Mihingte’ damsung hun tomchik himahleh I damlai nite un I ut teng uh hih thei ding kisa in theihtawp suah in I khosa uhi. Nopsak na ding leh maban a bang hiam muh ding leh neih ding delhdelh in I om uhi. Khen khatte a pil deuh bang, asiam deuh bang a om a, khenkhatte’ siamna nei khollou leh haksa tak a hing I om uh a, khosakna lam ah leng a nei deuh leh abuai deuh I om uhi. Huchi ahihlai in I khualzinna gam uh aki bang vek a, khualzin lel I hih dan uh hon paisan sa te a pat inleng I thei hi. Leitung a hing den ding ki omlou a, I sih hun a hongtung di ni pen ei a ding in khovel bei ahi ding a, Ieitung a I khualzinna zou I hi ding hi.
Hun sawtlou chik hiai leitung a I khualzin sung un I hinna bang I chi zat a? Mihingte’n deihtel theih na sia-le-pha theih na I nei uh a, hiai tuh I hih peuh ah aneu pen apat alian pen tan ah a om gige hi. Tua deihtelna te chu thumal nih a hi gige a, hiai tegel ah bang pen I zui a, bang pen I nawlkhin a? chih I ki dotna lian pen hileh I chi ahi.
Khenkhat te’n nopsakna dingte mah enlah in a nuamnuam ding lampi ah I pai uh a, hoih hia hoihlou hia chih hi zaw lou in, mahni hamphatna di te’ leh nopsakna ding ahih nak leh poisa lou in nop I sak na dingte uh I tel zaw uhi. Hiai nopsaknate tuh I taksa ua ding lel ahi zomah a, hun tomchik sung kia kipahna a hon pia thei a, sawtlou chik sung a daih hi. Himahleh maban a hongtung ding haksatna te thei a, tua te maituah ngam a, gimnate leh mite muh a zum na tampi ana thuak a, ana pai galkai te tanchin thupi un eng huai uh hina e. Mite mitmuh in vuallel leh genthei tak in khosa mah le uh, Toupa lau leh Amah deihdan a hinkhua zangte’ ahihziak un Toupa kiang ah a kipahman ding un tam hina in chia.
“Kong kawchik ah lut un; manthatna a paina kong a za a, a lam leng a lian a, huai a lut tam leng a tam mahmah uhi. Hinna a paina kong a kawchik a a lam a neu hi, a tawnte tawmchik ahi uh.” – Matthai 7:14
Bang lampi ah I lut a?
A dikdik in genleng mitamtakte’ lunglutna zaw mahni kipahna ding leh nopsakna ding kia ngen ahi hi. Haksatna tuah dingte khong I gen chiang un bangmah I hih peih kei uhi. Mahni innsung natan ah leng a nuam theithei di te mah mitsuan a nei in, I innsung mite’n haksa a tuah ding uh bang I ki lauh pih lai uhi. Tua te zaw I deih pen ahi kei mah hi, himahleh tua haksatnate phu ngam ding leh tua te tungtawn a I sin khiat ding uh ki hilh leng manpha zaw ding hi. Toupa deihdan leh Amah lungtuak a I om theih na ding un mahni nopsakna te’ I koih khiat hun uh a poimoh hi. Pathian apan vualzawlna I dongte uh tungtawn in nuam tak in I khosa kha thei uh a, tua te mah zang khial in ahi loulou in I hunte uh I zang bei kha thei uhi.
Tulai hun ah houh Pathian vualzawlna I dongte uh ziakin ut in ut kei lengle thilteng ah Technology I zang ta uh a, hun tomchik sung in I deihdeih uh, I utut uh I hih theita uhi. Hiai te in I hunte uh I zang bei ua, Thumna hun ding, Laisiangthou simna hun ding ki pia zou nawn lou hi. Hiai bang a nuam sa a, lungkim tak a om I kisak lai un Khalam ah manthatna lian pi leh lamdik lou a ana paipai I hi kha ding uhi. I hun mandan te uh leng ki en thak leng I ki chi hi, Laisiangthou sim a, thumna hun I zatdan te uh ngaihtuah thak ni. Gingtu diktak kichi te zaw mahni nopsakna kia a ki bual lou ding un a gingtak huai hi.
