Lungsimlam Natna Bangchik Chiang A Thulaak Diing Ihi Ua?

Thumapii:

Mihingte’ ading in bel, sihna pen nikhat i tuah diing mawng ahi chih theihtelna nei a Pathian in hon bawl himah le’ng, i tuah chiang un theihsiam haksa mahmah a, lungziinna leh lunggimna nasatak hon tun zel hi. Sihna toh kisai zaw ngeinaseh chih om hetkei mahleh i pomsiam theih deuh bang leng ana om zel sam hi. A naupanglam deuh sihna leh teknat a sihna in hon khoihkhak daan kibang hetlou hi. Tuahsiat sihna in hon sukkhak dan tuam a, mi kua hiam khat in amah leh amah hinna kilaak (suicide) chih thu i zak chiang in, sihna dangte hon sukkhak dan toh kibang hetlou khat om hi. Mihing deihtelna pang hetlou a sihna zaw, pomsiam theih dan omthei khong sek mahleh, mahni deihtelna zang a mahni hinna kilaak zaw, adiak in, a notsiat innkuante leh lawmte a diing mahmah in pomsiam haksa law di’n ka ngaihtuah hi.

             Kum 7 vel paisa a kipat lel khong ahi in ka thei a, khauhual natna chih khong a igengen uh, suicide, eilak ah avangkim in zaak in hong om pan hi. I zaak chiang un awlmohna thu-le-laa, alang-alang in i gen kheu-khou uhi. Hun a pailiam zel toh kiton in, gen khaak in leng om nawnlou zel hi. Hun bangtan hiam hong pai zel a, suicide thuthak hong omnawn chiang in i gen kheu-khou zel uhi. Tunitan chiang in bel, huchibang thu zaak leh thehdarh a aom chiang in leng, awlmohna toh gen ding lel leng mi akitawm mahmah ta hi. Poi lua hi. Suicide kichi eilak a zaak ding om hetlou ana hikei mahleh, kum tamlou paisa akipat, i khotaang leh saptuam hon khawng zou hial leh dotna tampi piangsak hial dia kizing in tulel dan in ana omngei in ka theikei hi. Saptuam leh Khotaang in a doudaalna diing toh kisai banghiam pan hon laak uh lamen in ka na om-om hi. Tutan huchidaan panlaakna ka muh louh ziak in poi kasa petmah hi. Ke’n kei mimal a ka hihtheih sunsun omte kana hih sunzom zel diing aw?

Aziak bei in kuamah mahni hinna ki laak (suicide) chih om ngeilou hi (kei mimal tuahte tungtawn a hilhchetna):

Lungsimlam natna chi in i Laisiangthou in minvuah in gen kei mahleh, Laisiangthou mun tuamtuam leh Sam 150te lak ah, 48te’n mihing lungsim in a thuak lelh dinmun tampi a ki taaklang hi. Pathianthu ngei a kingakna in haatna leh khamuanna, lametna leh suahtatna hon tun ahihlam leng muhtheih in om hi.

(Sam 6, 13,18, 23, 25, 27, 31, 32, 34, 37, 38, 39, 40, 42, 43, 46, 51, 55, 57, 62, 63, 69, 71, 73, 77, 84, 86, 90, 91, 94, 95, 103, 104,107, 110, 116, 118, 121, 123, 123, 130,138,139, 141, 142, 143,146, 147)

Mahni hinna kilaak hial poisalou khop a haksatna, gentheihna leh mangbatna tuak mi om mah tham ahi chih suicide a sisate tungtawn in i chian hi.

Pathian hon sehsakna dan in, ‘trained Counselor’ bang kana hikha a, ka hihtheih leh ka batphaak diing a Toupa’n hon sehsakna tantan ah Amah hatna suang in pan chihtak in ka pang sam hi.

