi. A tup mawng ua hon engbawl uh ana hihtaak leh leng, va gen theih bangmah i nei ngel kei hi. Va kinakpih/kisualpih ding i hihkei ngal leh, hihtheihluat kinei lou hi. Va huchih hial a aphatuam ding khat leng omlou ahihziak in, chiinchi hetlou zel hi.
Abang hitaleh, liam-le-na a om i hih ziakin, huchibang a hon omsaktute i mudah ek pah hi.

Mi’n hon hih-nat himhim chiang un, hon hihna ahihlam uh kithei le uh chih ki deih hi. Huai thei uh henla, amaulam a kisuanlahna/kisiamlouhtanna hong tung henla, hihkhial ahihlam uh i theih di’n hong hihlang le uh chih ki ut hi. A hong huchihlouh chiang in, amau leng ei thuak bangin thuak hile uh chih kideih a, phuba laak dingdan ki ngaihtuah kha pahpah hi (phuba chih zen di utkei sek mah le’ng le). Huaiziakin, huatna leh hehna in ki thukkik pah taangpi sek hi. Suknat a om ihihlam, hon hihnatute tung ah, huaidan bek a, i latsak theihlouh chiang diakdiak in bang, Pathian in phuba hon lak sak leh chih i deih tuntun zomah lai hi.

Mi’n hon hihnat chiang ua, i omdan (reaction) pen, khawphawk tak a, tum tentun a i latsak ana hikhollou hi. A na ihihlam hon thei le uh chih i ut ziak hizo a, damna ding i zonpah ziak leng hilai hi. Huaiziak a, hihnat a i omchiang a, Pathian kiang a tai pahpah poimoh peetmah hi. Phuba lak ut ki hizo lou a, dam ut kihi zo ahih ziak ahi. Damna hon pethei Pa kiang ah tai in, Amah kiang ah kipe khe le’ng, Aman damna leh muanna hon pe ding hi, i ut nakleh (Philippite 4:7). Ahuchih kei leh, phuba la ut a, khaatna a dim ihihlam leng kithei hetlou a omom khak lauhhuai hi.

Thil haihuai pi, ihih khelh sek uh khat ahih leh, I Pathian hing leh siangthou pen, ei mihing niinte thangpaihna pansan a, mi tung a ahoihlou tungsak ding peuh a sepsak i sawm khak naak pen uh ahi hi.
I hichihna pen uh, thildang bangmah hilou a, chapouna (pride) ana hi a, Pathian thangpaihna i khoihkhakna uh leng ana hi daih hi.

Mihing lungsim paidaan khat ahihleh, mi omdan hoihlou leh hon engbawlnate uh limsaklou in om hita le’ng, vuallel honsa law kha ding uh, chih hi inchin, huaiziak a, i hehna hiam, i omdaan hiam bek a atheih ding ua kilangsak sek hive hang maw?
I suanlam tuamtuam om mahleh, kiniamkhiak di utlou ana kihi lim hi. Mihing mai a kiniamkhiak ding i utlouh ziak ua, Pathian mai a kiniamkhiak utlou kisuak hi. Huaidaan in, Pathian mai a kiniamkhiak ding hita le’ng, i huatte ngaihdamna dia amau mai a thunuailutna dia kiniamkhiak di chihna ahihziak in ki utlou zel hi. Thunuailuut ziak a vuallel i na hihtaak lehleng, poisaklouh i kisin kuul hi. I Toupa Jesu in Matthai 5:5 a A gen bang a, thunuailutte mi hampha himai uhi; lei gou luah ding ahih ziak un.

Huchi ahihleh, bangziak a huai huatna, ei a dia leng gimhuai leh hoih hetlou hina zen pi a paihkhe utlou ihi ding uh?
Lauh khat kinei ahihziak hi’n ka thei hi. Mi’n ei tung a akhelhman uh luak lou a aom khak ding uh kilau hi. Pathian ahoihdaan kithei a, Ama’n amaute gawtlouh a akoih khak ding kilau inchin, a khelhman uh a muh teitei na ding ua; a musaktu ding a mohpuakna ei-leh-ei kigot ana ki hi dan hi.
Ei tung a zahngai dia Pathian i deih tukin mi tung a A zahngaihna asuah ding kilau hitel zel hi. I gitlouh khiak daan uh.
Pathian in huchidaan a Nna sem himai zen leh, a hing leh dam ding kuamah kiom nawnlou ding hi.

Hichi’n ngaihtuah le’ng deihhuai kasa ahi. I Pathian Amah a kivaipuakthei (Sovereign) Pathian ahia, ei mihingte hon poimoh lou hi (hon it a chih thu hiven). Ama’n mi a gawt utte a gawt dia, a utkei leh a gawtkei dia. Ei hon gawt lou ahihna ah lungawi kisin leng ki navaak tuan mahmah ding hi. Mi a gawt ding deih a i buai sung teng, Amah toh i kizopna buai gige ding ahi chih chiamteh le’ng poi hetlou ding hi.

