LUM LAH LUM LOU, VOT LAH VOT LOU!

Khua a hong vot chiang a nek-leh-dawn a sat vit-vit leh nuam inchin, lim le lim diak eive maw? Singpi lum pelhpulh dawn sang a dawnlouh ut zaw bang mi ki tam sim di’n ka gingta. Tangmai bang, a vot dikdek a kholum lai a nek chu tawldam huai zezen maw? Huchi lou a Nisa in a hai-sa, lumsim pelhpulh nek khak bang a noplouh daan leh a limlouh daan thei kha le ki omzek maithei chi aw? Lum lah lum lou, vot lah vot lou nek khawng a noplouh leh a limlouh daan kitheivek hiven.
I Toupa’n, Laisiangthou a, tehkhinna dia a zatte kha, i theihsiamsa thilte ahi chih ka ngaihtuah khaak teng in kipahhuai ka sa gige.

Kilaakna 3:16 ah, Toupa Jesu Khris in hichi’n ana chi hi, “Lum lah lum lou, vot lah vot lou a, na om pelhpulh ziak in, ka kam a kipan in k’on se khe ding.”
Ei Singtangmi, atam zo te’n Pathian i biak daan uh toh kibang kasa mahmah hi: Khristian kichi ngal si, lah Laisiangthou toh kituak a Pathian belou a, mahni remchaandaan, peihdaan leh hoihsakdaan a Pathian be mawk. Huaidaan ahih leh chu, Lei leh Van siamtu, thil tengteng tung a thunei Pathian Hing leh Siangthou, Khovel hondamtu ding a A tapa iittak Jesu Khris hon sawlpa Pathian pen be kha lou kihi maimah ding hi. Mi’n “ki Pathian’ Thu awisak” a hon chih di ki ut hetlou,( i awi taktak louh ziak uh ahi diam?) “Pathian’ Thu awilou” a hon chih d’uh le ut tuan sam lou zel( mahni khamkham a thei kisa chiat zel ihih chiang ua).
I huchih uh kha, A lum lah lumlou, a vot lah votlou, hi pelh-pulh ana kihi daan hi. Jesu Khris in huchi bangte a bawl ding daan a gen lah chizau huai pi hi a maw? Mahni ki suut zek zaw tasam hive hang aw, i ut leh utlouh, poimoh i sak leh sak louh ziak a, poimoh ahihna bei tuan si lou a.

Sa-lam, lungsim-lam leh kha-lam khan na ding a mahni ki-et chet, ki-vel chet zelzel poimoh peetmah inchin, thil haksa leh nuamlou pi khat le hi eive. Hilele, pumpi bukim a masuan/khan i ut leh i chiin di a poimoh mahmah chu ahi (a utlou bang a tamzo kihi lai di hi a).
Ei lungawina di leh mi hon muh di daan khong ngaihtuah a, A min pu maimai a Khristian hih zaw, Toupa Jesu in, Matthai 7:23 ah, “Huai hun chiang in, Nou thil gilou hihte aw, K’ON THEI NGEI KEI, ka kiang a kipan in paimang in, chi’n, amau ka hilh ding.” a chih bang a, huai hun chiang a huai kampau za ngam di ihi diam, chih dotna nuam hetlou kidong thei le hang i chi hi. A zekai thei thil leh a taktak (reality) ahi mawk si a maw hiai kha. I ki theilouh-lem sak ziak a hiai thutak pen ana kikhek tuan hetlou aka! I sih di hun leng kigen theilou, i Hondampa leng bangchik hunlai peuh a hongpai thei hi gige.

Huan ah, hi pelh pulh ihihna uh adang khat ahih leh, Mi’n Khristian na hikei hon chi le uh, thuakhak sa mahmah dite kihi. Gingloute, Pathian lem bete bang simmoh bawl sek zomah hang! Huaiziak a Khristian chih min pu se ta rau-rau a, ki Christian sak mahmah i hih leh chu, hoihtak in, ki siing-sa thak in, a min i put peen hinpih (practice) in i hinkhua a zang (apply) le anuamsa a, ‘Hinna Tampi’ nei di lah eimah ki hi zel. Khantawn hinna lah ei a sa hizomahlai di maw?
A Thu i hinpih a, i zat diing bang leng, ei a hihtheihna om khel a hon lam-en lou zomah lai hi a maw, i Pathian hoih daan lawmlawm! A iitna ziak a, Jesu Khris tungtawn a, A hehpihna leh zahngaihna toh A hon etkolna pen nelhsiah a i neih leh, tangtawn sihna hon tun thei hi bok si. Ki ngaihtuah a, ki-vel zo i ki-saan diing mah uh ana hi gige hi. Huchi lou a, bangchidan a Toupa toh i kizopna bangchi bang ahi chih theithei di la? Zekai thei ahi chih thei thak ni!

Toupa’n apoimoh bangbang a ki en-chian leh ki vel-chian thak thei ding in Jesu Khrist’ Min in hon panpih chiat hen. Amen.

– Chingngaihlian Tunglut

October 25, 2019/Article No. 01

(Laigelh toh kisai kupbeh nuam a omleh, laigelhtu +919892316430 ah thuzaak theih diing hi.)

 



Leave a Reply

Your email address will not be published.

*
*
*

× Direct Appointment