Lametna Dik Tuh Jesu Kia Ahi

Sam Laibu 42 leh 43 ah a gelhtu in, amah hinna (soul) toh kihou in, “Ka hinna aw, bang achia kun nilouh, bang achia ka sunga buai? Pathian lam en ve” chi’n thum vei mahmah ana gen hi. A lei hinkhua a taksa pen damlai na zen pi, A kha lam (Toupa a) hinna pen lungkia leh lungkham in a om chih a chiang mahmah hi.

Hiai leitung a om lai ihih ziakin buaina leh haksatna tampi i tuah om hi, gingtu hi’n gingloute hileh lungkhamna leh nguina in a hon bawm sek hi. Niteng a i thiltuah te bang, ahih keileh i lungsim a hong om den i tung a thiltung te, i na hih khak leh i na hihkhak louhte tung a kisikna leh ki awi louh na i neih om hi. Hiai te mangngilh theilou a a hongsawt deuhdeuh chiang in, i damtheihna leh i hinkhua hon sesak zou a i lungngaihna ding leh lungkhamna ding atam mahmah hi.

I ngaihtuahna tuh lametna toh a kisual gige hi. Himahleh lametna dik leh hoih neih theihna midang kiang ahi kei a, i thil tuahsa te apan zillai lak leng ahi kei hi. Huai te a bang tan hiam om mah leh Pathian a kingakna ahi i poimoh pen. “….I Pathian uh Lametna Pathian ahi ngala.” – Rome 15:13 ah leng i mu hi.

I lungkhamnate a pan suahtak theihna a omsun tuh lametna ahi. Tua lametna tuh Jesu ah a om hi. Huaiziakin, Pathian thu a kidiah gige tuh lametna dik neihna bulpi ahi a, i lungkhamnate khetkhiak theihna hoih pen ahi.

NA LAMET NA A LET ZAWH PEUH LEH NA LUNGKHAMNA A NIAM DEUHDEUH DING HI.

–  Thangginom Hangshing



Leave a Reply

Your email address will not be published.

*
*
*

× Direct Appointment