          Kei ngei leng akum a depression ana sual kahih ziak in, a gentheihhuai dan ka thei a, depression leh lungsimlam natna neite ka lainat mahmah hi. Hiai lunggimna, dahluatna, kingaihsiatna leh phattuamna himhim neilou a ka kitheihna pen kei lungsim suangtuahna a kipat kia hi hetlou a, atakgam a hinkhua a ka na tuah ahoihloute ziak ana hitaangpi zaw hi. Lungsimlam suutsiammite gen dan in, ‘i pian khiak apat etkol a ina omdaan dungzui leh hinkhua a ituahte kia lungsimlam buaina tuntu in ngoh theihlouh a, a behlap diing thil dang leng omthei lai’ chi uhi. I Nu’n bangchibang lungsim put toh hon na pai a? deih/phal ngellou in hon pai hia? i Nu’ sunga a i-om pat a kipat leh hon pai sung in amah genthei leh chavaihtak in salam leh lungsimlam ah ana om hia? chihte natawm inleng lungsim pai diingdaan tampi gelkhin hi chi uhi. Huaiteng toh kigawm in innsung kitamkham akipat mi a hong khanlet zomah lai leh, depression, anxiety leh lungsimlam natna neih baihsam mahmah hi. Hinna leh hinman himhim omlou sakna tan a lungsim put kekhia chihpen alamdang hilou a, a hithei mah ana hi ahi.

           Depression nei a akum a ka omlai in ka hinna laak di bangzahvei hiam kana suangtuah kha ngei hi (sih ut ngoihngoih utna hun simtute’n le i hinkhua ah khatvei bek i tuakkha chiat in ka koih hi). Huai suangtuahna ka neih chiang in, suangtuahna dang khat in a zui sek hi; ‘Kithat hita leng, ka hinna ka laak ziak in meidiil luut ta leng la’ chih in hon kam den mawk zel hi. Leitung a lah gentheihna chiteng thuak a om, sihnung a taangtawn gawtmun, ahaksa zaw sem a lut diing chih ka ngaihtuah chiang in ka thangpaih tha suak hi. Hinkhua zaw hichi maimai a lametna bei a om chihmawk hilou di hiveh aw chih ka lungsim ah thaam den hi. Atomlam in gen leng, hun bangtan hiam zoh in, ka ngaihtuahna hong kibehlap hi: Pathian hing bia lah kihi ngal a, hichia kingaihsiatna vungvung dinmun niam petmah a ka omna sanga thupizaw Pathian in hon sehsak om diing a gintatna, ka neihkhak ngei hetlou, kon neita hi. Huai theihtelna in Pathian ka zonna a tawsawn petmah hi. Piangthaksa himah leng, tup-le-ngim kichiantak nei a nungzuihna ana neilou kahihziak in, ka lunggulhna tan ah Pathian toh kizopna neilou in kana omden hi. A huchihziak in Pathian ah kingak diingdan theilou in ka na buai mahmah ana hizaw hi. Dawnna ka deih a, Pathian kiang chauh a om ahi chih leng ka theitel hi. Huai ka dotna tampite ka zon lai in, YMCA-te counselling course ah, Pathian’ mizat Dr Samuel Mungpu Tonsing leh a zi, Dr Ruati-te nupa hon awlmohna leh panlaakna ziak liauliau in, 2017  March kha apat in ka na telkha thei hi. A tomlam a gen di’n, huai course tungtawn in Pathian a om damna leh suahtatna kana muthak hi.

Kei mimal tangthu k’on genna ziak ahih leh, keimah ngei inleng lungsimlam natna ana thuak ek kahihziakin, a taktak mah ahi chih ka gen utseluat ziak ahizaw hi. Kibawltawm thil hilou hial ahi chih kon gen lailai ut hi.