Pathian pen ei deihdaan a Nasem ding a i sawl vual uh hilou ahi chih leng i lungtang a vom le’ng gah manpha tak suang di’n a gintat huai hi. Amah zahtathuai, lauhuai, siangthou, bangkim siamtu, bangkim tung a thuneitu leh buching pumluum Pathian ahi a, ei utdan a gamtang sak zou ding ki hi lou hi chih pom le’ng, i ngaihtuahna leng ahoihlam leh Ama’ deihlam a kikhek theita di’n lam-et huai hi. I chapouna ziak un, Pathian’ thangpaihna kisukha mun thei mahmah di’n a gingtathuai a, hileh leng, zahngaihna hau Pathian ahih ziak in, a suakta kihi lel hi. Mihingte ki otsakdan chu, Pathian bang ei utdandan a gamtat sak sawm kihi tel eive.

Mihing kihi ven, mi huatna chih khong hong omzel thei mah hi mawle? Hilele huai pen suanlam a nei a, i hihkhelh kithei gegu a, i hih ding hoih i theih pen ihih tuan kei leh, Pathian mai a khial kihi chih i Laisiangthou in gen hi (Jakob 4:17). Huai ban ah, Hebrute 10:26 in hichi’n gen hi, “Thutak theihna kim i tan nung a thil i hihkhelh teitei ngal in zaw, khelhnate a dia kithoihna a om tak hetlouh ziak in” chi hi. Hiai in agen ahih leh, A tawpkhawk suah a Pathian in, i suahtatna ding a Jesu Khris a hon piak pen in hon suaktasak zoulou ahih leh, i suahtat na’ng thil dang om nawnlou chihna himai hi. Jesu Khris’ hotdamna manpha petmah ki siikdeen chihna himai hi.
Chizau huai kasa.

I lungtang khauhsak nawn kei ni, a kikhel thei ahih chih ngaihtuah thak ni. “Ka omdaan diklou ahi” chih ngam a, mi muhdah tawpsan hun tunsak poimoh ta hi.
Pathian mai a kiniamkhiak a, A Thu zuih ding pen ihih ding him ahi chih ei-le-ei kitheisak thak ni. Pathian’ thu mang leng, lungmuangtak in Ama’ kepbitna sung ah ki omta ding a, Ama’n A Nna asep dingdan ki hai-buaipih nawnlou ding hi.

Mi huatna a kiven dingdan dang khat ahih leh, mi omdaan pen poi kisaklouh sak theih a na hi, chih eive. Poi salou ding in ei-le-ei kihilh ni, mualsuah theih thil ahih ziak in. Kisin zek leh kingeinaseh sak zek leng ana ngai mah hiveh aw. Haksa mah leng hi, hilehleng, Pathian toh thilteng hithei chih Laisiangthou ah kimu hiven mo? (Matthai 19:26)

Hiaiteng a na ki-min khit naikei leh, atawpna di’n khat kon gen beh lai ding: Jesu Khris’ Sisan a tatsa na hihlam kithei a, A nungzuihna pi-bawl a, A thuman ngai poimoh na hihleh, Toupa’n na tung a khialte tung a phuba laak hon chiam ahi chih thei in (Romte 12:19). Huai kawm kawm in, ei tung a simsenlouh zahngaihna A hon butkhiakte ngaihtuah thak leng uthuai kasa hi. Amah a kipat a, A itna tungtawn a i muhte; hehpihna, zahngaihna leh ngaihdamnate i piaksawn ding a hon lam-en ahihlam leng chiamteh ni. Hiai i piaksawn dingte, Amah a kipat a i muhte toh teh leng, neu law mahmah ahi chih chiamteh lai ni maw? (Luke 6:36 ; John 13:35 ; Ephesate 4:32).

Anuai a kon taaklat, Laisiangthou mun khenkhatte leng suut thak chiat nawn leng manpha petmah ding hi. I suut tan ah beisak mailou a, apoimoh dan a leng zang ding in ki singsa thak ni.

Matthai 5:38-41
[38] Mit sik in mit, ha sik in ha a kichi chih na zata uh.
[39]Ke’n zaw k’on hilh ahi. Mi gilou nang kei un; na biang taklam bengte tuh, a leh lam leng doh zaw un.
[40]Huan kuapeuh in na lak ah thusia bawl in, na puanak lak a tup leh, na puanza leng lasak ngal in.
[41]Huan mel khat pai dia hon phut teitei kiang ah mel nih paisak in.

Luke 6:27-28
[27]Himahleh, nou ka thu zate aw, ka hon hilh ahi: Na melmate uh iit unla, hon hote tung ah thil hoih hih un,
[28] Nou hon hamsiatte vualzawl unla, hon engbawlte thumsak un.

Toupa Pathian in apoimoh dandan a pan lathak a, mi muhdahnate koihkhe ngam a, i tunga khialte leh hon hih-nate ngaidam thei ding in, Jesu Khris mi’n in, i mimal chiat ah, hong sem hen aw. Amen.

– Chingngaihlian Tunglut



Leave a Reply

Your email address will not be published.

*
*
*

× Direct Appointment