LUNGDAM THEIHNA POIMOH HINA E!

Michih in tantawk a lungdam theihna chih khong a poimoh dan i theichiat uhi. Apoimoh kia hilou in, i taksa leh i lungsim ading mahmah in a poimoh lotel hi. Himahleh a thu a theihthoh lelte i hizel uh a, a tak a sepsuahna, lungkim theihna i neizou keisek uhi.  Hiai bang a lungdam theihna chu niteng a i zil ding uleh atak a i sepsuah theih uh apoimoh hi. Hihna bangbang leh tantawk a lungkim kisin chihte khong Pathian deihdan leng ahi chih theih gige apoimoh hi. Pathian hon vualzawlnate gen ding chilengle i genkim zou keihial ding uhi, hiaite maimai inle lungdamna ding kipahthu gending adim in a om hi. Zing i thoh apat i luptan in Toupa hoihna, a ompihna phawk a ngaihtuah ding chileng lungdamna ding genzawh vuallouh muh ding a om den hi.

“A thilpiak genzawh vuallouh ziak in Pathian kiang ah kipahthu om hen.” – 2 Kor. 9:15.

I hondampa Jesu Khrist eite khelhna teng lamang ding leh eite hong hondam dia a hong sihna vuak lelleng kipahthu gengen ding hina pi gen inle i neikei sek lai uhi. Ngaihtuah in i neizel ding uam ah niteng hun i zatna uah Toupa’n hon ompih lou hi zenzen leh hiai tan mel, tuni’n mulai ding in i kigingta hia? I mai ah sihtheihna leh siattheihna tampi lak a i Pathian hon kepbitna ziak a tunia hiai bang mel kimu thei ahi chih phawk thakthak a lungdamtak a kipahthu gengen ding apoimoh hi.

Lungdam theihna bang chituk apoimoh hiam chih saulou in i en ding.

  1. Lungdam theihna tuh Pathian i pahtawi theihna chikhat uhleng ahi: Hiai vuak lel inleng Pathian kiang ah kipahthu gengen ding ahoih hi. I Pathian i pahtawi theihna uh tuh tantawk leh neih bangbang toh lungkim tak a om theihna ahi. Hiai in Pathian a muanna nei i hih dan, Amah a lametna nei i hihdan leh Amah akinga i hih dan uh ahon lak hi. Lungdamna in ei apat bangmah suak omlou ahihdan, i Pathian apan ngen ahihdan chiang takin hon theisak hi.

“Bangkim noumau hoihna ding ahi ngal a, hehpihna mi tamzaw ziak a hihkhan a om a, Pathian thupina ding a kipahthugenna nakpitak a a khansak theihna ding in.” – 2 Kor. 4:15

  1. Lungdam theihna in Pathian mel hon musak hi: Lungdam tak a om theihna in I Khalam mit mahmah leng ahon hihvak sak hi. Tua in i Pathian mel muhna, a awte zaknopna lungsim ahon guan hi. Amah toh tonkhawm gige anopdan, kipahhuai ahihdan leh kibit ahihdan kithei chian semsem hi.

“Ka nau deihtakte aw, khem in omkei un. Thilpiak hoih leh thilpiak buching tunglam a kipan a vakte Pa kiang a kipan a hongsuk ahi a, amah ah lamdanna leh kikhekna lim a omkei hi.” – Jakob 1:16-17

  1. Lungdamna in Pathian deihdante theihsiamna honpia hi: Mihingte’n nopna kipahna khat i tuah hunchiang un lungdamna i nei deuhse uh abang hi. Hiai hunte vuak a kipahthu a gen vuak hilou a, haksatna i tuah hunte ua tuate theihsiam kisin apoimoh hi. Hiai bang haksatnate leh buainate tungtawn in Pathian in ei ah bang honlak a, bang i muthak a chih ngaihtuah in tuate ziakin lungdam kisin theileng i ut mahmah hi.