I theih dia poimoh mahmah khat ahih leh, lungsimlam a buaina nei mite ataangpi in akhalam uh leng buai hi chih ahi. Kei mimal a ka tuahte kia hilou in, tutan a mi ka houpihkhaakte leng huchi vek sim uhi. Huchia lungsimlam leh khalam bah a ka omlai in, mi’n hon theikei uhi. Milak a kihel ka utkei a, biakna lam hi’n khotaang vai hi’n lawm pawlh vai hitaleh, kal kana suankhe peih kholkei hi. Mi lak a ka kihel sunsun chiang in chiamnuih khong ka gen zel sam a, maitai tak leh buaina khat leng neilou dan in kana kiphoulaak sek hi. Hichidan in ka lawm-le-vualte lak natawm ah ka na om hi. Depression ka neih pen kei lungsim ngaihtuahna buaiziak kia ana hihetlou ahi chih kon gen thakthak ut hi; ka hinkhua a thil katuahte ziak a ka ngaihtuahna ana kibawl zel ana hizaw hi. Huai hunlai in, ka tulel dinmun in hoihlam hon manoh louh zomah chiang in, kingaihsiatna, omzia leh poimohna neilou, iit leh huai a om kisaklouhna lian petmah in, lametna neilou a om kisakna te mualsuah haksa mahmah hi. Ahunlai in minvuah in ‘depression’ nei kahi chih kana kiphawk ngel kei a, hilehleng tawl kisa mahmah in ka om sek hi. Ka omdaan ningkitel in, suahtat ana ut mahleng le, panpihna laakna diing leh va zotna diing gentaaklouh in, anachaang leng ka na thei kei himhim hi. Huai sang mah in kihatsak in, lungsimlam buaina nei kahi chih bangtanhiam kiphawk leng le, huchi dan diing in ka kikoih uthetkei hi. Ihmut haksa ka sa thei mahmah a, dakkal 24 pumluum ihmutlouh hun avangkim a nei in ka omsek hi. Ahuchih chiang in doctor kiang ‘prescription’ kava ngen sek hi. Ka ngaihtuahna paidan ahihleh, ka dinmun kikhek lou pen, thillamdang hong tung a, hong kikhek leh, huaichiang in ka lungsimput kikhek thei pan chauh di’n kana koih hi. Huai ana hilou ahihlam ka counselling course tungtawn in kon sintou zel hi. I dinmun kikhek kei leh leng, i ngaihdaan hong kikhek chiang in, i lungsimput hong kikhek a, i dinmun natawm lungsimput dik ziak a khektheih a hihlam kon theikhia hi. Ka dinmun kikhek hetlou pi in, ka puakgik puakte beikei mahleh, a puakdan kon siamta hi. Huchi’n, ka dinmun kei mahmah in ka khek theih ana omte khek diing in pan kon la theita hi. Pathian a kinga a, Amah a muanna ngak omzia nasa tak in ka counselling course tungtawn in sinsak in ka omtou zel hi. Pathian khoihkhaakna ana tangtou zel in k’ong dam hiai-hiai hi. Ka dam toh kiton in kei bang a mi tampi om diing a gintatna lianpi nei in midangte vei petmah in Toupa’n hon veisak a, tutan in leng ka vei tou zel lai hi. Toupa’n hon deihna leh hon zatna mun ding hong chiang mahmah ta ahihman in, Toupa’ Aw ka na delhzui zel hi.

Depression leh Anxiety i chih miteng in neikha vek hi:

Hinkhua haksa ahichiang in, lungsimlam buaina nei mi ki tam mahmah hi. Lunggimna neih zekzek pen asia hikhin vek lou hi. I mimal hinkhua ahoihzawlam a khek diing in hun tamzaw ah, hiai lunggimna i neihte, ei hon tawsawntu in pang uhi. Huaiziak mah in, niteng hinkhua ahidiing bang leh angeina bang a izat diing hon hih nawngkai saklou hi. Hun hong kikhek in dinmun hong kikhekdan dungzui in buainate leng hong veng zel a, a huchiloute leng bang chichi hiam in hong veng zel hi. Himahleh, avengthei hetlou a niteng hinkhua a ingaihtuahna atamzaw hon kam a, kingaihsiatna hiam, dahluatna hiam, lungkiak ngoihngoihna hiam leh lamet diing nei nawnlou a kitheihna hiam, ahihkei lwh huaiteng kigawmte’n i ngaihtuahna tam aluah zawk a, niteng hinkhua paidaan natawm a hong nawngkai chiang in mimal buaina hon tun a, panpihna kipoimohta chih ahong kilang chiangta mai hi.

Huchibang a haksatna tuak mi’n ataangpi in mi kiang ah genkhe ngam pah lou hi. Bangziak a ichih leh, mi’n houchik dan khong a gensak sek uhi. Agenna sunsunte’n lah thutankhum zomah ua, anuihsan uh toh, thil zumhuai dan a gensak diing leng mi ana om zomah uhi. ‘Houlua’, ‘Khemkhem’, ‘kitheihmoh bawl in’, ‘Pathian muang in’, ‘hong pha mai diing’ chih khawng za sek uhi. A lungsim put pen lah sihkhiak a paih maitheih hilou ahihziak in, abuaina veng lou hi. Athuaktu’ adia lah, na mahmah si maw! Hin ningkitel, sih ut ngoihngoih, niteng hinkhua zatna dia tha ngahna diing leh kithalawpna diing himhim mulou ana hiven! Kuama’n ama lungsimlam natna za utlou uh ahihchiang in, zaak(ngaihkhiak) a om kisaklouna toh dimin, omzia nei kisakna tawm deuhdeuh zomah hi.

