LUNGZINNA LEH HAKSATNATE TUNGTAWN A KIPAHTHU GENTHEIHNA

I niteng hunzatna uah kipah gige sawmsawm mahlehang, hon buaisak thei ding, lungzinna, dahna leh haksatnate banglam hiamhiam ah ahong om sek hi. Hiaite thuuktak a ngaihtuah a lungkham tak a om gige hikei mahlehang, bang tan hiam ah lungnoplouhna ding, bit kisaklouhna khatveivei hong om thei hi. Tua bang hunte’ in Pathian in hon taisan adiam? Ahihkeileh i khelhnate ziak a hon sawina adiam? chi’n ngaihsutna a om thei hi. Himahleh hiai bang hunte zaw Toupa kiang a i kikna hun uh ahi a, tuate i hon theihsiam chiang in kipahthu i gentheihna hun uh hong hizawta hi.

Sam laibu ah hiai bang dotna i muthei hi. “Valnou in, bangchi’n ahia a omdan a hih siangthou ding? Na thu bangzel a a omdan venghoih in.” – Sam 119:9. Hiai a na thu bangzel in a kichi tuh Toupa thu taktak, a Laisiangthou thute leh Amahmah, i Toupa Jesu Khrist genna (Johan 1:1-2), Amah phawk gige na, koimun peuh a i omna a Amah thute a om gige na ahi.

Hinkhua apat ka theihchian semsem khat ahihleh, banghiam haksatnate tungtawn a lungzinna ka neih hun chiang in ka khelhnate (Toupa deihlouhdan a om kahi chih kitheihtheihna) hong langkhe zel hi. Hiaite’n kibawlphatna, hiai ka hihte hoihlou ahi chih theihtheihna leh Toupa thute a kikna, a Laisiangthou sim lunggulhnate ahon tung a, tuate’n khelh utna lungsim apan in ahon kembit thei hi. Hiai mah tuh atung a Sam laibu a i simlel toh a hong kituak mahmah hi. Toupa thute va sim gige zou hi keimahlehang, a thu i simte, i zakte ngaihtuah gige a, Amah i Toupa Jesu Khrist phawk gige nate toh hinkhua zang thei gige hileng khelhtheihna tampite lak apat suahtakna i neithei ding uhi. Tuate’n hinkhua a lungzinna ding haksatnate hon neitawm sak mahmah ding in i gingta hi.

I Weekly Inspiration-te i na simzel uleh, tunitan in “Haksatna” thu lam toh kisai nihlam bang akigelh kheta ding hi. I niteng hunzatna ua i tuahsek uh ahihziakin leh Toupa’n poimoh asak ziak a hiai lam mah gen leh gelh mun dia honpi hi ding in i gingta hi. Himahleh ahunhun in i thugelh dante kibang vek keihial a, Toupa’n gelhdan tuam, asimtute adia le houpih dan tuamtuam in a honzat sak zel ahi chih i theih ziakin i  kipak mahmah mai hi.

Haksatna tuah i deih pen ahi zenzen kei chih i theichiat uhi. Himahleh hiai haksatna i tuahte tungtawn ua hihhaksat a i omte uh zaw Toupa i phawk semsem na ding uh; Amah deihdan a i khosak sem na ding uh ana hi zaw hi. Sam laibu ah hiai bang in ana gen hi, “Na thusehte ka zil theihna ding a hihhaksat a ka om a hoih hi.” – Sam 119: 71.

