LUNGKIMNA TAKTAK JESU AH A OM

0

Mihingte’n kipahna ding, nopsak theih na dingte zongzong hi leh ki lawm hina pi in, tua I zongzong te’n a tawpna ah lungkiatna, thadahna leh bangkim a lametbei kisakna hontung nak hi. I khosakna ding uh I ngaihtuah uh a, I maban ding uh khual in theihtawp suah in I hunte uh I zang uhi. Himahleh hiaite ah lohching kisakna leh nei huntawk I kisak tan inleng lungnop na taktak a om thei kei hi. Bang a I zong uh? Khovel a lalna, thupinate, minthangnate leh punna te ahi zaw hi. Hiai te ah lungkimna om taktak ding I sa uh a himahleh ana hi kei hial hi.

Mihingte’n I niteng poimoh uh a om chiat hi. Tuate zaw I sep a I zong ding mah uh ahi hi. Himahleh a poimoh masa pen Jesu a Hotdamna zong masa lou in mahni deihna leh utna bang in I ki pi zaw ta uh hi. I niteng hunzatna uah na hoih pipi sem leh bawl kisa  in tua te ah kipahna leh lungkimna I na zong sek uhi. Huchih ahihlai in ei ahleng hi kisaktheihna leh hoih kisakna in I dim uh a, thil sia hihlou I ki chih lai un lungsim guktak ah  mahni a ki letsak nate’, ki saktheih nate, hi kisaknate leh mi dangte el na a dim a khosa te’ I hong hi maimah uhi. Hiai ah ennate, kinaknate, kikousiatnate, muanmohna giloute, thutak neilou leh lungsim sia nei a, Pathian limsakna tuh punna ding a ngaihtuahte I hong hi zawta uhi. (I Timothi 6:4-5) Inn leh lou, hauhsaknate, sum-leh-pai te tampi nei in, mi tung a leng mah lenleng hiaite ah zaw lungkimna taktak a om thei kei. Zawng in, neilou in mite maipha zong in om mah lenleng I neih ding Toupa Jesu I neihlouh chiangin zaw lungkimna a om tuan kei hi.

Bang ahia I lungkim taktak theih na? “Lungkimna toh kithuah Pathian limsakna tuh punna thupitak ahi” – I Timothi 6:6. Lungkimna leh punna te zaw hiai khovel a thil muh theih te ah hi masa zawlou in Pathian limsakna ah, Amah thu te ah a om zaw hi. Pathian limsakna bang ahia Ie? I Toupa Jesu Khris gingta a, Amah I hondampa dia sang a, a thupiakte gingta a I zuih a, Amah deihna bang a nungtakna tuh ahi. (I Timothi 6:3).  I hinkhua a Jesu I neihlouh a, Amah toh I tonlouh chiang in I thil hihna ah hileh, I nasepna te ah lohching bang lenleng tua te’n lungkimna taktak hon tung thei kei hi. I Toupa deih na bang a nungta a, Amah toh I hih peuh a I  tonkhawm chiang in, bangkim ah lungkimna a om taktak hi. (Hiai thu gelh pa mahmah inleng kana tuah gige ahih ziakin nang leng tua bang hi thei gige na hi chih I Toupa Jesu Khris min in ka hon gen hi).

“Khovel ah bangmah I luut pih kei a, bangmah I pawtkhiakpih thei saam kei diing” – I Timothi 6:7. Khovel a I hinsung un thupinate, lohchingnate nei in, hauhsaknate leh minthangnate thupi taktak te toh om mah lehang tuate’ zaw I Toupa mai ah I tawi thei kei ding hi. Jesu nei a Amah toh kal I suan a I tonkhawm chiang in Toupa’n Amah min thupi na ding, a thilhih theihna aki latna hi ding in khovel ah a hon zang thei zaw hi. Hiai in lungkimna taktak a hontung a, eimah siamna, pilna leh thilhihtheihnate ziak hi zawlou in Pathian thupina langsaktu hi ding in a hon zang zaw hi.

“Huaiziak in, nek diing leh silh diing khawng I neih naak leh, huaite ah lungkim ni hang. Hauhsak utte zaw khemna leh duhgawlna haihuai leh hihsethei tampi: huai siatna leh manthatna a mite kaitum sek, thaang ah a-awk naak uhi.”  – I Timothi 6: 8-9.