A tawp chiang in, a genna di neilou, a genkhiakna sunsunte a phatuam lou ahihziakin, kuaman panpihthei di’n le gingta lou a, a dinmun kikhek ngei nawn di’n leng koihlou a, hinman om sa mahmah nawnlou, lamet diing neilou, panpihtu diing omlou, hichia omden a suahtatna kichi omngei nawn diing a gingtatna nei nawn hetlou in, mi a diing natawm a noksak, dongsak leh puakgik guantu lel hi a kingaihsutna liantak nei in, amah omlou a khovel atheihphakna tan thoveng zaw ding a koih in, buuktuahtuah in, atawp in ahinna amah leh amah in akilaak ta hi.

 Angaihtuahna pai diingdan teng suangtuahsak zou kei mah le’ng, ahaksatna ngaikhia a poisakpihtu diing leh panpihtu diing mi om ahihlam thei hileh zaw, zuankha maithei hi a maw! Panpihna omna lam zotpih leh kawkmuh thei diing bek ana nei hileh zaw maw!

Huchi’n a kithah thu mi’n ahon thei ua, asih nung natawm in leng thutanna bawlsak in a omlai tel hi:

‘Pathian a kinga zoulou eive ‘

‘Haksatna enle ituak chiat voi’

‘Mi dawilok ahi’

‘Mimoh/Chau law ngal’

‘A innkuante khualkei na e’

‘Hai na lawmlawm e’

‘Mi kiang ah hilh leh hoih di hia’

‘A innkuanpihte adi’n mualphou huai e’

Hiai atung a kampau khenkhat kon taaklat teng kia lou atuamtuam tampi kamteh in houlimna khong inei sek uhi.

Bangchibang lawmlawm haksatna tuak a, thuaklah a ahinna la hial diing a thutanna bawlthei mai ahi de aw maw chih khawng in i ngaihtuahna sukha mahmah veh aw maw, suicide thu i zaak chiang in? Mangbatna leh lunggimna mahni khamtawk a ana tuakkha sam ihih chiang in, bangtan hiam zaw i theisiam sam hi. Hilehleng a kithah hial pen i theisiam kei a, thutanna i na bawl khumkhum zomah lai hi. I theihsiam kei leh leng apoina om hetlou hi, ahialah, thutanna va bawlsak sese ngai hetlou ahi chih leng chiamteh tham ching hi.

Lungsimlam Natna toh kisai a i lungsim put uh khek hunta hi:

I hoihlouhna uh khat ahihleh, Mental Heath toh kisai a lungsim put i neihdan uh dikhetlou om hi. Mi khenkhatte’n, Mental Disorder (Depression leh anxiety chihte neptak/houchik in koih ua, poi mahmah hi. Thil nep hileh, avangkim a suicide thu zaak zel chih omhetlou diing hia maw?

Mi khenkhat tageet in lah, Mental Health (Lungsimlam damtheihna) poimohdan i gengen di mah ahi ka chih chiang in hon nial ut sek uhi. Hiate i gen tam leh atheiloute kichihmuh theih hi chi’n hon nial zel uhi. Hichibang ngaihdaan hoihlou leh masuanna diing daaltu ineihte uh paih a paihkhiak hunta hi.

Nikum in ka heutupa deihsakna in ‘Annual Suicide Conference’, Sisters Living Works kichi NGO, USA a ki based te’n asai uh ka va tel kha hi. Huai hun in psychologist tamtak in thugenna nei ua, huai a hah gen pente lak ua thil thum ken le ka poimoh ngaih mahmah ei dinmun toh kituak in kon gensawn ut hi:

1) Mental Health toh kisai a khotaang gentaklouh, saptuamte natawm inle ngaihdaan hoihlou, gimneih bawl a (social stigma), i koihdan khat ompen lakkhiak na diing a panlaak poimoh hi. Huai ahihtheihna di’n, mite theihsakna diing a panlaak poimoh hi.

2) Lungsimlam natna i etsoihna (stigma) laakhiakna diing a panlaak dan khat ahih leh ‘gengen diing’, ‘gentam diing’ chih ahi. Zumhuai ahihlouh daan, mihing hi hang a, nat leh lunggim tuah theih mah ahih dan khong leh kepdam theih ahihdan leh panpihna laak/zon chihte hihluat diing ahihdan khong workshop/seminar/awareness campaign-te tungtawn a gen gen poimoh hi. I genkhiak a, i theihsiam chiang in, a doudaalna leh ahihdamna lam buaipih theih pat hi diing hi. Huchi leh, suahtatna deih a aguuk a thuakte’n leng panpihna naih ngam pan diing uhi.