Hihhaksat a i omte khawng uh a huntakin theisiam keisek mahlehang, i khonung ngaihtuah chiang un Toupa’n hon bawlphatna ana hi gige hi. Khatveivei i ginna uh, Amah ah bang chi bang in i muanhuai ua chi a hon ze-et leng ahi thei hi. I hondampa Jesu Khrist tuitung a khe a pailai in a nungzuite lau in akikou uh a, sikha ahi chi’n ana mu hial uhi. “Himahleh Jesu’n amau a houpih paha, “Khamuangtak in om un, keimah ka hi, lau kei un,” a chi hi. Peter in a dawng a, “Toupa, nang na hihleh tui tung ah nang kiang a hongpai thu honpia in” a chi hi. Huan aman, “Hong paive” a chi a, Peter long a kipan a kum a, Jesu kiang zuan in tui tung ah khe in a paita hi. Himahleh huihnung a muh in a lau a, tum din a kisa a, “Toupa, hon hondam in” chi in a kikou hi. – Matthai 14:27-30. Hiai apan bang sinlai i la thei a? Haksatna, lungzinna leh lauhnate apan in Toupa muhsemna, Amah muan semsemna i nei uhi. Banah tua bang i tuahte uh zaw i tulel hinkhua ua honpanpihtu vuak hilou in i Khalam ading mahmah ua hat semsemna leh Toupa a kingak semsemna hon tungtu a hongsuak hi. “Huan long a a tuan uleh huih a daita hi. Long a omte’n, “Pathian Tapa na hi taktak hi” chi’n, amah a bia uhi.” v32,33.

Kei mahmah leng ka hi a, tamtakte’n hinkhua nuamtak a i zat theih hun chiang un thumna neih hun bang a hongtawm khasek hi. Nuamtak a khosakna ding ngaihtuahtuah mahlehang, nuamtak a i om hun chiang un Toupa leng phawk haksa i sa pah uh a, Amah i mangngilh pahpah nak uhi. Toupa pe’n amasa a om nawnlou in hun awl kal a ding in i koih zaw uhi. Hiai in thumna lam ahleng bahna liantak ahon tun pah hi. Himahleh haksatna i hon tuah zek chiang un Toupa i phawk uh a, thumna i nei pah uhi. Hiai bang hun lel a Toupa phawk  a thumna neih ding ei gingtute om ding dan hilou hi. Thumna a galdoumi i hih uh apoimoh a, hunteng a thummi i hih ding uh Toupa’ hon deihna bang leng ahi chih i phawk uh a deih huai hi. Thumna neihmun i chi hiam, thumna neihtam theihna i chih khong Toupa mai a kiniamkhiatna, Amah a kinga mi i hihdan uh ahon langsak hi. Thumna nei tawm mahmah, neih ding le thadahna a nei gige a i om theih lai teng uh zaw Toupa i phawk zou taktak kei ua; mahni a hithei kisakna, mahni a kimuanna i neilai uh chihna ahi. Hiai bang hun a i om det uhle zaw denciah haksa i tuahding uh kuan i thei a? Tua ahihziakin haksatna hun lel a Toupa phawk a thumna neite himailou a, i hunte uh atam thei pen Toupa adia i zat ding uh apoimoh pen ahi.

I thukhitna ding in Toupa a i kingak uh a, bang peuh eilam a i hih ding uh om bangbang te i hih zoh tantan uh theihtawp suah a i hih chiang un abante zaw Toupa khut ah i ngak ding uh ahi. Toupa nang mah thuthu ahi a, Nang mah min thupina ding leh pahtawi a na om semsemna ahih na ding in honpi in chia i thum theih uh apoimoh mahmah hi.

Koimun peuh a i omna ua Toupa a kinga zou mite hi thei gige ding, midangte khamuan thei mi leh pitu hi a, thumna a galdoumite hi thei chiat ding in simtute i biak Pa Pathian in hon ompihin hon vualzawl chiat hen!

”Bangkim ah kipahthu gen gige un; huai tuh noumau lam a Khrist Jesu ah Pathian deihlam ahi.” –  1 Thes. 5:18,

Toupa’n i thugelhte tungtawn in theihsiamna leh Khamuanna i tanchiat uah hon  piak i ngen a; theihna bukim louh ziak a i  gen khelh omte angaihdamna i ngen lailai hi.

Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing,)

14th April, 2021

Weekly-Inspiration – 67

Leave a Reply

× Direct Appointment