“Bangkim ah kipahthu gen gige un; huai tuh noumau lam a Khrist Jesu ah Pathian deihlam ahi.” – 1 Thes. 5:18

  1. Lungdamna in Pathian toh hon kinai sak hi: Lungdamna in Pathian hoihna genseng ding hilou ahihdan hon sinsak a, hiai lungdamna i neihte’n Amah toh kithuah utna lungput hong pia in Amah ngaihna leh itna i nei uhi. Jesu’n phak sawmte ahihdamna thu lungsim ah hong lian mahmah hi. Tua mi sawmte laka  khat in dam chih a kitheih in, aw ngaihtak a Pathian phatkawm in a kiknawnta hi. Hiai ah eite leng tua bang a om hileng i kipahna ziakin Toupa kiang i kik diam? Ahihkeileh Amah hon hihdamtu phawk nawnlou in hinkhua i zang maidiam? chih hon ngaihtuah sak hi.

 

“Huchi in Jesu’n, “Mi sawm hong siangta hilou na hi umaw? Kuate koi ah?” chi in a dong hi. Pathian phat ding a kiknawn, hiai theihlouhmi kia loungal kuamah muh a omlou uhia?” a chi hi. A kiang ah, “Thou inla, paita in; na ginna na dampih hi” a chi hi. – Luke 17:17-19.

  1. Lungdamna in lungkimna hontung hi: I gentaksa mah bang in Toupa hoihnate sut a gen ding chileng i genkim zoukei hial ding hi. Hiai bang a Toupa vualzawlnate hichih zahta a i donglai ua lungkimna i neihtheih kei lai uale zaw tampi neih beh in omleng le lungkimna taktak i neithei tuan keiding uhi. Bangkim a lungdam kisintheihna zaw lungkimna thuguk Pathian apat i muh uleh i neih uh ahi hi.

 

“Lungkimna toh kithuah Pathian limsakna punna thupitak ahi. Khovel ah bangmah i lutpih kei a, bangmah i pawtpih thei sam kei ding hi.” – 1 Timothi 6:6-7

  1. Lungdamna in i Khalam dinmun hon thuksak sem hi: I hun paisate uh ngaihtuah kik a i neihchiang in Toupa hoihna i muhding uh atam mahmah hi. Hiai te’n haksatna i maituah ding uh om mahleh Toupa hoihna i dongte uh tungtawn in hangsan na a honpia hi. Tuate’n i Khalam dinmun uh mahmah bangleng hon thuksak semsem in, Toupa a kingakna bukim, Amah kia poimoh i hihdan uh ahon zilsak hi.

“Aw, Toupa kiang ah kipahthu hilh un: amah lah a hoih ngal a; a chitna tangtawn a om ding ahi ngal a.” – Sam 136:1

  1. Lungdamna in khemna apan hon humbit hi: Melampa nasep dan i theichiat uh a, i theih gige uh hina pi in le tamtak ahon khempuk zou gige hi. Toupa a muanna ngak a, Amah a ki tuklut louhngal zaw leitung ah i bitna ding uh aom kei hial hi. Pathian ah lungdamna nei gige in, diktatna toh om gige leng Setan khemna apan in i Toupa’n hon humbit gige ding hi.

“Toupa Pathian i ni leh phaw ahi: Toupa’n hehpihna leh thupina a pe ding a: diktak a omte lak ah thil hoih a it kei ding hi.” – Sam 84:11

  1. Lungdam gige theihna zaw i testimony uh chi khat leng ahi hi: Lungsim kihong tak a Toupa ompihnate phawk a kipahthu i gentheihnate tuh i lungdamna ziak uh ahi gige hi. Hiai bang a i omtheihnate tuh Toupa i neihna akilatna ahi a, Amah ah kipahna bukim om ahihdan akilang hi. Mite’ mai a testimony va gen sese hikei mahlehang i omdan inleng mite’n hon theiding ua, hiai nu hiai pa zaw a omdan in Pathian a it, Amah a kipahna om gige ahi chi’n hon theithei ding uhi.

“Aw, Toupa kiang ah kipahthu gen unla, a min lou un; michih lak ah a thilhihte theisak un.” – Sam 105:1

Toupa’n i thugelhte tungtawn in theihsiamna leh Khamuanna i tanchiat uah hon  piak i ngen a; theihna bukim louh ziak a i  gen khelh omte angaihdamna i ngen lailai hi.

Thangginom Hangshing

 (Laigelh toh kisai kupbeh nuam omleh, Laigelhtu +919615804759 ah thuzaak theih diing)

30th June, 2021 | Weekly-Inspiration – 76

Leave a Reply

× Direct Appointment