3) Lungsimlam natna leng taksapum natna chihkhat dan a pom poimoh lua ahihlam gengen diing. Taksa damlouhna ineih chiang ua, Doctor va naih chih pen pilhuai leh thilhoih in i ngai ua, a hunhun a iki etkol chiang in, ase diing tampi ki khaam zel  hi. Hilehleng, a hun a etkol ahihke’h taksa mundang leng nasak thei hi. Huai dan mah in lungsimlam natna leng pai thou hi.

Etsakna: Mi a khe kitan khat tuakkha le hang, i nuihsan diam? Hong hoih mai diing chi in i taisan diam?, ‘Pathian muang in’ chi in i taisan diam? Ahoulua ichih sak diam? Huchih mawk lou e, Damdoi inn zuan dia i sawl kei leh leng, en a kinthei pen a ki zotpih lai diing hi. Tu’n ah, lungsimlam natna neite i tuahkhaak chiang un bangchi’n mimal, khotaang leh saptuam in i na ngaihsak/kem a chih ngaihtuah mah dih uh.

          Lungsimlam toh kisai telsuimite’ suina khat a ana muhkhiak dan un, mihing khetan khat leh mi kingaise mahmah khat khuak MRI a a-etkhawm na uah, akhuak uh akisukkhak daan kibang hi chi uhi. Huai omzia ahihleh, mi khat khe kitan ziak a ana athuak dan tuk in lungsimlam damlouhna in leng huchibang tuk in ana thuakna tun hi. A chiang deuh ta diam ah.

Lungsimlam natna etsoihna/gimneihna(stigma) leh Saptuamte:

A poi diak kasak ahihleh, platform hoihtaktak zang a, Pathianthu gen khenkhat in Depression khong gen nep leh chiamnuih gen heng-hang sek uhi. Ka zadah mahmah hi. Thil i tuah khak ngei leng hilou, hun leh lungsim seng a isui detdet ngei leng hilou khong nep gen chiing nawn kei le’ng hoih mahmah di’n ka gingta. Hichi khong a Jesu Khris sik-leh-taang a idinna munte khong ah, mi tampite sihpih thilte gen nep nawnkei leng ka chi mahmah hi. Midangte lungsim pomsiampih theih (Empathy) bang kizil ek hun ta hi.

[Hebrute 4:15 ; Johan 11:35; Romte 12:15; 1 Korinthte 2:3 ; 1 Peter 3:8]

Mi khenkhat te’n sih sual a asualte khong uh huchia i houngaih sak chiang un, kilkhat a lungsimlam natna liantak nei, damna lamen tak a ana om pen adingin kisuanlah huai pii ana hikha thei hi. Thil zumhuai a alungsim natna pen a koihna, mimoh a kisakna leh a kingaihsiatna ana liantuan ahihlam chiamteh leng hoih mahmah ding hi. Jesu Khris in, belsam 99te taisan zen in belaam mang khat ana zong chih khong i gengen uh hilou mo? Hichi khong a thu i taangkoupih ekekte hiai khong a izat ke’n koi a va zang tuan di e? Thugente’n leng, agen kia sikhop lou in, a zuihna lam piibawl zaw deuh lai leng, ki hiamtuan mahmah di’n ka ngaihtuah hi. Pulpit pen Pathian thutak genna diing hi a, mi sang a hoihzaw a, kithuneiaak tak a mi kouna leh mi engchihna diing hilou ahi chih chiamteh poimoh hi. Lungsimlam damtheihna (Mental Health) toh kisai a stigma lakkhiak apoimoh nakkal a, i gen nep gige ua leh, kilakhe ngei lou ding hi chih thei ni. A stigma a omleh, mi tampite saltaanna akipat a hutkhiakna diing a panlaak haksa mahmah ahi chih thei ni.

Lungsimlam damtheihna apoimoh dan mi nautang leng phawksak poimoh mahmah ahih ziakin, heutu lamte’n ma i kaih nak ualeh ahi diingdan hong om mai ding hi.