“Huan aman a kiang uah, kong kawchik ah lut tum teitei un; k’on hilh ahi, mi tampi in lut a tum ding ua, a lut theikei ding uhi.” – Luke 13:24
Hiai thu tuh gingtu te a dia poimoh mahmah leh I ngaihtuah gige ding un a hoih hi. Mahni utdan leh I man dan un I chi hia, I phur dan uleh lunglut dante un nuamtak a Pathian thu awi i na kichi nak uhi. Ni khat a hun sawtlou sung Toupa toh I hunzat te un I lung uh a kim mahmah lai thei hi. Huchi ahihlai in leng mi tamtak te’n Pathian thu lam himhim hou ngaih hileh ki lawm in, Khovel thupina te sang a niam zaw a koih in I bawl uhi. Pathian thugen te’ thugen di teng thei sa, za khata in I ki ngai uh a, himahleh I hinna ua I hing khiat pih uh leh I zuih uh a tawm mahmah ta hi. Hiai in khovel a thil omte thupi koih zaw a, tua te a ki nga zaw I hih dan uh a honlang sak mahmah hi. Hichi tan lel a Pathian thu awi a, Vangam lut I tup in zaw, denciang in I lutthei kei kha ding hi. Nang leh kei vuak I hi zenzen kei, mi tampi chih ahi lai hi. Tua mi tamtak te lah a I tel khak ding a lauh huai lotel hi. I taksa in damna dia nekding ann a poimoh bang in Pathian thu a ki diahkawt gige tuh I hinna dia a poimoh pen leh I tangtawn hinna adia poimoh ahi zaw hi.
“Kei kongkhak ka hi; keimah a mi a lutleh, humbit in a om ding a, a lut in a pawt ding a, nekding leng a mu ding hi.” – Johan 10:9
Jesu Khris a hotdamna mu a, Amah a ki ngakna neih louh ngal leitung ah kipahna hon pe thei om lou hi. Hiai leitung a khualzin lel I hih dan uleh, hing den lou ding I hih dan uh I thei uh a, hiai hun tomchik sung in Toupa toh I hih na peuh ah ton leng Aman hon humbit ding a, I poimoh I taksapte’ a hun bangzel in hon pia ding hi. Khovel hon piak theih lungkimna leh kipahna te ah hi zaw lou, Jesu ah ahi zaw hi. “Midang kuamah kiang ah hotdamna a omkei, van nuai a mihing sak lak ah, hon hondam ding min dang a omkei” a chi”. – Nasepte 4:12
Mitamtakte tua hotdamna a lut tum mah le uh bangziak a lut zoulou uh hiam chih I ki dotna ahi nawn hi. Laisiangthou mah I sim nawn ding, Huan mi tengteng kiang ah, “Kuapeuh in hon zuih a ut leh, amah kingaihsaklou in, niteng a Kros pua in honzui hen” – Luke 9:23. Hiai ah amah kingaihsaklou in chih I mu hi. Khovel a I hinsung uh tomchik hina pi, khual chih takin I ki khual uh a, I poimoh te uh atam thei mahmah mai hi. Hiai te mah buai pih a nei in I niteng hunte uh I zang bei uhi. Himahleh Toupa nung I zuih theih taktak na ding un tua te apoimoh vek kei hi, I nutsiat ding uh a om a, I hih louh ding uh a om a, I tan ngam ding uh leng a om hi. Leitung a I zongzong a I buaipih te un hotdamna hon pethei lou ding hi. Niteng a Jesu nung I zuihna ua nuamtak leh kipaktak a hinkhua zang ding I kisa nak uhi. Huchi ana hiden kei hi, haksa tampi I tuah ding a om gige hi. Mahni utna leh nopsaknate, thupina leh lal nate, engna leh hazatna chihte khong niteng a I hun zatna ua i maituah gige uh ahi hi. Toupa nung I zuih na a tuate I koihkhiat a, i tan ngam a ngai hi. Toupa mah zong in Amah nei masa photphot leng I poimoh I sapte a hun bangzel in Aman hon pia ding hi.
“Huchi in zahngaihna i muh theihna ding leh huh i deih chiang a huhna hehpihna i ngah theihna ding in, hehpihna mangtutphah hangtak in i naih ding uhi.” – Hebrute 4:16. Tukal I Weekly Inspiration ana sim kha peuh I ki hanthawn ahi, leitung I khualzinna uah Toupa thute mah i thu leh la uh hong ki gige henla; Amah I bangkim a bangkim hong hih theih na ding in tua hehpihna mangtutphah hangsan tak in I naih gige ding uh. Toupa’n hon ompihin hon vualzawl hen. Amen!
- Thangginom Hangshing
(Laigelh toh kisai kupbeh nuam omleh, Laigelhtu +919615804759 ah thuzaak theih diing hi.)
19th August, 2020| Weekly-Inspiration – 33