“Sumdeih luatna tuh gilou chiteng bul ahi ngal a; huai tuh khenkhatte’n adeih mahmah ua, ginna ataimangsan ua, lungkhamna tampi in amau leh amau akisun let tektok uhi.” – I Timothi 6:10. Tulai khovel ah hauhsaknate mah delhin, sumdeih taakna toh I khota uh hi. Inn hoih pipi sung ah I om ta uh a, mit a I muh batlouh uleh, huchi ding a khosa ding aleng I ki ngaihtuah louh lai un nuamtak leh thupi takin I khosa ta uhi. I Lamka khopi sungte uh bang I etchiang in neih-leh-lam ah I khang hulhul uh a, gamthuk tak a omte neih bangbang, nek bangbang leh khosak bangbang in I hong khosa ta uhi. Huchi ahihlai’n I Khalam dinmun uh niteng in a dau huaihuai a, Toupa deihlouh dan te bawl in I nungta ta uhi. I Toupa deihna bang hi nawnlou in I nopsakna ding te uh ngaihtuah in sum-leh-pai I zong uh a, tua te’n I ginna uh hon taimangsan pih ta hi. I innsung uah, saptuam sung ah leh I mi namsung tanpha uah kipahna, lungkimna te om nawn lou in buaina lian taktak te’ I maituah uh tampi a omta hi. Kisik a, ngaihdam ngen a Toupa I belh kei ule zaw I maban ding uh tua I muhna tanvuak uh ahong hi zenzen kei ding a, maban ah lungkhamna leh buaina liantak I tuah ding uh a nasa zaw thei hi.  Hauhsaknate, sum-leh-pai deihtakna te a nungta hi zaw lou in Toupa thute mah buaipih leng ei ah ki khekna hong om ding a, hiai in I innsung mite lak a nna a hongsem dia, Saptuam sung ah khanlohna thupitak toh kal I suan thei ding uhi.

Himahleh nang Pathian mipa aw, huai thilte taisan inla, diktatna, Pathian limsakna, ginna, itna, thuaktheihna, kingaihniamnate delh in. Ginna kidouna hoih sual inla, tangtawn hinna len chinten in; huai tang ding a sap na hi hi; theihpih tamtakte mitmuh in gupna hoih na gumta hi.” – I Timothi 6:11-12. Hiai tuh I Toupa Jesu deih dan ahi, khovel dan bang ahia chih I theih uh ahon deih hi. Pathian limsak a, ginna, iitna thuaktheihna leh nunnemnate delh a, ginna a kidouna hoih dou a, tangtawn hinna len chinten ding in a hon sam hi. Hiaite dou zou thei ding in Toupa ah hatna thilthihtheihna a om hi, hiai te dou a I om chiangin khovel ah I omsung un leng kipahna lungkimna taktak Amah Jesu ah I neithei gige hi.

I thukhitna ding in bang chi bang in lungkimna taktak om ahi I chi thei dia? Laisiangthou ah a dawngna I sim ding. “Na lungsim putdan uh dangka deihtakna panglou hi hen; na thil neihsun tung uah lungkim un; amahmah in, “Bangchik mah in k’on donlou kei ding a, paileng k’on paisan kei ding” achi hi. Huchi in hangsantak in “Toupa hon panpihpa ahi, ka lau kei ding; mihing in bang a honchih thei dia” I chi uhi. – Hebrute 13:5-6

I Toupa Jesu’n _‘Bangchik mah in k’on donlou kei ding a, paileng k’on paisan kei ding’_ a chi hi. Lau kei ni, hatksatnate, buaina te ziaka lungkimna nei theilou I hih lehleng hon pethei pa I Toupa kiang ngenni. “Ngen un, piak in na om ding uhi; zong un, na mu ding uh; kiu un, a hon honsak ding uhi” – Matthai 7:7. Lungkimna taktak Jesu ah a om hi, Amah khuthat leh muanhuai ah lungmuantak leh lungkim tak a om thei gige ding in simtute’ Toupa’n alehtampi in hon ompih in hon vualzawl hen!

  • Thangginom Hangshing
    (Laigelh toh kisai kupbeh nuam omleh, Laigelhtu +919615804759 ah thuzaak theih diing hi.)
    12th August, 2020| Weekly-Inspiration – 32
Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published. Required fields are marked *

Book Appointment