Pathian’ nnasemte a diing a theihtuak khenkhat:

Pathianthu gente, Pastorte, Upate, Missionaryte, Counselorte leh mi’n lamen tak a houlimpih diing a zot a omte’n i theih dia poimoh mahmah chiamteh tinten dia hoih thil 3 kon kum ut hi:

1) Mihing kibangvek lou ahi chih i theih dungzui in, amau hihna bang in pomsiam le’ng chih deihhuai hi. A khente thuak haat deuh bang ki-om a, a dol deuh bang leng ki-om a, Pathian thu a kihehnem siam deuh leng om a, piangthaksa himahleh, Pathian thu a kinga zoulou deuh bang leng omthei ahihlam chiamteh leng hoih mahmah ding hi. Khalam dinmun leng kibanglou chiat hive hang maw? Mi, adiak a lungsimlam natna neite, thukhensaktu ding kihi lou inchin, Pathian kiang a om damna, mualsuahtheihna, bitna leh khamuanna kawkmuhtu, thumpihtu leh lametna Pathian a om ahihlam hilhchian a, huai a kingak theih ahihdaan, amau mizia dungzui a sinsaktu diing ihihlam uh chiamteh a i neih uh poimoh mahmah hi.

(1 Korinthte 9:19-23).

**Mite’n a thuguuk uh, a khelhna uh leh a haksatna uh a hon gen chiang un, koihiam khat a va gensawn chiin hetlouh diing ahi chih chiamteh in zui ni. Thumna a phawk diing natawm a leng, amau phalna panglou a koihiam a va puan diing hi thahah lou hi.**

2) Theih dia poimoh mahmah nawn khat ahih leh, Sa a om ki hilai ahihman in, i kha pen va sukkhak pah sawm sangin, i taksa in a phawk luat natna (pumpi leh lungsimlam) pen enkol masa leng, khalam pen khoihkhak baihsam petmah hi. Khalam vai ki gen kai thouthou hi chih ka theichian deuhdeuh hi. Jacob 2: 15-16 ah salam taksap hih buchin apoimohdan i mu hi. I Hondampa ngei leng khovel a ahong pai lai in, khalam damna toh kiton in salam damna leng awlmoh mahmah hi chih i thei hi. Lungsimlam natna leng sapum natna ahihlam chiamteh ta ni.

3) Midangte kawkmuh apoimoh dan thei ni:

Pathian kumpigam a mohpuakna chi tuamtuam neite ihih ziak un, i theih tawp i suah diing him uh ahi. Pathian’ kumpigam nnasepna ah, Toupa’n siamna leh hihtheihna chi tuamtuam hon pia a, khalam thilpiak i tante uh leng kibang veklou ahih toh kiton in, A hon zatna leng kibang vek lou hi. Ei hihtheih na lam chiat ana om sek ahihman in, ei hihtheihlouh lam a nna got a i om chiang in, midang kawkmuh a piaksawn poi sa kei ni. Ei kia in leng hih khit sawm vek kei ni. Khris’ pumpi kahiang tuamtuam, siamna tuamtuam, sapna tuamtuam himah le hang apoimoh dan a pangkhawm a, kihuh tuah, ki kawkmuh leh kipiaksawn chihte ihih diing mawng uh ahihlam mangngilh mahmah kei ni. Kituh bawl, mahni in kihui vek, ki haza, ki deihsak tuam chihte toh Pathian kumpigam nnasep in maa suan theilou hi. Lungsim enchiantu, Pathian’ lemgeel leh nnasep diing daaltu a panglou di’n pilvan sawm ni. I tuhgah chiat lou ding ihi chih thei ni hang!

(Exodus 18:13-26); (1 Korinthte 3:8 ; 1 Korinthte 12:12-27; 2 Korinte 5:10 ; Matthai 16:27; Jeremiah 17:10; Paunaakte 24:12)

Dotna nih in thukhitna kon bawl diing:

  1. Mi khat in a hinna amah leh mah a kilaak chih thu i zaak chiang un, puaknathuai leh poisakna in i dim uhi. Huaitan lel a bei sak zel diing i duam?
  2. Jesu Khris in Lungsimlam natna nei kichite bangchi’n vaidawn in, bangchi’n kem in, bangchi’n ahoulimpih diam aw? Ahihkeileh, hiai lungsimlam natna thu toh kisai banchi’n a maituah di’n a gintat huai isa ua?

‘Hiai khovel vaak na hi uh’ hon chih mahbang a, A lungtuak a vaak khe thei chiat di’n, Toupa Jesu Khris in, A Min Siangthou in simtute hon thuam chiat ta hen.

  • Chingngaihlian Tunglut


Leave a Reply

Your email address will not be published.

*
*
*

× Direct Appointment